Isaya 22 - MUMA MALER 2015

Wach mokor kuom holo mar Hinom

¹ Wach mane Nyasaye onyiso kuom holo mar Hinom e ma: Un jo-Jerusalem, nyisauru gima omiyo uduto uidho ewi udi.

² Yaye, in dala ma ji goyoe mahu, kendo ma koko opong’o, bende ok ginitho e lweny.

³ Jotendu mag lweny duto noringi, kendo nomaki kapok oywayo atungegi. Kata mana jou marateke bende noring kuma bor.

⁴ Mano emomiyo awacho niya, “Weuru ng’iya! Weuru aweya, aywag malit! Kik utem kueyo chunya, nikech jowa oserumo.”

⁵ Aywak nikech Ruoth Nyasaye Manyalo Gik Moko Duto oseketo chieng’ lweny gi koko kod masira. Nomuk ohinga e holo mar fweny, kendo ji nokogi ewi gode, kadwaro kony.

⁶ Jo-Elam biro kawo aserni maggi, kendo jo-Aram biro tueyo farese e gechegi mag lweny. Jo-Kir bende nokaw kuodigi.

⁷ Geche lweny nopong’ holni mau mabeyo, kendo joidh farese noried ni lweny e dhorangeyeu.

⁸ Kamano teko mar Juda norum. Chieng’no unubed gi chir nikech giu mag lweny mokan e ot miluongo ni Od Bungu.

⁹ Bende unurang ohinga mar dala Daudi, mondo ulos kuondene mang’eny momukore. Unuchik pi Soko Mamwalo mondo ochokre,

¹⁰ kendo unukwan ut Jerusalem, mi unumuk moko mondo ulosgo ohinga obed motegno,

¹¹ bende unukuny yawo e kind ohinga ma oko kod ohinga maiye mondo pi Soko Machon odonjie. To kata kamano ok nupar Jachuech gik moko duto, kata dewo Jal mane oseloso gigo duto chon, ok nudew.

¹² Chieng’no Ruoth Nyasaye Manyalo Gik Moko Duto noluongu mondo uywagi kendo udengi, kendo mondo uliel wiu kendo urwak piende gugru.

¹³ To kar timo kamano, to unutug atuga kumetho, kendo kuyang’o dhok gi rombe uchamo, ka uwacho niya, “Wachiemuru kendo wamethuru, nikech kiny wanatho.”

¹⁴ To Ruoth Nyasaye Manyalo Gik Moko Duto osebirona e fweny, mi awinjo ka okuong’ore ni, richou ok nopwodhi nyaka chop thou. Mano e wach Ruoth Nyasaye Manyalo Gik Moko Duto!

Okor ni Eliakim biro kawo kar Shebna

¹⁵ Bang’e Ruoth Nyasaye Manyalo Gik Moko Duto nowachona niya, “Dhiyo ir jakeno ma nyinge Shebna, ma jarit od ruoth, mondo ipenje kama:

¹⁶ ‘Ere gima itimo ka, koso ere wadu man ka, momiyo isekunyo bur mibiro yikie kae? Chutho, ang’o momiyo ikunyo bur malo e lwanda, mondo obed liel ma ringri biro yueyoe?

¹⁷ Ruoth Nyasaye biro teng’i oko, mana ka ng’ama teng’o nyuogo oko e nanga.

¹⁸ Eka enong’wasi motueyi matek, kendo oboli e piny malach, mana ka mpira mowit e pap, kendo gecheni mag lweny mayande isungorigo nosik mana kuno.’ ”

¹⁹ Ruoth Nyasaye wachoni niya, “Anagoli e tiji, mi adwoki e piny.

²⁰ Chieng’no analuong jatichna Eliakim wuod Hilkia mondo okaw kari.

²¹ Anarwake gi lawi mar duong’, mi asidhne kilembani, kendo enobed wuon jo-Jerusalem gi jo-Juda

²² Anamiye rayaw mar od Daudi, kendo gima oyawo, onge ng’ama nolor; bende gima oloro, onge ng’ama noyaw.

²³ Enobed jatelo ma nomi joodgi yud duong’, kendo anagure matek, mana ka musmal.

²⁴ Kuome ema joodgi duto te, koda ka modhier, nobed kayudoe konyruok, mana kaka gik mang’eny mopogore opogore liero kong’aw e musmal.

²⁵ To an, Ruoth Nyasaye Manyalo Gik Moko Duto, amedo wacho ni, chieng’no musmal mane ogur motegnono nopudh oko. Adier, nong’ade mi olwar, kendo gik moko duto mayande olier kuome nokethi. An Ruoth Nyasaye ema awacho kamano.”