Isaya 21 - MUMA MALER 2015

Wach mokor kuom Babulon

¹ Wach mane Nyasaye onyiso e fweny kuom thim man but nam e ma: E fweny malichno nanenoe kalausi mager kaa e thim man yo milambo, ma en piny ma ji oluoro.

² Ne aneno kaka dala mandhogo ji, ondhogi. Ne awinjo ka Nyasaye jiwo jo-Elam kod jo-Media ni mondo odhi omonj Babulon kendo olwore, mondo sungane orum.

³ Kane aneno fwenyno ne apuodora ka rem rama malit, mana ka dhako ma muoch kayo. Gik mane aneno kendo awinjo ne ogoya gi kibaji, mi adhier nono.

⁴ Dhoga nomoko kendo natetni ma ok anyal konyo. Ne asegeno ni abiro yueyo godhiambo, ka chieng’ opodho, to kindeno nolokorena mana masira.

⁵ Bende naneno ka chiemo oseket piny, mi ochan kombe, kendo ka jatend jo-Babulon chiemo kendo metho, to e sano ne gipo ka oluonggi mondo gimanre gi gigi mag lweny.

⁶ Ruoth Nyasaye nowachona kama: “Ket jang’icho mondo ohul gik ma oneno.

⁷ Ka oneno geche lweny ka biro, ma farese ariyo ariyo ywayo, kaachiel gi joma oidho kenje kod ngamia, to mondo orang ane maber gima timore.”

⁸ Bang’e jang’icho nokok niya, “Jaduong’, asebet ka achung’ kar ng’icho odiechieng’ gotieno duto pile,

⁹ to koro echa aneno joidh farese ka biro, kaachiel gi geche lweny ma farese ariyo ariyo ywayo.” Eka nawinjo dwoko niya, “Babulon osepodho! Osepodho, kendo nyisechene manono osemuki moriere piny.”

¹⁰ Yaye, jothurwa ma jo-Israel, ma osenyon ka kal minyono kidino, asenyisou gik ma Ruoth Nyasaye Manyalo Gik Moko Duto ma Nyasach Israel owachona.

Wach mokor kuom Duma

¹¹ Ma e wach mane Nyasaye onyiso e fweny kuom Duma: Ne awinjo ng’ato ka luonga Seir. Ne openjo niya, “In jang’icho koro en sa adi mar otieno?”

¹² Ne adwoko niya, “Piny chiegni ru, to obiro yuso kendo. To kudwaro penjo kendo, to uduog ira.”

Wach mane okor kuom jo-Arabu

¹³ Ma e wach mane Nyasaye onyiso e fweny kuom jo-Arabu: Un jo-Dedan ma bworo e thim gi jo-Arabu,

¹⁴ kod un joma odak Tema, rwakuru joma oseringo, kumiyo chiemoo gi pi,

¹⁵ nikech giseringo lweny mager, minegoe ji gi ligangla kod asere mabith.

¹⁶ Ruoth Nyasaye osewacho niya, “Kapok higa achiel orumo ngang’, to duong’ duto mar jo-Arabu ma Kedar notieki.

¹⁷ Jo asere marateke maggi manok kende ema nodong’, nimar Ruoth Nyasaye ma Nyasach Israel ema owacho kamano.”