Isaya 18 - MUMA MALER 2015

Wach mokor kuom Ethiopia

¹ Nitie piny moro loka aora mag Ethiopia, ma yiedhi ng’enyie.

² Pinyno oro joote kaluwo aora Nael gi yiedhi mohondhi gi odundu. Un joote ma jong’wech, doguru ir jou, gin ji maboyo kendo ma dendgi poth, ma ji oluoro kuonde duto. Gin ji marateke, maloyo ogendini mamoko, kendo ma pinygi aore opogo opogo.

³ Un ji duto modak e piny, unune koting’ bandeche lweny malo ewi gode, kendo unuwinj ka tung’ ywak.

⁴ To Ruoth Nyasaye nosewachona kama: “Abiro rango piny gie polo kar dakna, ka ayueyo mos, mana kaka piny kue mos ka chieng’ liet, kata ka tho omoko gokinyi e ndalo keyo.

⁵ Ananeg joma dwaro monjou ka pok gichopo, mana ka ng’ama ng’ado bede mzabibu gi ratong’ e kinde ma keyo podi, ma mzabibu osemoyo, kendo olembgi chiegni chiek,

⁶ ringregi duto nodong’ ni winy mae gode, mondo ocham e ndako oro, kendo ni ondiegi mondo ocham e ndalo chwiri.”

⁷ E ndalogo, ogandano noter chiwo e nyim Ruoth Nyasaye Manyalo Gik Moko Duto. Gin ji maboyo ma dendgi poth, ma ji oluoro kuonde duto. Gin ji marateke, maloyo ogendini mamoko, kendo ma pinygi aore opogo opogo. Ginikel chiwogo e got Sayun, kama ji lamoe Ruoth Nyasaye Manyalo Gik Moko duto.