Hosea 6 - MUMA MALER 2015

¹ Jo-Israel wacho niya, “Wadoguru ir Ruoth Nyasaye. Osekidhowa, to kata kamano obiro changowa. Osehinyowa, to donge obiro keto yath e adhondewa?

² Bang’ ndalo ariyo kata adek obiro duogo chunywa kendo miyo wachak wadhi maber, mi wadag e nyime.

³ Weuru wabolre kendo watem bedo joma ong’eyo Ruoth Nyasaye, nimar obiro biro irwa adier, mana ka piny ma jaru pile. Bende obiro biro mondo oguedhwa, mana na koth ma miyo piny bedo mang’ich.”

⁴ To Ruoth Nyasaye wacho niya, “Un jo-Israel gi jo-Juda, ang’o ma anyalo timonu? Hera ma uherago lal piyo mana ka ong’weng’o mar okinyi, kata ka tho maduono ka nyango tegno.

⁵ Kuom mano, aseoro jonabi maga iru mondo osiemu ni ibiro kumou kendo tiekou. Gima adwaro ni mondo un joga utim, en gima ratiro kendo maler,

⁶ nimar gima adwaro moloyo en hera mosiko, to ok misengni. Ber ka joga ong’eya, moloyo ka gitimona misengni miwang’o.

⁷ “To piyopiyo nono mane jogago odonjogo e piny mane asingoranigi, ne giketho singruok mane atimo kodgi, mi giweya.

⁸ Gilead en dala ma jomahundu opong’o, kendo ma remb joma onegi chuerie.

⁹ Jodolo chalo mony mag jomecho marito ji kobuto e bungu. Kata mana e wang’ yo madhi Shekem ginegoe ji. Gitimo mahundu mana gi wang’ matek.

¹⁰ Aseneno ka gitimo gima mono e Israel. Joga osedwanyore kendgi kuom lamo nyiseche manono.

¹¹ To un jo-Juda aseketo kinde ma abiro kumoue kuom gik ma utimo.”