Hosea 2 - MUMA MALER 2015

Hera ma Ruoth Nyasaye oherogo joge moweye

¹ Kuom mano, ubiro luongo joweteu ni Ami, tiende ni, joga, kendo ubiro luongo nyimineu ni Ruhama, tiendi ni, joma oher.

² “Nyithinda, wuoru gi meru! Donge en e chiega, to an e chwore? Wuouru kode mondo owe timbene mag terruok.

³ Ka ok kamano to abiro gonye, mi odong duk kaka nonywole! Abiro miyo ochal gi piny motwo ma pi ongee, kendo riyo biro nege.

⁴ Kata mana nyithinde bende ok naher, dhako ma jachode

⁵ ema nonywologi e terruok. Dhako mane onywologino onge gi wichkuot, nimar owacho niya, ‘Adwaro chodena, nikech gin ema ne gimiya chiemo gi pi, gi mo kod divai, kod yie rombe, gi pamba michweyo nanga.’

⁶ “Kuom mano yo mokadhoe abiro dino gi kudho, kendo abiro gero ohinga ogeng’ yo moluwo, mondo kik ochak oluw yorene machon.

⁷ Ka olawo chodene, to ok nojukgi, kendo ka omanyogi, to ok noyudgi. Bang’e nowach niya, ‘Abiro dok ni chwora kendo, nikech ne aneno maber ka wan kode moloyo kaka obet sani.’

⁸ To pod ok ong’eyo ni an ema ne amiye cham gi divai kod mo, bende ok ongeyo ni an ema ne amiye fedha gi dhahabu mogundho, mane otiyogo kuom lamo Baal.

⁹ Omiyo e ndalo keyo, to anakaw cham gi divai mane amiye, kaachiel gi yie rombe gi pamba mane amiye mondo ochwego nanga orwaki.

¹⁰ Bang’e anagonye duk mana ka chodene neno, kendo onge ng’ama norese e lweta.

¹¹ Anatiek mor duto moneno, kod chokruokne duto mag lemo, kaka sewni motimo higa ka higa, gi sewni motimo due ka due, kod nyasi motimo juma ka juma.

¹² Anaketh yiende mag mzabibu gi ng’opene, ma owacho ni gin chudo mane chodene omiye. Anami yiende mag mzabibu kod yiende mamoko lokre bungu, kendo le ma e thim nokethgi.

¹³ Anakume kuom kinde mane oweyae, mowang’o ubani ni Baal, kendo orwako gik mabeyo mondo olombgo chodene. An Ruoth Nyasaye ema awacho kamano.

¹⁴ “To koro winjuru! Abiro kawe, mi atere e thim, kendo abiro wuoyo kode maber kuno, mi aduog chunye.

¹⁵ Anachak adwokne puothene mag mzabibu, kendo nalok Holo Thagruok odok dhoranga geno. Ka aluonge, to nodwoka mana kaka ne odwoka kapod oyom, e kinde mane owuok oa e piny Misri.

¹⁶ Adier, chieng’no noluonga ni chwore, to ok nochak oluonga ni Baal mare.

¹⁷ Ok nachak awe omul nying Baal kendo. An Ruoth Nyasaye ema awacho kamano.

¹⁸ “Bang’ mano anatim singruok gi le mae thim gi winy mae kor polo kod gik mamol e lowo ni kik gihiny joga. Eka natur atung’ gi ligangla kod gimoro amora mar lweny, mi aywegi oko e piny mondo joga odag gi kue.

¹⁹ In Israel, abiro kendi mondo ibed chiega, mi anatimni gima berr kendo makare. Ananyisi hera gi ng’wono mochwere, kendo inibed mara nyaka chieng’.

²⁰ Anarit singruokna, kendo anatimu joga, mi unung’e ni an e Ruoth Nyasaye.

²¹ E kindeno anadwok kwayo ma joga Jezreel kwayogo. Anami koth chue e piny,

²² mi piny nonyag cham gi mzabibu kod zeituni.

²³ Anapidh joga e pinyni, mi anami gidhi nyime maber. Anaher joma ne iluongo ni, ‘joma ok oher,’ kendo anawach ni joma iluongo ni, ‘joma ok joga,’ ni un joga, mi ginidwoka niya, ‘In Nyasachwa.’ ”