Hosea 12 - MUMA MALER 2015

¹ Gik moko ma jo-Israel timo, chakre okinyi nyaka otieno, gin gik manono kendo mahinyo ji. Miriambo kod timbe mag mahundu medore ameda kuomgi. Gitimo winjruok gi jo-Asuria, kendo gichiwo mor zeituni ni jo-Misri mondo okonygi.

² Ruoth Nyasaye dwaro yalo jo-Juda, bende obiro kumo jo-Israel maromre gi timbegi maricho.

³ Jakobo kwargi nowuondo owadgi ka pod gin ei min-gi, kendo kane osedongo, ne oi gi Nyasaye.

⁴ Ee, noi gi malaika, mi oloyo. Noywak kodwaro ni mondo oguedhe. Nyasaye noromo gi Jakobo Bethel, mi owuoyo kode.

⁵ Mano ne Ruoth Nyasaye Manyalo Gik Moko Duto, kendo Ruoth Nyasaye e nying mibiro parego.

⁶ Kuom mano, un nyikwa Jakobo, genuru kuom Ruoth Nyasachu, kendo udog ire. Beduru joadiera kendo joma timo gik makare, kendo keturu chunyu pile kuom Ruoth Nyasachu.

⁷ Ruoth Nyasaye wacho niya, “Jo-Israel bende jomganga mana ka jo-Kanaan. Gin gi rapim ma ok ni kare, kendo gihero wuondo jong’iewo.

⁸ To eka giwacho niya, ‘Wamew, nimar waseyudo mwandu, kendo onge ng’ama nyalo wacho ni waseyudogi e yor miganga.’

⁹ To an Ruoth Nyasachu mane ogolou Misri, abiro miyo uchak udag e hembe mana kaka ne udak ka ne aromo kodu e thim.

¹⁰ Ne awuoyo gi jonabi, mi amiyogi fweny mang’eny, to koro abiro kelo masira gi lwet jonabi!

¹¹ Jo-Israel lamo kido manono Gilead, to joma lamo gik ma kamago biro tho. Gitimo misengni gi ruedhi Gilgal, emomiyo kende-mag-misango biro lokore, mi dok tuche mag kite manie puothe.”

¹² Jakobo kwarwa ne oringo modhi e piny Aram, kuma ne okwayoe jamb ng’at moro mondo oyud dhako.

¹³ Ruoth Nyasaye ne ooro janabi mondo ogol jo-Israel e tuech. Adier, nooro janabi mondo oritgi.

¹⁴ Jo-Israel osemiyo Ruoth Nyasaye mirima mager. Giwinjore gi tho kuom timbegi maricho, kendo Nyasaye ok nowenigi richogi, to obiro kumogi kuom wichkuot ma gisemiye.