Habakuk 2 - MUMA MALER 2015

Ruoth Nyasaye odwoko Habakuk

¹ Abiro chung’ kara. Adier, abiro chung’ ewi kama oger mabor mar ng’icho, mi arit mondo ane ane gima Nyasaye biro dwoka kuom ywakna.

² Eka ne Ruoth Nyasaye odwoka kama: “Ndik wach mibiro yudo e fweny, kigoro maler e kite mopa, ma ng’ato nyalo somo mayot, mi ring nyis joma moko.

³ To fweny mibiro yudono nigi kinde moketne, kendo ka kindeno ochopo, to gigo notimre mana ma piyopiyo mak orem. Kata ka ineno ni odeko, to rite arita, nikech notimre maonge kiawa, kendo mana e kinde mowinjore.”

⁴ Koro ma e fweny nogo: Ng’at ma chunye ok ni kare nopodhi, to ng’at makare nobed mangima nikech adierane.

Masiche mabiro mako joma richo

⁵ Andhoke ma jo-Babulon sungore, to ok ginidhi maber. Gisechoko ogendini mang’eny moa e pinje mopogore opogore, ka wuoro omakogi, to ok ginyal yieng’.

⁶ To kinde biro ma joma koro gimakogo nong’ong’nigi, kawachonigi niya, “Unune malit, un jomecho ma doko momew gi mwandu moyaki kod gik mohol.”

⁷ Donge joma uholo gik moko biro bandhou gigo? Koso donge gibiro tucho apoya, mi giteng’u nyaka udong’ nono, mi ubed wasumbgi?

⁸ Kaka ne uyako ogendini mang’eny, e kaka ogendini duto bende noyaku, nikech remo mane uchuero kod timbe mahundu mane utimo e piny kendo e mier, kusandogo joma odakie.

⁹ Unune malit, un muyudo mwandu e yo marach, mondo ugergo dalau kama oting’ore ma wasigu ok nyal monjoue.

¹⁰ Tim musetimo kutieko ogendini mang’eny biro kelonu wichkuot, mi ket ngimau e masira.

¹¹ Kata mana kite manie kor utu noywagrenu, kendo yien manie tetu nodwokgi!

¹² Mano kaka unune malit, un joma gero mier gi pesa moyud kuom nek gi mecho.

¹³ Donge Ruoth Nyasaye Manyalo Gik Moko Duto osewacho ni gik ma ogendini mamoko oseyudo gi luchgi nowang’, mi lal nono?

¹⁴ Kinde biro chopo ma joma ong’eyo duong’ mar Ruoth Nyasaye nopong’ie piny ka, mana ka pi mopong’o nam.

¹⁵ Unune malit, un joma sando jopinje makiewo kodu, mi kwang’ ka joma omer, mana ni mondo unyiergi ka giwuotho duk.

¹⁶ To un bende duong’ ma un go biro lokore wichkuot, nikech ubiro madho kikombe ma mirimb Nyasaye opong’o mi ukwang’. Ee, Nyasaye biro kumou malit mi unubed gi wichkuot marach kar duong’ mane un-go.

¹⁷ Timbe mahundu, mane utimo ni Lebanon, kendo nek mane unegogo le man kuno nodog e wiu, kendo nomi udhier nono, nikech usechuero remo e piny kendo e mier, bende usetimo timbe mahundu ni joma odakie duto.

¹⁸ Ere ohala muyudo kuom lamo nyiseche manono ma lwet dhano ema oloso? Gin mana kido mamiyo ji lal. Ere ohala ma ng’at molosogi yudo kuomgi? Chutho oloso mana nyiseche manono ma ok nyal wuoyo!

¹⁹ Unune malit, un joma wacho ni yath mopa mondo ochiew, kendo ma kwayo kidi mondo oa malo. Bende gik makamago dikelnu wach moa kuom Nyasaye adier? Obawgi gi fedha kod dhahabu, kendo gionge gi ngima.

²⁰ Ruoth Nyasaye to nie Hekalu mare. Piny duto mondo oling’ thi e nyime!