Ezra 1 - MUMA MALER 2015

Ruoth Kuros ogoyo milome

¹ E higa mokwongo mar loch Kuros ruodh Persia, Ruoth Nyasaye nomiyo wachne mane Jeremia okoro, otimore. Nomiyo Kuros ruodh Persia ogoyo milome e pinje duto,, kendo olando wach gi barua, kowacho niya:

² “Ruoth Nyasaye ma Nyasach polo osemiya loch kuom pinje duto, kendo en owuon osechika mondo agerne Hekalu Jerusalem e piny Juda.

³ Jo-Ruoth Nyasaye duto man kuomu nyalo dhi Jerusalem e piny Juda mondo ochak oger Hekalu ni Ruoth Nyasaye ma Nyasach Israel, ma dalane en Jerusalem, kendo Nyasaye mondo obed kode.

⁴ To ng’ato ka ng’ato ma ok odhi, omi teko mar solo fedha gi dhahabu gi jamni kod gik mamoko kuom jogweng’gi, kamoro amora modakie. Mago nobed mich momedi kuom gik mane ji chiwo kuom herogi ni tich Hekalu mar Nyasaye man Jerusalem.”

Joma otue Babulon odok Jerusalem

⁵ Bang’e jodong dhout Juda gi Benjamin kod jodolo gi jo-Lawi, kaachiel gi ji mamoko duto mane Nyasaye ojiwo chunygi mondo ochak oger Hekalu mar Ruoth Nyasaye man Jerusalem, noikore dhi timo kamano.

⁶ Mi jogweng’gi duto nokonyogi gi fedha gi dhahabu gi jamni gi gik mamoko, kod gik ma nengogi tek, kaachiel gi gik mane ng’ato ka ng’ato ochiwo kuom herone.

⁷ To bende gik lemo mag Od Ruoth Nyasaye mane Nebukadnezar oyudo osegolo Jerusalem, mi oketo e od nyisechene, koro Kuros ruodh Persia nogolo,

⁸ moketo e lwet Mithredath jakeno, mane okwanogi ni Sheshbazar jaduong’ mar piny Juda.

⁹ Kwan-gi ne romo kama: Nyilerni piero adek molos gi dhahabu, gi nyilerni alufu achiel molos gi fedha, gi tewni mopogore opogore piero ariyo gochiko,

¹⁰ gi tewni piero adek molos gi dhahabu, gi tewni mia ang’wen gapar mopogore opogore molos gi fedha, kod tewni mamoko alufu achiel.

¹¹ Gik moko duto molos gi dhahabu kod molos gi fedha moromo alufu abich gi mia ang’wen. Gigo duto ema Sheshbazar nodhigo kane joma otue owuok Babulon dhi Jerusalem.