Ezekiel 5 - MUMA MALER 2015

¹ Nyasaye nowacho niya, “Wuod dhano, kaw ligangla mabith, ilielgo wiyi kod tiki, kendo ipoggi didek.

² Ka kinde migoyoe ageng’a oserumo, to nyaka iwang’ achiel kuom adek mar yiergo ewi matafari mochung’ kar Jerusalemno. To achiel kuom adek machielo, ng’adi gi ligangla e alwora mar matafarino. Achiel kuom adek modong’ to witi mondo yamo odhigo, nikech anawuodh liganglana alawgo joga.

³ To kaw yiergo moko matin, mondo itue e riak lawi.

⁴ Bang’e kaw moko kuom mago, iwit e mach mondo owang’, mi mach muoch kuomgi mi wang’ jo-Israel duto pep.”

⁵ Eka Ruoth Nyasaye nomedo wacho niya, “Neye kaka Jerusalem chalo! Ne akete e dier piny, ka ogendini mamoko olwore koni gi koni

⁶ To jo-Jerusalem osepiem koda, moweyo buchena kod chikena moloyo ogendini mamoko duto, nimar gisedagi chikena, mi gitamore rito.

⁷ Emomiyo an Ruoth Nyasaye awacho kama: Kaka usebedo kupiem koda moloyoe kata mana ogendini mokiewo kodu, ka ok uluw buchena kata rito chikena, to uluwo mana timbe ogendini mokiewo kodu,

⁸ omiyo an Ruoth Nyasaye awacho ni amon kodu! Abiro kumou ratiro mondo ogendini duto one.

⁹ Usedwanyoru marach gi timbeu manono, omiyo abiro kumo jo-Jerusalem gi kum marach ma nyaka nene pok akumogigo.

¹⁰ Kuom mano, wuone nocham nyithindgi, to nyithindo bende nocham wuonegi Jerusalem.

¹¹ “An Ruoth Nyasaye mangima, akuong’ora kama: Kaka usedwanyo Hekalu mara gi timbeu mamono kendo makuero, omiyo ok nang’wonnu, to anatieku atieka, mak akechou.

¹² Achiel kuom adek mar jou, tuo gi kech nonegi Jerusalem, to achiel kuom adek machielo ligangla ema nonegi e alwora mar dala. Achiel kuom adek modong’ to anake e tung’ piny gi tung’ piny, ka alawogi gi ligangla.

¹³ To ka asetieko kumou gi mirimba mager kamano, mi achulonu kuor, to mirimba noto, mi abed gi kue mos. Bang’e unung’e ni an Ruoth Nyasaye ema asewuoyo kodu ka chunya lit nikech useweya.

¹⁴ Anami ubed oganda mojwang’ kendo mokwedi, mi ogendini mokiewo kodu kod ji duto makadho nonyieru, ka goyonu siboi.

¹⁵ Adier, ka akumou malit gi mirimba mager to unubed gima ichayo, kendo miyanyo, bende unubed puonj malich ni ogendini mokiewo kodu. An Ruoth Nyasaye ema awacho kamano

¹⁶ Anatiek chiembu, mondo kech onegu, mana ka gima achielou gi asere motimo kwiri

¹⁷ Anaol kech gi ondiegi kuomu, mi tiek nyithindu, bende anakel tuo gi lweny kod chuero remo e pinyu, mondo onegu. An Ruoth Nyasaye ema awacho kamano.”