Ezekiel 42 - MUMA MALER 2015

Udi mamoko ariyo man machiegni gi Hekalu

¹ Ng’atno notera e laru maoko, nyaka e ot moro man yo nyandwat mar Hekalu, machiegni gi ot mogik, yo podhochieng’ mar Hekalu.

² Bor odno ne mita piero abich, to lachne mita piero ariyo gabich.

³ Bathe konchiel mochomo kama ne odong’ nono, ma borne romo mita apar, molworo Hekalu, to bathe komachielo nochomo kama ochanie kite mopamore molworo laru maoko. Odno ne oger gorofe adek, ma moro ka moro lach moloyo mano manie wiye.

⁴ E bath udi manie gorofano yo nyandwat, ne nitie yo ma lachne oromo mita abich, to borne oromo mita piero abich. Dhout udigo nochomo yo nyandwat.

⁵ Udi mane ni e gorofa mamalo ne diny moloyo mago mane ni e gorofa madiere kod gorofa mamwalo, nikech gorofa ka gorofa ne lach moloyo manie wiye.

⁶ Udi mane ni e gorofe adekgo duto ne ni ewi ndiri cha. Ne gionge gi sirni kaka udi mamoko mane ni e laru.

⁷ Bor mar laini mar udi mane ni e gorofa mamwalo ne romo mita piero ariyo gabich,

⁸ kendo ohinga ma borne romo mita mita piero ariyo gabich ne ochuogore e kore, komanyore gi laini mamoko.

⁹ E bath odno mogik koma ochomo yo wuokchieng’, kama ne ohinga ochakorego, ne nitie dhoudi midonjogo e laru maoko.

¹⁰ E bath Hekalu koma odok yo milambo bende ne nitie ot moro machal gimachielono mane ni machiegni gi ot mogik, yo podhochieng’ mar Hekalu.

¹¹ E nyim udigo ne nitie yo moro machal gi mano mane ni yo nyandwat. Udi ariyogo ne romre kuom borgi gi lachgi, kendo ne gichalre chuth, koda ka dhoutgi.

¹² Ne nitie dhoudi e bath odno yo milambo, tung’ mogik yo wuokchieng’, kama ohinga ochakorego.

¹³ Ng’atno nowachona niya, “Udi ariyogi duto owal ni tich Nyasaye. E igi ema nyaka jodolo matiyo e nyim Ruoth Nyasaye chamie misengni malerie moloyo. Jodolo noket misengni malerie moloyo, kaka misegni mag cham, kod misengni mag golo richo, kod mago mipwodhogo ketho mar gowi, ei udigo, nikech gin kuonde mowal ni tich Nyasaye.

¹⁴ Ka jodolo dwaro wuok e Hekalu mondo odhi e laru maoko, to nyaka giwe lewni maler mag dolo mane oyudo girwako ka gitiyo e nyim Ruoth Nyasaye. Nyaka girwak lewni moko nono, ka pok gidhi oko kuma ji ochokoree.”

Bor gi lach mar kama Hekalu nitie

¹⁵ Kane ng’atno osetieko pimo kama ogerie Hekalu gi yoka iye, ne ogola oko gi e dhorangach ma yo wuokchieng’, mi opimo kama Hekalu nitie gi yo ka oko.

¹⁶ Eka ne okawo rapim mar bao, mopimogo koma ochomo yo wuokchieng’, moyudo ni oromo mita mia ariyo gi piero abich.

¹⁷ Bang’e ne opimo koma ochomo yo nyandwat

¹⁸ gi yo milambo

¹⁹ kod yo podhochieng’, moyudo ni giduto gin mita mia ariyo gi piero abich maromre.

²⁰ Ne en gi ohinga molwore, ma borne gi lachne mita mia ariyo gi piero abich maromre. Ohingano nopogo koma ler kod koma ok ler.