Ezekiel 4 - MUMA MALER 2015

Ezekiel otimo gima nyiso ni ibiro goyo ni Jerusalem ageng’a

¹ Nyasaye nowacho niya, “In wuod dhano, kaw matafari iket e nyimi mondo igorie gima nyiso ni matofarino ochung’ kar Jerusalem.

² Bang’e ikuny bur molwore duto, mi idhurne lowo, kendo iketne gik moko mochung’ kaka ranyisi mag kambe jolweny kod lodi mituomogo ohinga.

³ Bende kaw tap nyinyo mondo iket ka ohinga mar nyinyo e kindi gi matafarino. Chom matafarino tir, mondo ochal gi dala ma ogone ageng’a, to in ema ichal gi joma goyone ageng’a. Mano nobed ranyisi ni jo-Israel.

⁴ “Bang’e nindi gi ng’eti koracham mondo ochal ka gima aketo richo jo-Israel kuomi. Ndalo duto ma irieri kanyo nochal ka gima iting’o richogi.

⁵ Inirieri kanyo kuom ndalo mia adek gi piero ochiko, nikech akwano ndalo achiel kar higa achiel ma abiro kumogie.

⁶ Ka isetieko ndalogo duto, to chak inind kendo gi ng’eti korachwich, mondo iting’ richo mag jo-Juda bende kuom ndalo piero ang’wen. Akwano ndalo achiel kar higa achiel.

⁷ “Bang’e irang matafari manyiso ni ibiro goyo ni Jerusalem ageng’a, kendo irie badi kikoro ni masira biro mako dalano.

⁸ Abiro tueyi gi tonde mondo kik ilokri koni gi koni, nyaka ndalo mag ageng’a rum.

⁹ “Koro kaw ngano gi shairi gi oganda gi olayo gi bel kod mariwa mondo iolgi duto e agulu, itedgo kuon. Inicham kuonno kuom ndalo mia adek gi piero ochiko ma ibiro nindoe gi ng’eti ma koracham.

¹⁰ To cham mana chiemo moromo achiel kuom ang’wen mar kilo e odiechieng’ kodiechieng’, kendo nyaka ichame mana dichiel e sa moketi.

¹¹ Pi ma imodho bende nyaka bed mana nus lita odiechieng’ kodiechieng’.

¹² To kitedo chiemono, to nyaka itede mana e mach michwako gi chieth dhano, kama ji duto nyalo nenie.”

¹³ Eka Ruoth Nyasaye nowacho niya, “Ka asekeyo jo-Israel e pinje mamoko, to mano e kaka ginicham chiemo ma chik okwero.”

¹⁴ To ne adwoke niya, “A Ruoth Nyasaye an pok atimo gima kuero ngang’.”

¹⁵ Kuom mano, Ruoth Nyasaye noyiena mondo ated chiemba gi mach mar owuoch dhiang’, kar tedo gi chieth dhano.

¹⁶ Bang’e nowacho niya, “Wuod dhano, abiro miyo chiemo bed mamit Jerusalem. Ji nopim chiemo ma gichamo ka parore. Pi ma gimodho bende ginipim ka gidhier nono.

¹⁷ Kamano ginichand chiemo gi pi, mi giwuor, ka ng’ato ka ng’ato ng’iyo wadgi, kendo dendgi nodhi adhiya nikech richogi.”