Ezekiel 3 - MUMA MALER 2015

¹ Eka Nyasaye nowachona niya, “In wuod dhano, cham kalatas manie nyimini, mondo idhi iwuo gi jo-Israel.”

² Kuom mano, ne ang’amo dhoga, mi omiya kalatasno mondo acham,

³ kowachona niya, “Cham kalatas mamiyini mondo oyieng’i.” Kamano ne achame, mi awinjo ka omit mana ka mor kich.

⁴ Bang’ mano, Nyasaye nowachona niya, “Wuod dhanoo, dhiyo ir jo-Israel mondo inyisgi weche duto ma awachoni.

⁵ Ok aori ir oganda mawacho dhok matek ma ok ing’eyo, to aori mana ir jo-Israel ma jou.

⁶ Ka da bed ni aori ir ogendini madongo mawacho dhok matek ma ok ing’eyo, to da gichiko itgi, mi giwinjo gima iwacho.

⁷ To jo-Israel ok bi chiko itgi mondo owinj gima iwacho, nikech an bende ne gitamore winjo wachna. Giduto gin jopiem, kendo wigi tek.

⁸ Koro abiro miyo wiyi bedo matek ka wigi,

⁹ bende abiro miyo ibedo motegno moloyo lwanda. Omiyo kik iluor joma jopiem go, kata kik iwe gigoyi kibaji.”

¹⁰ Nyasaye ne odhi nyime kawachona niya, “In wuod dhano, chik iti maber ahinya mondo ipar weche duto ma abiro wachoni.

¹¹ Bang’e idhi ir jou ma ungo e tuech, mondo inyisgi wechenago, bed ni giyie winjo wachni kata ok giyie. To bende wachnigi ni wechego oa kuom Ruoth Nyasaye.”

¹² Eka Roho ne oting’a malo, kendo kane duong’ maler mar Ruoth Nyasaye odum, to ne awinjo koko maduong’ ka koko mar yiengni piny.

¹³ Kokono ne mar buomb gik mangimago ka moro ka moro kwadhore kuom wadgi, kendo ne mar tiende machal gi mag garigo kamor matek.

¹⁴ E kinde mane Roho oting’a malono, ne iya owang’, kendo abedo gi chuny lit, mi teko mar Ruoth Nyasaye nobiro kuoma.

¹⁵ Ne adhi Telabib, kuma ne joma oter e tuech odakie e bath aora Kebar, mi abet kuno kuom ndalo abiriyo, ka adhier nono nikech gik mane aseneno.

Nyasaye oketo Ezekiel jarit mar Israel

¹⁶ Kane ndalo abiriyogo oserumo, Ruoth Nyasaye ne owuoyo koda,

¹⁷ ka wachona niya, “Wuod dhano, adwaro mondo aketi jarit mar oganda Israel. Tiji biro bedo siemogi gi siem moro amora mamiyi.

¹⁸ Ka awachoni ni ng’at ma timbene mono biro tho, mi ok isieme mondo owe yorene marichogo, obed mangima, to enotho ka pod en jaricho, kendo in ema anakwani ka ng’ama onege.

¹⁹ To ka isiemo jaricho mi odagi weyo timo timbene mamonogo, to enotho kapod en jaricho, to in inires ngimani.

²⁰ “Ka ng’at makare odonjo e richo, mi akelone masira, to enotho. Adier, enotho nikech richone, nimar ok isesieme. Ok napar timbene makare mosebedo kotimo, to in ema nakwani ka ng’ama onege.

²¹ To ka isiemo ng’at makare mondo kik tim richo, mi owinji, kendo ok otimo richo, to ok enotho, mi in bende inires ngimani.”

Janabi Ezekiel olokore momo

²² Ne ayudo ka teko mar Ruoth Nyasaye obiro kuoma, mi awinjo kowachona niya, “A malo, mondo idhi oko e holo kuma abiro losoe kodi.”

²³ Kuom mano, ne awuok, mi adhi e holo, kendo ne aneno duong’ maler mar Ruoth Nyasaye, mana kaka ne asenene e bath aora Kebar. Ne apodho auma,

²⁴ to Roho ne odonjo kuoma, mi achung’. Eka Ruoth Nyasaye ne owachona niya, “Dog dala, mondo ilorri e ot.

²⁵ Ibiro tueyi gi tonde, mi ok iniwuog idhi oko kuma jou nitie.

²⁶ Bende abiro tueyo lewi mondo kik ilosi, mi isiem joma jopiemgi.

²⁷ To bang’e ka achako wuoyo kodi, mi amiyi teko mar loso, to iniwachnigi wechena, kinyisogi ni wechego oa kuom Ruoth Nyasaye. Ji moko kuomgi nowinji, to moko ok nodewi, nikech gin oganda ma jopiem.”