Ezekiel 26 - MUMA MALER 2015

Wach mokor kuom jo-Turo

¹ Chieng’ mokwongo mar due, e higa mar apar gachiel, Ruoth Nyasaye nowuoyo koda,

² mowachona niya, “Wuod dhano, joma odak e dala mar Turo goyo mahu gi mor, kawacho kama: ‘Jerusalem ne en dala ma ogendini duto chokoree kuom ohala, to koro osekethe. Dhorangaye oseyaworenwa, omiyo wabiro bedo momew, nikech oseloye, modong’ gunda.’

³ “To koro an Ruoth Nyasaye awacho kama: Amon kodi, in dala mar Turo! Omiyo abiro kelo ogendini mang’eny mondo omonji, kendo gibiro chalo mana apaka mag nam.

⁴ Gibiro muko ohinga mari, kod kuondeni mochiel motegno mag siro lweny. Bang’ mano, anaywer lowo duto oko kuomi, mi awe kidong’ mana lwanda lilo.

⁵ Lwandano nolokre chula, ma jolupo moyoe tondegi. An Ruoth Nyasaye ema awacho kamano. “In iwuon, ogendini noyaki,

⁶ kendo giniyak joma odak e miechi maoko ma ok nie chula. Eka un jo-Turo unung’e ni an e Ruoth Nyasaye.

⁷ “An Ruoth Nyasaye awacho kama: Abiro kelo Nebukadnezar ruodh Babulon ma ruoth maduong’ie moloyo ruodhi duto mondo omonji, in Turo. Enobi kowuok yo nyandwat gi oganda lweny maduong’ kod farese gi geche lweny, kaachiel gi joidh farese.

⁸ Jogi modak e mier maoko noneg e lweny. Wasikigo nokuny buche mi giging pidhe mag lowo e bath ohingani, kendo ginimonji ka gigeng’ore gi kuodi.

⁹ Ginituom ohinga mari gi lodi madongodongo, mi gimuk kuondeni mochiel motegno mag siro lweny gi tuor mag nyinyo.

¹⁰ Rumbi mar buru ma faresegi odhuolo noimi, kendo koko mar farese maywayo gechegi mag lweny noyieng ohingani, ka gikadho e dhorangayi mokethore.

¹¹ Joidh faresegi nomwomre e yoreni ka ginego jogi, kendo sirni magi motegno nomukre.

¹² Wasikigo noyak mwanduni kod gigi mag ohala. Ginimuk ohingani, kendo giniteng’ uti mabeyo. Bende ginikaw kite gi yien koda ka lopi, mi giwit e nam.

¹³ Kamano anatiek wer duto miwero, kendo thumbe migoyo ok nochak owinji.

¹⁴ Analoki mana lwanda lilo ma jolupo moyoe tondegi. An Ruoth Nyasaye ema awacho kamano.

¹⁵ “To koro an Ruoth Nyasaye amedo nyiso dala mar Turo kama: Ka oloyi, mi omaki, to mano kaka kihondko nogo joma odak e dhonam, ka giwinjo ka jogi minego ywak.

¹⁶ Ruodhi duto mag pinje manie dhonam nowe kombegi mag dongo kendo nolony lepgi mag loch kod mago mogor malich, mi gibed e lowo ka gikirni. Ka gineno masira mosemaki, to kihondko nomakgi marach, mi ginisik ka gikirni akira.

¹⁷ Bang’e giniwer wend ywak mawacho niya: Dala marahuma osekethi, kendo yiedhi mage olal nono. Chon jodalano ne nigi loch e nam, kendo ji duto modak e dhonam noluorogi.

¹⁸ To koro Turo osepodho, omiyo pinje manie dhonam kirni, kendo joma odak kuondego kihondko nego, kuom gima osetimorene.”

¹⁹ Ruoth Nyasaye wacho kama: “In Turo, abiro loki gunda, mana ka mier mokethore maonge ng’ama odakie, kendo abiro imi gi pi nam matut.

²⁰ Abiro teri e piny joma otho, mondo ibed gi joma notho chon. Anami idag e piny manie bwo lowono, kibudho e bur matut e kind gik machon mokethore, mi ok nichak iduog e piny joma ngima.

²¹ Anami ibed gima bwogo ji, kendo mano ema nobed gikoni. Ji notem manyi, to ok giniyudi. An Ruoth Nyasaye ema awacho kamano.”