Ezekiel 22 - MUMA MALER 2015

Richo mag Jerusalem

¹ Ruoth Nyasaye nowuoyo koda, mopenja niya,

² “Wuod dhano, bende iikori mar yalo dala ma jonek opong’oni? Nyis jodalani gik maricho modwanyore ma gisetimo.

³ Bende nyisgi ni an Ruoth Nyasaye awacho kama: Usechuero remo mathoth e dalau, kendo usedwanyoru kulamo nyiseche manono, omiyo ndalou chiegni!

⁴ Un joketho kuom nek makamano, bende usedwanyoru gi nyiseche manono mane uluwo, omiyo useng’ado ndalou machiek, mi koro kindeu orumo! Mano ema omiyo aseweyo ogendini mamoko mondo ojaru, ka twenyonu umgi.

⁵ Pinje machiegni kod mago man maboyo biro jaro timbeu modwanyore mag mahundu.

⁶ Jotend Israel duto osetiyo gi teko ma gin go, mi ginego ji.

⁷ Onge kata ng’at achiel e dala mamiyo wuon gi min luor. Uwuondo jopinje mamoko, kendo usando mond liete gi nyithi kiye.

⁸ Ok uluoro kuonde mowalna, bende ok urit Sabatona.

⁹ Ji moko kuomu hango ni jowetegi wach mondo onegi. Moko bende chamo misengni motim kuonde moting’ore ma chik okwero, kendo moko dwanyore adwanya e kindu.

¹⁰ To moko bende terore gi mond wuonegi, kendo moko chuno mon mondo oriwrego ka ni e due.

¹¹ Giterore gi mond ji koda ka mond yawuotgi gi nyiminegi hie.

¹² Jomoko kuomu chuero remo mana ni mondo oyud pesa. To moko bende okawo ohala kuom pesa ma giholo jo-Israel wetegi, kendo gidoko momew e yor wuond. Wiu osewil koda. An Ruoth Nyasaye ema awacho kamano.

¹³ “Abiro tero lweta, mi akumu kuom mecho musemechogo kod chuero remo ma usechuero.

¹⁴ Bende uparo ni pod unubed gi chir kata gi teko moro ma unyalo ting’ogo kata mana lwetu ka akumou kamano? An Ruoth Nyasaye ema asewacho kamano kendo abiro timo kaka awacho!

¹⁵ Abiro keyou e kind ogendini modak e pinje mopogore, mi atiek timbeu mamono.

¹⁶ Kamano ogendini mamoko nojaru; un to unung’e ni an e Ruoth Nyasaye.”

¹⁷ Ruoth Nyasaye ne ochako owachona niya,

¹⁸ “Wuod dhano, akwano jo-Israel mana ka chuoth nyinyo modong’ bang’ lenyo fedha.

¹⁹ Kuom mano, koro an Ruoth Nyasaye awachonigi kama: Kaka un gik manono kamano, abiro chokou Jerusalem kanyakla,

²⁰ mana kaka ichoko nyinyo mopogore opogore e karaya milenyogie gi mach mager mibuko matek. Kamano e kaka mirimba mager nolenyu, mana kaka mach lenyo nyinyo mopogore opogore.

²¹ Chutho, abiro chokou Jerusalem kanyakla, mi alenyu gi mirimba mager ka mach.

²² Ibiro lenyou Jerusalem mana kaka ilenyo fedha e karaya, mi unung’e ni an Ruoth Nyasaye ema akumou gi mirimba mager.”

²³ Ruoth Nyasaye nochako owuoyo koda,

²⁴ mowachona niya, “Wuod dhano, nyis jo-Israel ni pinygi en piny ma otimo richo, omiyo abiro kume gi mirimba mager.

²⁵ Jotendgi chalo gi sibuoche ma ng’ur ka kidho le ma gisemako. Ginego ji, omiyo mond liete doko mang’eny, kendo giyako mwandu kod gik mabeyo.

²⁶ Jodolo bende ketho chikna, kendo ok gimi gik mowalna duong’. Ok gipog gik ma owalna gi gik ma ok owalna, bende ok gipuonj ji pogruok manie kind gik maler kod gik ma ok ler, kendo ok girit Sabatona. Mano emomiyo jo-Israel ok miya duong’.

²⁷ Ruodhi chalo gi otoche ma kidho le ma gimako. Gichuero remo mondo giyud mwandu.

²⁸ Jonabi to umo richogo mana ka joma mwono kor ot gi buru. Gineno fweny mag miriambo, kendo gikoro weche ma ok adier. Giwacho ni wechego gin mag Ruoth Nyasaye, to an Ruoth Nyasaye pok awuoyo kodgi.

²⁹ Ji ajia bende wuondo ji kendo mecho. Gisando joma odhier kod jopinje mamoko modak kuomgi.

³⁰ “Asebet karango mondo ayud ng’at manyalo gero ohinga, kendo ma dichung’ kuonde ma ohinga omukoree, mondo okony piny, kik akethi gi mirimba, to ne ok anyal yudo ng’at makamano.

³¹ Kuom mano, abiro tiekogi pep, ka an gi mirima mager ka mach, kakumogi maromre gi timbegi. An Ruoth Nyasaye ema awacho kamano.”