Ezekiel 21 - MUMA MALER 2015

Ligangla mar Ruoth Nyasaye

¹ Ruoth Nyasaye nowuoyo koda,

² mowachona niya, “Wuod dhano, chung’ kichomo yo Jerusalem, mondo ikwed kuonde ma ji lemoe. Siem piny Israel

³ kinyiso jopinyno ni Ruoth Nyasaye owacho kama: Amon kodu, omiyo abiro wuodho liganglana mondo anegugo duto, mi joma kare gi joma timbegi mono notho machalre.

⁴ Adier, liganglana biro nego ji duto, chakre nyandwat nyaka milambo mondo atiek jou makare kod ma timbegi mono machalre.

⁵ Kamano ji duto nong’e ni asewuodho ligangla e olalo, kendo ok nachak adwoke.

⁶ “In wuod dhano, chur ka gima chunyi dwaro chot. Adier, chur malit kama ji duto nyalo nenie.

⁷ To ka gipenji gima omiyo ichur, to nyisgi ni ichur nikech gima biro timore. Bende nyisgi ni e kindeno, kihondko nomakgi, kendo bedegi nowengni, mi chir ma gin go lal nono, kendo chongegi tetni. Kindeno osechopo, kendo gigo biro timore. An Ruoth Nyasaye ema awacho kamano.”

⁸ Wach Ruoth Nyasaye nochako obirona niya,

⁹ “Wuod dhano, kor wach, kinyiso ji ni Ruoth Nyasaye owacho kama: Ligangla opiagi kendo oywe maler.

¹⁰ Opiage mondo oneki, kendo oyweye mondo omil ka polo! Koso uparo ni atugo? Ooyo, usedagi chwat mar kede,

¹¹ omiyo ligangla ema koro iyweyo mondo ochak tich. Ipiage kendo iyweye mondo okete e lwet janek.

¹² Yaye, wuod dhano, ywagi kendo chur, nimar liganglano biro nego joga Israel, kaachiel gi jotendgi duto. Kuom mano, tang’ lweti, ka chunyi lit,

¹³ nimar ma koro ok en tem mitemogigo, nikech ere gima odong’ ma ditim ni joma ochayo kede? An Ruoth Nyasaye ema awacho kamano.

¹⁴ “Koro in wuod dhano, kor wach, kipamo lweti, mondo ligangla omil koni gi koni, ka chadho ji marach. En e ligangla maneko. Adier, en ligangla makelo kihondko kod tho.

¹⁵ Omiyo joga tuomore, kendo chunygi nyosore. Abwogo dalagi gi ligangla ma mil ka polo, kendo moikore mondo oneki.

¹⁶ In ligangla mabith, chadh koni gi koni! Ee, chadh kamoro amora michomo!

¹⁷ An bende abiro pamo lweta, kendo mirimba biro rumo. An Ruoth Nyasaye ema awacho kamano.

¹⁸ Ruoth Nyasaye nochako owuoyo koda,

¹⁹ mowachona niya, “Wuod dhano, gor laini ariyo e lowo, mochung’ kar yore ariyo ma ruodh Babulon gi jolwenje nyalo luwo. Yorego duto nyaka chakre mana e piny Babulon. Eka ichung ranyisi ariyo e akek yorego,

²⁰ mondo ranyisi achiel onyis ruoth yo madhi Raba, dala jo-Amon, to machielo onyise yo madhi Jerusalem e chuny Juda,

²¹ nimar adier ruodh Babulon ochung’ e tiend ranyisi manie akek yorego, koyiengo asere, kendo openjo nyisechene wach, bende orango chuny chiayo motimgo misango, mondo ong’ego yo monego oluw.

²² Koro oting’o asere mondikie ni Jerusalem, gi lwete ma korachwich. Kamano ong’eyo ni onego odhi Jerusalem mondo ogi sigich lweny, kendo olos lodi mituomogo dhorangeye, bende oging pidhe mag lowo, kendo okuny buche molworo ohinga.

²³ Jo-Jerusalem ok nyal yie ni gik mokorgo biro timore adier, nikech winjruok ma gisetimo gi ogendini mamoko. To mano biro miyo richogi iparo, mi makgi!

²⁴ “Kuom mano, an Ruoth Nyasaye awacho kama: Richou oel e lela, kendo ji duto ong’eyo kaka un joketho, nikech richou nonenore e gimoro amora mutimo, kendo mano ema omiyo opargi. Kuom mano, oseng’adnu bura kendo abiro chiwou e lwet wasiku.

²⁵ “In ruodh Israel, ma timbene mono, kendo ma ok ler, in bende ndaloni ochopo ma ibiro kumie mogik.

²⁶ An Ruoth Nyasaye awacho kama: Lony osimboni mar duong’ kod kilembani, nimar gik moko ok bi bedo kaka gin pile. Ji modhier ema biro yudo loch, to joma nigi teko biro podho.

²⁷ Adier, abiro ketho dalano chuth, mi lokre gunda. To mano ok notimre nyaka chop ka ruoth mowinjore gi loch obiro, kendo en ema abiro miye osimbono.

Siem ma Ruoth Nyasaye siemogo jo-Amon

²⁸ “Wuod dhano, kor wach, kinyiso gima Ruoth Nyasaye owacho kuom jo-Amon, ma yanyo jo-Israelgo. Nyisgi ni ligangla osewuodhi mondo oneki. Oseyweye maler mondo oneki komil ka polo.

²⁹ Bende nyisgi ni fweny ma gineno gin miriambo, kendo weche ma gikoro bende ok gin adier. Gin joricho ma timbegi mono, omiyo ndalo ma ibiro kumogie mogik chiegni. Ligangla biro lwar e ng’utgi.

Siem misiemogo Babulon

³⁰ “In, ruodh Babulon, dwok liganglani e olalo. Abiro ng’adoni bura e piny mane onywolie,

³¹ mi akumi ka an gi mirima mager ka mach mang’ang’ni. Bang’e anaketi e lwet jomahundu ma tichgi en mana ketho gik moko.

³² Mach nowang’i mi tieki, kendo rembi nochuer e pinyi iwuon, mi ok nochak opari kendo. An Ruoth Nyasaye ema awacho kamano.”