Ezekiel 2 - MUMA MALER 2015

Nyasaye oluongo Ezekiel mondo obed janabi

¹ Kane aneno kamano, ne apodho auma, eka ne awinjo dwol moro kawacho niya, “In wuod dhano, a malo mondo alos kodi.”

² E kinde mane dwolno wuoyo, Roho nodonjo kuoma, mi achung’ gi tienda. Eka ne awinjo ka dwolno pod wuoyo, kawacho niya,

³ “In wuod dhano, aori ir jo-Israel ma oseng’anyo mopiem koda. Kaka kweregi nopiem koda, e kaka gin bende koro gipiem koda.

⁴ Wigi tek, kendo ok gimiya luor, omiyo aori irgi mondo inyisgi gima an Ruoth Nyasaye awacho.

⁵ To kata da bed ni giwinjo wachni, kata ok giwinjo, to gibiro ng’eyo ni janabi moro osebet ka ni e kindgi.

⁶ “To in wuod dhano, kik iluorgi, kata kik iluor gima giwacho. Gibiro lwori mana ka kudho, mi giketi diere, kendo inichal mana ka gima idak e kind thomoni. To kata kamano, kik iwe joma wigi tekgo bwogi, kata kik iluor gimoro amora ma giwacho.

⁷ Kata obedo ni gin joma wigi tek kamano, to wachnigi weche duto ma awachoni ni mondo inyisgi, bed ni giyie winjo kata ok giyie.

⁸ “Wuod dhano, winji gima anyisi: Wiyi kik bed matek ka wi jogo. Omiyo ng’am dhogi mondo icham gima amiyi.”

⁹ Bang’ wechego, ne aneno lwedo moting’o kalatas modol, korie kochomo kuma antie.

¹⁰ Ne oyaro kalatasno, mi aneno ka weche mag ywak gi kuyo kod masiche ondik e iye kendo e dieng’eye.