Ezekiel 18 - MUMA MALER 2015

Ng’ato ka ng’ato biro tho nikech richone owuon

¹ Ruoth Nyasaye nowuoyo koda,

² kapenja niya, “Bende iwinjoe ngero ma ji osiko ka goyo e piny Israel, niya, ‘Wuone osechamo olemo manumu, to nyithindo ema lekegi tho’?

³ “To an Ruoth Nyasaye awacho kama: Kaka an e Nyasaye mangima, ngerono ok nochak ogo e piny Israel kendo.

⁴ Ji duto mangima gin maga. Wuoro kata wuowi gin maga giduto machalre. To ng’ato biro tho mana nikech richone owuon.

⁵ “Nyalo bet ni nitie ng’at makare, ma timo gik mowinjore kendo malong’o,

⁶ ma ok lam nyiseche manono mag jo-Israel, bende ok gicham misengni ma itimo kuonde moting’ore ma chik okwero. Ok oterre gi chi wadgi, kata ok oriwre gi dhako ka ni e due.

⁷ Ok othir ng’ato kendo ok omechi, bende odwoko gima osingne. Joma kech ohewo omiyo chiemo, kendo joma wuotho duge orwako gi lewni.

⁸ Ok ohol pesa mondo oyudie ohala, bende odagi timo timbe mamono, kendo ong’ado bura kare e gimoro amora ma ji yalo.

⁹ Oluwo chikena, kendo orito buchena. Ng’at ma kamano en ng’at makare, omiyo enobed mangima. An Ruoth Nyasaye ema awacho kamano.

¹⁰ “To nyalo bet ni en gi wuowi ma jamecho kendo janek,

¹¹ bende matimo gik ma wuon mare ne ok otimo. Ochamo misengni mitimo kuonde moting’ore ma chik okwero, kendo oterore gi mond ji.

¹² Othiro joma odhier, bende omecho, kendo otamore dwoko gima osingne. Olamo nyiseche manono, kendo otimo timbe modwanyore,

¹³ bende oholo ji pesa mondo oyudie ohala. Koro ng’at makamano dibed mangima adier? Ooyo, ok onyal bet mangima. Enotho, nikech osetimo timbe modwanyorego duto, kendo rembe nodog e wiye owuon.

¹⁴ “Koro nyalo bet ni ng’at makamano bende nigi wuowi, mi wuowino oneno gik moko duto mane wuon otimo, to ok oluwo timbego.

¹⁵ Ok olam nyiseche manono mag jo-Israel, kendo ok ocham misengni mitimo kuonde moting’ore ma chik okwero, bende ok oterre gi mond ji.

¹⁶ Ok othir ng’ato, kendo ok omechi, bende odwoko gima osingne. Joma kech ohewo to omiyo chiemo, kendo joma wuotho duge orwako gi lewni.

¹⁷ Ok odwar timo timbe mamono, kendo ok ohol ji pesa mondo oyudie ohala, to orito chikena, kendo oluoro buchena. Kuom mano, richo mag wuon ok nomi otho, to enobed abeda mangima.

¹⁸ Wuon mare nowuondo ji, kendo omecho, bende pile notimo ni ji duto timbe mamono. Omiyo en ema notho nikech richone.

¹⁹ “To kamoro unyalo penjo niya, ‘Ere gima omiyo wuowi ok yud kum nikech richo mag wuon mare?’ To an adwoko kama: ‘Wuowi notimo gik makare kendo malong’o. Ne orito chikena, koluwogi maber, omiyo obiro bedo mangima adier.

²⁰ To mana ng’at motimo richo ema notho. Wuowi ok nyal yudo kum nikech richo mag wuon mare, to wuoro bende ok nyal yudo kum nikech richo mag wuode. Ng’at makare noyud pokne kuom timne makare, to ng’at ma timne mono noyud kum kuom timne mamono.’

Yore Nyasaye ni kare

²¹ “Ka ng’at ma timbene mono oweyo richone, mi orito chikena kendo otimo timbe makare kendo malong’o, to ok notho, to nobed mangima.

²² Richone duto nowene, mi nobed mangima nikech notimo timbe makare.

²³ Uparo ni berna ka ng’at ma timbene mono tho? Ooyo, dibedna maber mana ka oweyo richone, mi obedo mangima. An Ruoth Nyasaye ema awacho kamano.

²⁴ “To ka ng’at makare oweyo timne makare, mi odonjo e richo, kotimo timbe mamono kendo modwanyore ma joricho ema timo, to koro dobed mangima adier? Ooyo, onge timne makare kata achiel ma napar. To enotho nikech noweya, mi odonjo e richo.

²⁵ “Un uwacho niya, ‘Gima Ruoth Nyasaye timo ok ni kare.’ To koro winjuru, un jo-Israel. Un ema utimo gik ma ok ni kare, to ok an!

²⁶ Ka ng’at makare oweyo timne makare, mi odonjo e richo, motho, to otho mana nikech timbe mamono mosetimo.

²⁷ To ka ng’at ma timbene mono oweyo timo richo, mi otimo timbe makare kendo malong’o, to oreso ngimane,

²⁸ nimar ne oneno ni timbene mono, mi oweyo, omiyo ok enotho, to enobed abeda mangima.

²⁹ To kata kamano, un jo-Israel pod uwacho niya, ‘Gima Ruoth Nyasaye otimo ok ni kare.’ To ok en kamano. Un ema utimo gik ma ok ni kare, to ok an.

³⁰ “Emomiyo an Ruoth Nyasaye anyisou un jo-Israel ni abiro kumo ng’ato ka ng’ato kuomu mana maromre gi timbene. Kuom mano, weuru timbeu mamono duto mondo kik uwe richo tieku.

³¹ Adier, weuru richo duto ma usebedo ka utimo mondo ubed gi chuny manyien kod paro malong’o. Ere gima omiyo udwaro tho, un jo-Israel?

³² Ok adwar ni mondo ng’ato otho. Omiyo an Ruoth Nyasaye awacho kama: Weuru timo richo mondo ubed mangima.”