Ezekiel 13 - MUMA MALER 2015

Jonabi mag miriambo okwedi

¹ Ruoth Nyasaye nowachona niya,

² “Wuod dhano, kwed jonabi mag Israel, kendo nyis joma koro mana wechegi giwegigo ni mondo giwinj wachna.

³ An Ruoth Nyasaye awacho kama: Joma koro weche mag miriambo none malit! Ok giseneno fweny moro, to giwacho mana gima chunygi ema paro.

⁴ Yaye, jo-Israel, jonabi mau chalo mana gi bwe modak e mier mowe gundni.

⁵ Ok gidhi mondo gilos kuonde ma ohinga omukoree e piny Israel, omiyo ok ubi siro lweny, chieng’ Ruoth Nyasaye.

⁶ Fweny ma gineno ok gin madier, kendo gikoro weche mag miriambo. Giwacho ni wechego gin weche Ruoth Nyasaye, to an ne ok aorogi. To eka pod giparo ni gik ma gikoro biro timore!

⁷ An to awachonigi niya, ‘Fweny muneno ok gin madier, kendo weche ma ukoro gin miriambo. Uwacho ni gin wechena, to an pok awuoyo kodu.’

⁸ “Kuom mano, an Ruoth Nyasaye awachonigi kama: “Amon kodu nikech wecheu gin miriambo, kendo fweny ma uneno ok gin madier.

⁹ Achiegni kumou, un jonabi maneno fweny ma ok adier, kendo ma koro weche mag miriambo. Ok unubed e chokruok mar joga, kendo nyingu ok nondik kaachiel gi nying jo-Israel mamoko, bende ok unuchak udog e pinyu, mi unung’e ni an e Ruoth Nyasaye.

¹⁰ “Jonabi wuondo joga, kanyisogi ni gik moko duto dhi maber, to kara gik moko ok dhi maber ngang’! Joga osegero ohinga mayomyom, to jonabi osebiro, momwone.

¹¹ Omiyo nyis jomwonogo ni ohinga biro podho. Abiro hono koth maduong’, kendo pe madongodongo biro goye, bende yamb ahiti biro uke.

¹² Kamano ohinga nopodhi, kendo ng’ato ka ng’ato nopenj jomuonogo ni, ‘Koro ere gima muonou osetimo?’ ”

¹³ Koro Ruoth Nyasaye wacho niya, “Abiro kelo yamb ahiti, ka an gi mirima mager, mi koth maduong’ kod pe madongodongo noketh ohingano chuth.

¹⁴ Abiro muko ohinga mane gimwonono, mi lal nono, kendo mise mare dong’ e lela. Enopodh kuomu, mi onegu. Bang’e ji duto nong’e ni an e Ruoth Nyasaye.

¹⁵ “Kamano anaketh ohinga, kendo anakum joma ne omwone, ka an gi mirima mager. Eka anawachnu niya, ‘Ohinga oserumo, kaachiel gi joma ne omwone.

¹⁶ Gin e joma ne owuondo jo-Jerusalem ni gik moko duto dhi maber, to kara gik moko ok dhi maber ngang’. An Ruoth Nyasaye ema awacho kamano.’ ”

¹⁷ Ruoth Nyasaye nomedo wachona niya, “In wuod dhano, neye nyiu makoro weche mag miriambo. Kwed gima gitimono,

¹⁸ kinyisogi ni, an Ruoth Nyasaye awacho kama: Un mon, unune malit! Utwang’o ris e lwet ji duto, kendo uloso kitembni mutwang’oe yath, mondo ji oumgo wigi, eka gibed gi teko mar tieko ngima ji. To bende uparo ni ayie mondo ubed gi teko mar nego ji kata mar resogi mondo uyudgo ohala?

¹⁹ Useketho nyinga kuom joga mana ni mondo uyud cham moko sanja, kod makati matin. Unego joma ok owinjore negi. Mano e kaka uwuondo joga moyie gi wecheu mag miriambogo.

²⁰ “Emomiyo, an Ruoth Nyasaye awacho kama: Amon gi ris ma utueyo e ng’ut lwedo mondo uhimgo ji. Abiro chodogi oko e lwetu, mondo uwe joma utemo mako otony ka winyo.

²¹ Bende abiro yiecho kitembnigo matindotindo, mondo ares joga oa e tekou chuth. Eka unung’e ni an e Ruoth Nyasaye.

²² “Unyoso chuny joma kare gi miriambo, to an ok adwar mondo unyos chunygi. Bende ujiwo chuny joma timbegi mono, mi gidagi weyo timbegi mamonogo, mondo gires ngimagi.

²³ Kuom mano ok nuchak une fweny mag miriambo, kata koro weche ma wito ji! Abiro reso joga e tekou, mondo ung’e ni an e Ruoth Nyasaye.”