Ezekiel 12 - MUMA MALER 2015

Ezekiel onyiso ni ibiro tero ji e tuech

¹ Ruoth Nyasaye nowachona niya,

² “In wuod dhano, idak e kind joma jopiem. Gin gi wenge to ok ginyal neno gimoro, bende gin gi it, to ok ginyal winjo wach, nikech gin joma wigi tek.

³ “Koro in wuod dhano, tue misigo mana ka ng’at maringo tony e lweny, mondo ichak iwuoth mana godiechieng’. Nyaka iwe ji duto neni kiwuok idhi kamoro machielo. Ka gineno kidhi kamano, to kamoro dipo ka gineno ni gin joma jopiem.

⁴ Tue misigo mana ka misik ng’at ma itero e tuech nyaka itim kamano mana godiechieng’ ka gineni, to kochopo odhiambo, to we gine kiwuok ka ng’ama omak, itero e tuech. To yo ma onego iwuoggo ema:

⁵ Pow otuch e kor odi mana ka pod gineni, kendo iwuog e otuchno, kiting’o misiki.

⁶ We mondo gineni ka iketo misigo e goki, kendo ichakgo wuoth ka piny olil, kiumo wang’i ma ok inyal neno kuma idhiye. Gima itimono biro bedo siem ni jo-Israel.”

⁷ Ne atimo kaka Ruoth Nyasaye ne onyisa, mana godiechieng’no. Ne atueyo misigo mana ka ng’ama ringo tony e lweny, kendo kane piny oyuso, ne atucho kor oda gi lweta, mi aketo misika e goka, eka awuok gi e otuch, mana ka ji nena.

⁸ Kinyne gokinyi, Ruoth Nyasaye nowuoyo koda, kapenja niya,

⁹ “Wuod dhano, donge jo-Israel ma jopiemgi osepenji gima itimo?

¹⁰ Nyisgi ni an Ruoth Nyasaye awacho kama: Fweny ma anyisono wuoyo kuom jaduong’ ma jatend Jerusalem, kaachiel gi ji duto modak kuno.

¹¹ Nyisgi bende ni gima isetimono en ranyisi mar gima biro timorenigi. Enomakgi mi tergi e tuech.

¹² Jaduong’ ma jatendgi noting’ misike e goke ka piny olil, kendo noring otony, kowuok gi e otuch ma gipowone e ohinga. Enoum wang’e, kendo ok none kuma odhiye.

¹³ Anayar tonda, mi amakego. Bang’e anatere e dala mar Babulon e piny jo-Kaldea, kuma enothoye ka ok oneno dalano gi wang’e.

¹⁴ Eka anake jodonge kaachiel gi joma ng’adone rieko kod joma rite kuonde duto, mi ji nodwargi mondo oneggi.

¹⁵ “Ka asekeyogi e kind ogendini kendo e pinje man maboyo kamano, eka gining’e ni an e Ruoth Nyasaye.

¹⁶ Anawe moko manok kuomgi tony e lweny, kendo e kech gi tuoche, mondo kuonde ma gintie e kind ogendini, ging’e ni timbegi osebedo modwanyore kendo ging’e ni an e Ruoth Nyasaye.”

¹⁷ Ruoth Nyasaye nowachona bende niya,

¹⁸ “Wuod dhano, ka ichiemo kata ka imodho pi, to nyaka itetni ka gima kibaji ogoyi.

¹⁹ Nyis ogandaa duto ni an Ruoth Nyasaye awacho kama: Jo-Jerusalem ma pod odak e piny Israel biro tetni ka chiemo kata ka modho pi. Pinygi noyaki, mi dong’ nono, nikech timbe mahundu mag ji duto modak kuno osebet mang’eny.

²⁰ Mier ma tinde ji opong’o nokethi, mi pinyno lokre thim. Eka gining’e ni an e Ruoth Nyasaye.”

²¹ Wach Ruoth Nyasaye nochako obirona niya,

²² “Wuod dhano, ere gima omiyo jo-Israel goyo ngero niya, ‘Ndalo kadho mathoth, to weche mikoro ok timre.’

²³ To nyisgi ni an Ruoth Nyasaye awacho kama: Abiro tieko ngerono chuth, mi ok nochak ogoye e Israel kendo. Bende nyisgi ni kinde osechopo ma gik moko duto mane okor biro timore adier!

²⁴ Fweny mag miriambo kata koro wach mawito ji ok nochak obed e Israel kendo,

²⁵ nimar an Ruoth Nyasaye anawuo kodgi, kendo gima awacho notimre ma ok odeko ngang’. Un joma jopiemgi, unune gi wang’u ka pod ungima, ka atimo gima nasesiemou ni natim. An Ruoth Nyasaye ema awacho kamano.”

²⁶ Ruoth Nyasaye nochako owachona niya,

²⁷ “Wuod dhano, jo-Israel paro ni fweny mineno kod weche mikoro ok bi timore e ndalogi, to ni ginitimre mana bang’e achien.

²⁸ To onge wachna moro ma nodeki ngang’, kendo ni gima asewacho notimre mak orem. An Ruoth Nyasaye ema awacho kamano.”