Ezekiel 11 - MUMA MALER 2015

Okwer jodongo ma timbegi mono

¹ Roho ne oting’a malo, motera e dho Hekalu man yo wuok chieng’. Ne aneno ji piero ariyo gabich e bath dhorangach kanyo. Ji ariyo kuomgi ne Jaazania wuod Azur kod Pelatia wuod Benaya, ma jotelo mag oganda.

² Nyasaye nowachona niya, “In wuod dhano, magi e joma timbegi manono, makelo koko kod weche maricho e dalani.

³ Giwacho ni, ‘Donge ma e kinde maber mar gero udi, nikech dala Jerusalem chalo gi agulu, kendo wan wapondo e iye ka ring’o man e agulu?’

⁴ Koro wuod dhano, kwergi matek.”

⁵ Roho mar Nyasaye nolor kuoma, mi Ruoth Nyasaye nowachona mondo anyis jo-Israel niya, “Ang’eyo gima uwacho, bende ang’eyo gik ma uparo e chunyu.

⁶ Usenego ji mang’eny ahinya e dala ka, mi wang’yore opong’ gi ringre joma otho.

⁷ Kuom mano, gima an Ruoth Nyasaye awachonu e ma: Ayie ni dalani biro bedo agulu muwachono, to ang’o ma nobed ring’o? Donge mana ringre joma unegogo? Un to abiro riembou oko e dala!

⁸ Ang’eyo ni uluoro lweny, to lweny muluorono ema abiro kelonu.

⁹ Abiro riembou oko e dala, mi abolu e lwet jopinje mamoko. Aseng’adonu buch tho,

¹⁰ omiyo ibiro negou e lweny mana e pinyu uwegi mi ji duto nong’e ni an e Ruoth Nyasaye.

¹¹ Ooyo, dalani ok nobed agulu mupondoe, kendo un ok nubed ring’o manie iye. Abiro kumou kamoro amora ma untie e pinyu, eka unung’e ni an e Ruoth Nyasaye.

¹² Anakumu kamano nikech ok userito chikena kata luwo yorena, to usemana luwo chike mag ogendini mamoko mokiewo kodu.”

¹³ Kane pod akoro wach kamano, ne apo ka Pelatia wuod Benaya ogore piny motho mana gi kanyono. Ne apodho piny auma, mi akok ni, “Yaye Ruoth Nyasaye! Bende inyalo nego jo-Israel modong’ adier!”

Singruok manyien ma Nyasaye biro timo gi jo-Israel

¹⁴ Ruoth Nyasaye nowachona niya,

¹⁵ “In wuod dhano, joma odak Jerusalem wuoyo kuomi kendo kuom jou ma jo-Israel duto manie tuech, kawacho niya, ‘Joma nie tuech oter mabor ahinya, kama ok ginyal lamo Ruoth Nyasaye, to bende wan ema Ruoth Nyasaye osemiyowa pinyni.’

¹⁶ To koro in Ezekiel, nyis jou moter e tuech ni an Ruoth Nyasaye, awacho ni kata obedo ni ne akeyogi e pinje mamoko mondo gidag e kind ogendini man maboyo, to kindeni ayie mondo gilama e pinje ma gintiego.

¹⁷ Kuom mano, nyisgi ni an Ruoth Nyasaye awacho ni abiro chokogi kagologi e pinje mane akeyogie, kendo abiro dwokonigi piny Israel.

¹⁸ Ka gisedwogo to giniwit nyiseche manono ma giyudo kuno, kendo giniwe timbegi makuero.

¹⁹ Anagol kuomgi chuny matek ka lwanda ma gin-go, mi amigi chuny manyien mar luora. Adier, anamigi chuny malong’o.

²⁰ Bang’e ginirit chikena, kendo giniluw yorena duto, ka giketo chunygi. Ginibed joga, an to anabed Nyasachgi.

²¹ To anakum joma oketo chunygi kuom timbegi makuero, kendo kuom lamo nyiseche manono, mana maromre gi gik ma gisetimo. An Ruoth Nyasaye ema awacho kamano.”

Duong’ maler mar Ruoth Nyasaye owuok Jerusalem

²² Kerubi ne oyaro buombene mi ohuyo, ka tiende machalo gi mag garigo ni e bathgi, kendo ka duong’ maler mar Nyasach Israel ni malo e wigi.

²³ Eka duong’ maler mar Ruoth Nyasaye noa e dala Jerusalem, modhi ochung’ ewi got man yo wuok chieng’.

²⁴ Ne aneno e fweny ka Roho oting’a, mi odwoka Babulon ir joma nie tuech. Bang’e fwenyno nolalna nono.

²⁵ Ne anyiso joma noter e tuech gik moko duto mane Ruoth Nyasaye osenyisa.