Ezekiel 10 - MUMA MALER 2015

Duong’ maler mar Nyasaye oa e Hekalu

¹ Ne arango gik ma oyarore mane ni ewi gik mangima miluongo ni kerubigo, mi aneno gimoro e wiye machalo kom duong’ molos gi kidi ma nengone tek miluongo ni safir.

² Nyasaye nowacho ni ng’at mane orwako lewni mabeyo cha niya, “Dhiyo e kind tiende mawirore manie bwo kerubi, mondo ijow mach gi lweti. Bang’e ike majno e dala Jerusalem duto.” Eka ng’atno nodhi, ka aneno.

³ Kane odonjo kuno, ne oyudo ka kerubi ochung’ yo milambo mar Hekalu, ka bor polo opong’o laru ma iye mar Hekalu.

⁴ Duong’ maler mar Ruoth Nyasaye nosewuok moa e wi kerubi, mi odhi e dhood Hekalu. Eka bor polo nopong’o Hekalu, kendo duong’ maler mar Ruoth Nyasaye ne rieny e laru.

⁵ Kane buombe kerubigo kwadhore, to winjore koda ka e laru maoko mar Hekalu, mana ka dwond Ruoth Nyasaye Manyalo Gik Moko Duto.

⁶ Ruoth Nyasaye ne onyiso jal mane orwako lewni mabeyo cha mondo ojow mach e kind tiende mane nie bwo kerubi, eka ng’atno nodhi mochung’ e bath tielo achiel.

⁷ Achiel kuom kerubigo notero lwete e mach mane nie kindgi, mi okwanyo moko, moketo e lwet ng’at mane orwako lewni mabeyono. Ng’atno nokawo majno, mi oa.

⁸ Ne aneno ni kerubi ka kerubi nigi lwedo machalo gi lwet dhano e bwo buom ka buom.

⁹ Bende ne aneno ni nitie tielo achiel achiel e bath kerubi ka kerubi, kendo tiendego ne mil ka kite ma nengogi tek.

¹⁰ Ne gichalre giduto, kendo tielo ka tielo ne nigi tielo machielo mochung’ e chunye ariwa.

¹¹ Kane kerubigo dhiyo kamoro, to ne gidhi adhiya mak gilokore. Giduto ne giwuotho kaachiel, ka gichomo kuma gidwaro dhiye ma ok gilokore ngang’.

¹² Dendgi gi dieng’egi gi luetegi kod buombegi, kaachiel gi tiendego, ne nigi wenge mang’eny man gi teko mar neno.

¹³ Tiendego ne gin mana mago mane aneno e fweny mokwongo.

¹⁴ Kerubi ka kerubi ne nigi lela wang’e ang’wen. Mokwongo ne chalo gi lela wang’ rwath, to mar ariyo ne chalo gi lela wang’ dhano. Mar adek to ne chalo gi lela wang’ sibuor, kendo mar ang’wen ne chalo gi lela wang’ ongo.

¹⁵ Kerubigo e gik mangima mane aneno e bath aora Kebar kande. Ne gidum e kor yamo.

¹⁶ Kane gidhi, to tiendego ne dhi kodgi, bende kane giyaro buombegi mondo gihu, to tiendego bende pod ne dhi adhiya kodgi.

¹⁷ Kane gichung’, to tiendego bende ochung’, to kane gihuyo, to tiendego bende dhi kodgi, nimar kerubigo ema ne chiko tiendego.

¹⁸ Bang’e duong’ maler mar Ruoth Nyasaye ne oa e dhood Hekalu, mi odhi ewi kerubigo malo.

¹⁹ Ne giyaro buombego mi gidum ka arangogi, mi aneno ka tiendego dhi kodgi. Ne gichung’ e dhoranga Hekalu ma yo wuokchieng’, ka duong’ maler mar Nyasach Israel nie wigi malo.

²⁰ Ne ang’eyo ni gin e gik mangima mane aneno e bath aora Kebar, koting’o Nyasach Israel kobet e komduong’ne.

²¹ Kerubi ka kerubi ne nigi lela wenge ang’wen gi buombe ang’wen kod gima chalo gi lwet dhano e bwo buom ka buom.

²² Lela wengego e lela wenge mane aseneno e bath aora Kebar. Kerubi ka kerubi ne ochiko mana nyime tir, mak obaro.