Ezekiel 1 - MUMA MALER 2015

Janabi Ezekiel oneno duong’ maler mar Nyasaye e fweny

¹ Due abich, due mar ang’wen e higa mar piero adek, kane adak e bath aora Kebar kaachiel gi jo-Yahudi mane oter e tuech, polo ne oyawore, mi Nyasaye ofwenyorena.

² (Ne en due abich mar dueno, kane ruoth Jehoyachin osetieko higni abich e tuech,

³ ema ne wach Ruoth Nyasaye obiroe ni Ezekiel wuod Buzi jadolo, ka en e piny Babulon e bath aora Kebar, mi owinjo ka teko Ruoth Nyasaye olor kuome.)

⁴ An Ezekiel, ne ating’o wang’a, mi aneno yamb ahiti ka kudho koa yo nyandwat. Bende ne aneno bor polo maduong’ kod mach mamil aruya gi ler mokwake koni gi koni, to e dier majno ne nitie gimori marieny ka mula.

⁵ Bende ne aneno gik moko mangima ang’wen e iye, machalo gi dhano,

⁶ mak mana ni moro ka moro ne nigi lela wenge ang’wen kod buombe ang’wen.

⁷ Tiendegi ne oriere tir, kendo ombong’gi ne chalo gi ombong’ nyaroya, to mil ka mula moywe.

⁸ E bwo bwomb moro ka moro ne nitie lwedo machalo lwet dhano. Gigo duto kargi ang’wen ne nigi lela wenge kod buombe machal kama:

⁹ buombe ariyo mag moro ka moro noyarore, kamulo buomb jowetene koni gi koni. Kane gihuyo, to gidhi adhiya kaachiel, ma ok gilokore.

¹⁰ Moro ka moro ne nigi lela wenge ang’wen. Lela wang; ma nyime ne chalo gi lela wang dhano, to lela wang’ ma kor achwich ne chalo gi lela wang’ sibuor. To e bathe koracham ne nitie lela wang’ machalo gi mar rwath, to yoka ng’eye ne nitie moro machalo gi mar ongo.

¹¹ Moro ka moro nosiko koyaro buombene ariyo, komulogo buombe jowetene koni gi koni, to ariyo mamoko noumogo dende.

¹² Kaka ne gin gi lela wenge ang’wen moro ka moro, ne ginyalo huyo ka gichomo kamoro amora ma roho dwaro dhiye ma ok gilokore kata matin.

¹³ Ne nenore kagima mach mar mirni kata kar meny rieny e kindgi, karingo koni gi koni. Ne en mach mang’ang’ni, kendo polo ne mil e iye.

¹⁴ Gik mangimago bende ne ringo koni gi koni ka mil polo.

¹⁵ Kane arango gik mangima ang’wen-go, ne aneno tiende molworore ka mag gari, mochung’ e bath moro ka moro.

¹⁶ Tiendego ne rieny ka kidi ma nengone tek, kendo giduto ne gichalre. Nolosgi ariyo ariyo ka moro ka moro ochung’ ei wadgi ariwa.

¹⁷ Kamano kane gidhi kamoro to gidhi adhiya mak gilokore.

¹⁸ Tiende ang’wen-go ne nigi murudumbe madongo malich ma wenge man gi teko mar neno opong’o.

¹⁹ Kane gik mangimago wuotho, to tiendego bende wuotho e bathgi, kendo kane gidum gia e lowo, to tiendego bende dum.

²⁰ Ne gidhi mana kuma roho dwaro dhiye, kendo tiendego bende ne dhi kodgi, nimar roho mane nie gik mangimago ema bende ne nie tiendego.

²¹ Kane gik mangimago wuotho, kata ka gichung’, kata ka gidum gia e lowo, to tiendego bende ne timo mana kaka gitimo, nimar gik mangimago ema ne chiko tiendego.

²² Ewi gik mangimago malo ne nitie gimoro malich moyarore, ma mil mana ka pe mopedhore.

²³ To buombe ariyo mag gik mangimago ne oyarore e bwo gino, ka moro ka moro mulo buomb jowetene koni gi koni, to buombene ariyo mamoko oumo dende.

²⁴ Bende kane gihuyo ne awinjo ka buombegi kwadhore matek, machalo mana nam maduong’ ma wuo, kata jolweny mang’eny magoyo mahu, kata dwond Nyasaye Manyalo Gik Moko Duto. Kane gichung’ to buombegi ne lor piny,

²⁵ to koko ne pod winjore awinja ewi gima oyarore cha.

²⁶ Ewi gino ne nitie gimoro machalo gi kom duong’ molos gi kidi ma nengone tek, to gimoro machalo gi dhano nobet kuome.

²⁷ Gima nobet e komno ne rieny ka mula molut e mach, chakre tiende nyaka wiye, kendo ler mang’angni nolwore koni gi koni.

²⁸ To lerno ne nigi kido duto machalo gi kit lihudu manie kor polo ka koth chue. Mano e kaka duong’ maler mar Ruoth Nyasaye ne chalo!