Eklesiastes 2 - MUMA MALER 2015

¹ Ne aneno ni onego acham piny, mondo ang’ego gima mor dikelna, to ne ayudo ni mano bende mana wach manono.

² Ne afwenyo ni nyiero en mana fuwo, kendo ni mor ma kamano ok kony gimoro.

³ Kaka ne adwaro rieko ahinya ne atemo mondo ayud mor kuom madho kong’o, kendo kuom chano timo gik manono, eka afwenygo gima owinjore dhano tim kuom kinde matin ma odakgo e piny ka.

⁴ Kuom mano, ne atimo gik madongo kaka gero udi mondo adagie, kendo pidho puothe mzabibu.

⁵ Bende ne aloso puothe moko mi apidhoe kit olembe duto.

⁶ Bang’e ne akunyo yewni mondo ayud pi.

⁷ Ne ang’iewo wasumbni ma yawuowi gi ma nyiri, bende ne an gi wasumbni mamoko monywol e dalana. Ne an gi jamni moloyo ng’ato ang’ata mane osedak Jerusalem.

⁸ Bende ne achoko fedha gi dhahabu mane igolo e ut keno mag ruodhi mag pinje mane aloyo. Chwo gi mon ne werna mondo omiya mor, kendo ne an gi mon duto ma ng’ama dichwo nyalo dwaro.

⁹ Kamano ne aduong’ moloyo ng’ato ang’ata mosedak Jerusalem, kendo riekona ne okonya ahinya.

¹⁰ Ne akawo gimoro amora mane wang’a gombo, kendo ne ok aweyo gimoro mane chunya dwaro. Gik moko mane aloso nomiya mor, kendo morno ema nobet pokna.

¹¹ To bang’e ne aparo gik moko duto mane asetimo, kendo kaka ne asetiyo matek katimogi, mi afwenyo ni gin mana gik manono, machalo yamo makadho.

¹² Chutho, ruoth ok nyal timo gimoro manyien, to mana gik mane ruodhi mokwongone osetimo. Kuom mano ne achako paro ni ere tiend bedo mariek kata bedo momemore, kata bedo mofuwo?

¹³ Adier, ang’eyo ni rieko ber moloyo fuwo mana kaka ler ber moloyo mudho.

¹⁴ Ji mariek nyalo neno kuma dhiye. Joma ofuwo to ok nyal neno. To kata kamano ang’eyo bende ni waduto wachomo mana kamoro achiel.

¹⁵ Ne aparo e chunya ni gima timore ni joma ofuwo biro timore ni an bende. Kuom mano, koro onge gimoro kata achiel ma abiro yudo kuom bedo mariek. En mana thagruok kayiem nono.

¹⁶ Onge ng’ama paro joma riek kosetho, mana kaka joma ofuwo bende ok par. Wan duto wich biro wil kodwa e ndalo mabiro. Joma riek gi joma ofuwo nyaka tho duto machalre. Ee, waduto nyaka watho!

¹⁷ Kuom mano, ne achako sin gi ngima, nikech gik moko duto ma asetimo e piny ka ne ok okelona gimoro, mak mana chandruok. Giduto gin mana gik manono ka yamo makadho.

¹⁸ Ne ajok gi gik moko mane lucha ochwerie, ka atimo e piny ka, nikech ne ang’eyo ni nawegi ni ng’at moro mabiro luwo bang’a.

¹⁹ To ere ng’ama ong’eyo ka ng’at ma biro luwano nobed mariek kata mofuwo? To kata bed ni oriek kata ofuwo, to pod nokaw akawa gimoro amora ma lucha gi riekona osekelo e pinyka. Mano bende en mana gima nono.

²⁰ Kuom mano, ne achako ywago ang’e kuom tich matek duto ma asetimo,

²¹ nikech kata obedo ni ng’ato timo gimoro gi riekone gi ng’eyone kod lonyne duto, to nyaka owe gino ni ng’at moro machielo mane luche ok ochuerie. Mano bende en gima nono, kendo ma ok owinjore!

²² Ere ohala ma ng’ato yudo kuom tichne matek duto ma obarorego ndasi e piny ka?

²³ Gimoro amora motimo e ngimane duto kelone mana chuny lit gi parruok. Chunye ok nyal bedo gi kue, kata mana e seche mag otieno. Mago duto bende gin mana gik manono.

²⁴ Kuom mano, onge gima ber ma dhano nyalo timo, mak mana chiemo gi metho kod chamo mwandu moseyudo. To kata mana mano bende ne afwenyo ni wuok mana kuom Nyasaye,

²⁵ nimar ka da bed ni onge Nyasaye, to ere yo ma diyudgo gima ichamo, kata mibedogo mamor?

²⁶ Nyasaye ema miyo joge mohero rieko gi ng’eyo kod mor. Joricho to omiyo tiyo matek ka choko mwandu mana ni mondo mwandugo omi mana ng’ama ohero moloyo. Emomiyo mano bende en mana gima nono ka yamo makadho.