Eklesiastes 11 - MUMA MALER 2015

Timbe ng’at mariek

¹ Tim atima timbe ng’wono, to achien notimni ng’wono.

² Adier, pog apoga gigi ni ji mang’eny, nikech ikia gima kiny notimre kiny.

³ Ka rumbi ogingore, to nyaka koth chue. Bende kama yath opodhoe ema orieree.

⁴ Ka irito mana nyaka koth chue, to ok nichwo gimoro, kendo ka ikowo keyo akowa, to ok nike.

⁵ Gik moko duto Nyasaye ema ochueyo, bende ok inyal ng’eyo gima otimo, mana kaka ok inyal ng’eyo kaka nyathi chakore ei min.

⁶ Onego ichwo kodhi okinyi godhiambo, nikech ok ing’eyo kata gibiro twi giduto.

⁷ Ler ber, kendo oyo nyango marieny mamit bende ber.

⁸ Ka ng’ato odak aming’a to onego ogo erokamano kuom hignigo duto, koparo ni kosetho, to ndalo mudho nobed mang’eny moloyo! Kuom mano, gik moko duto mabiro gin mana kayiem nono.

Rieko ming’ado ni joma tindo

⁹ Un joma tindo, beduru mamor e ndalo ma pod utindo. Timuru gik moko duto mudwaro, kendo yuduru gik moko duto ma chunyu gombo. To kata kamano, nyaka ung’e ni Nyasaye noyalu kuom gik moko duto mutimo.

¹⁰ Kik uwe gimoro thagu, mi kelnu chuny lit, nikech bang’ kinde manok ok ubi bedo matindo kendo.