Eklesiastes 10 - MUMA MALER 2015

Paro mag fuwo

¹ Kaka lwang’ni motho nyalo ketho mo mang’ue ng’ar mi dum tik marach, e kaka fuwo matin nono bende nyalo ketho rieko maduong’.

² Pile ng’at mariek timo atima gik makare. Ng’at mofuwo to timo mana gik maricho.

³ Fupe nenore anena kata mana kowuotho e yo, omiyo ji duto ng’eyo ni en ng’at mofuwo.

⁴ Ka ruoth okecho kodi, to kik iwe tich mitiyone, nikech ka ibolori, to onyalo ng’wononi kata mana ketho madongo.

⁵ Koro nitie gima rach ma aseneno ka ruodhi timo e piny ka.

⁶ Giketo joma ofuwo e tije madongo. Joma omew to ok gidew.

⁷ Bende aseneno ka wasumbni oidho farese, to jodongo wuotho gi tiendgi ka wasumbni.

⁸ Ka ikunyo bur, to in ema inyumorie, kata ka ipowo kor ot, to in ema thuol kayi.

⁹ Ka ikunyo kite, to kite nyaka hinyi, kendo ka ibaro yien, to nyaka ihinyri kibero.

¹⁰ Ka ng’ato tong’o gi le modik, ma ok opiago, to nyaka oti kode gi muya, eka otong’ gimoro. Kuom mano, ber chano gik moko mokwongo ka pok itimo.

¹¹ Ka thuol okayi ka pok iboye, to onge ohala ma iyudo kuom ng’eyo boyo thuonde!

¹² Weche ma ng’at mariek wacho, kelone luor. Ng’at mofuwo to tiekore kende owuon gi wechene.

¹³ Ochako wuoyo gi weche mofuwo, to otieko gi weche maricho mag neko,

¹⁴ kendo owuoyo awuoya ma ok oling’! Onge ng’at ma ong’eyo gima biro timore kiny. Kose ere ng’ama nyalo nyisowa gima biro timore bang’ thowa?

¹⁵ Joma ofuwo negore gi tich nikech gionge kata mana rieko ma ginyalo ng’eyogo yo ma didwokgi dala.

¹⁶ Ka ruodh piny en ng’at ma yolo, kendo jotende galore agala e sewni otieno duto, to pinyno nigi chandruok.

¹⁷ To piny ma ruodhe tiyo gi parone owuon, bende ma jotende timo sewni mana e seche mowinjore, kendo ritore ma ok mer, ema nigi hawi.

¹⁸ Ka ng’ato nyap, ma ok nyal umo tat ode, to nyaka ot chuer, mi podhi.

¹⁹ Chiemo mabeyo miyo ng’ato bedo mamor, kendo kong’o bende miyo ng’ato winjo maber, to gigo ok yudre ka pesa onge!

²⁰ Kik ikuong’ ruoth kata mana e chunyi. Bende kik iwuo marach kuom jomwandu kata mana ka in kendi e odi mar nindo, nimar dipo ka winyo okawo wachno, motero oko.