Daniel 7 - MUMA MALER 2015

Daniel oleko ondiegi ang’wen

¹ E higa mokwongo mar loch Belshazar ruodh Babulon, an Daniel ne aleko, kendo aneno fweny gotieno. Ne andiko lekno e kitabu,

² kendo gima ne aneno gotieno chalo kama: Yamo ne kudho moa koni gi koni kendo nam noloko marach.

³ Eka ondiegi ang’wen madongo dongo man gi kido mopogore opogore nothinyore, kowuok e nam.

⁴ Ondiek mokwongo ne chalo gi sibuor, to ne en gi buom ka buomb ongo. Kane pod ang’iye, ne aneno ka buombenego opudh oko, kendo ondiegno oting’ore malo, mi ochung’ ka dhano. Eka ne omiye paro mar dhano.

⁵ Bang’e ne aneno ondiek mar ariyo, ma chalo gi dubu, kochung’ gi tiendene ma yo kachien. Ne oriwo ng’ede adek e dhoge, kendo ne awinjo ka dwol moro wachone niya, “Cham achama ring’o nyaka iyieng’ chuth.”

⁶ Kane pod ang’icho, naneno ondiek machielo machalo gi kwach. Ne en gi buombe ang’wen e dieng’eye ka mag winyo, kendo en gi wiye ang’wen! Bende ne omiye teko mar rito piny.

⁷ Bang’ mano, kane pod aleko, ne achako aneno ondiek mar ang’wen. Ne onenore malich ahinya, kendo ne en gi teko mang’eny. Bende ne en gi leke madongodongo mag chuma, kendo ne osiko ochiemo achiema konyono gimoro amora modong’ e piny. En ne ok ochal gi ondiegi adek mamoko ka, kendo ne en gi tunge apar.

⁸ To kane oyudo ang’iyo tungego, ne aneno tung’ moro matin kawuok e kind tunge mamokogo. Tung’no nomuko tunge adek mane oyudo ni kanyo chon, mondo owene thuolo. Tung’no ne nigi wenge ka mag dhano, kod dhok mawacho weche mag sunga.

⁹ Kane oyudo pod ang’icho, kombe mag loch ne oket kanyo. Eka ng’at moro machon ma nyaka nene, ne obet e kom achiel. Lepe ne tar ka pe, kendo yie wiye ne chalo gi yie rombo marachar thiriri. Kome ne en mana mach maliel, kendo ne en gi tiende motimo mach mosiko ka liel aliela.

¹⁰ Mach nodhuolore kanyo mana ka aora mamol. Ne nitie ji gana gi gana kanyo matiyone, kendo ji tara gi tara mochung’ e nyime. Eka bura nochakore, mi oyar kitepe.

¹¹ To kane pod ang’icho, ne awinjo ka tung’ matin cha pod wuoyo awuoya, kawacho weche mag sunga. Eka ne aneno ka oneg ondiek mar ang’wenno, mi owit ringe e mach, kendo owang’ morumo pep.

¹² To ondiegi adek mamoko ne ok oneg, to ne owegi kuom kinde moko moromo. To kata kamano ne omagi teko.

¹³ Kane aleko gotienono ne aneno gima chalo dhano kabiro ei boche polo, mi oter ir ng’at ma nyaka nene.

¹⁴ Eka ne oyudo teko gi duong’ kod loch mar rito piny, mondo ji manie piny ngima, bed ni gia e dhoot mane, kata giwacho dhok mane, otine. Tekone ne biro bedo mosiko, kendo lochne bende ne onge ng’ama nyalo ketho.

¹⁵ Fweny mane anenogo nobwoga, mi chunya ochandore ahinya.

¹⁶ Omiyo ne adhi ir ng’at achiel kuom joma ne ochung’ kanyo, mi apenje mondo onyisa tiend fwenygo. Eka nonyisa, kowachona niya,

¹⁷ “Ondiegi ang’wen madongogo, nyiso loch ruodhi ang’wen mabiro bet e piny.

¹⁸ To jo-Nyasaye Maduong’ Moloyo biro yudo loch mar rito piny, kendo ginisik gi lojno nyaka chieng’.”

¹⁹ Bang’ mano ne adwaro ng’eyo ngech ondiek mar ang’wen, mane kite opogore gi kit ondiegi mamokogo, kendo mane nenore malich mabwogo ji. Ne en gi leke mag nyinyo kod kogno mag mula, kendo ne osiko ochiemo achiema konyono gimoro amora modong’ piny.

²⁰ Bende ne adwaro ng’eyo ngech tung’ apar mane otwi e wiye, kendo ngech tung’ achiel mane owuok bang’e, momuko tunge mamoko adek. Tung’no ne nigi wenge, to bende ne en gi dhok mawacho weche mag sunga, kendo ne onenore maduong’ moloyo tunge mamoko duto te.

²¹ To kane pod oyudo ang’icho, ne aneno ka tung’no kedo gi jo-Nyasaye, mi oloyogi,

²² nyaka ne ng’at ma nyaka nene obiro mong’ado bura ka chwako jo-Nyasaye Maduong’ Moloyo. Kinde koro ne osechopo ma jo-Nyasaye yudoe loch mar rito piny.

²³ Eka ne onyisa kama, “Ondiek mar ang’wenno nyiso loch mar ruoth mar ang’wen ma biro bet e piny, kendo nobed mopogore gi loch mamoko duto. Enokwak piny duto, kendo nonyone piny, mokethe chuth.

²⁴ Tungene apar to nonyiso ruodhi apar ma nobed e lojno. Eka bang’e, ruoth moro nowuogi mopogore gi ruodhi mokwongogo, kendo nolo ruodhi adek.

²⁵ Enobed kowuoyo marach kuom Nyasaye Maduong’ Moloyo, kendo enothir jo-Nyasaye. Bende enotem loko chike mag dinigi kod sewni maggi, mi jo-Nyasaye nobed e bwo lochne kuom higni adek gi nus.

²⁶ Bang’ mano, bura nong’adi mi nomaye lochne duto mondo okethe chuth.

²⁷ Eka teko kod duong’ mar ruodhi duto mae piny nochiw ni jo-Nyasaye Maduong’ Moloyo. Tekogi mag loch mar rito piny nosik mochwere, kendo ruodhi duto mae piny nobed katiyonigi kendo miyogi luor.”

²⁸ Mano e giko wechego, to an Daniel ne abwok ahinya, mi denda ojuol, to ne ok anyiso ng’ato wechego.