Daniel 6 - MUMA MALER 2015

Olut Daniel e bur sibuoche

¹ Darius noneno ni ber mondo oyier jotelo mia auchiel gi piero ariyo orit pinje duto mane nie bwo lochne.

² Eka noketo Daniel kod ji ariyo mamoko obed jotend jotelogo kendo orang weche duto mag ruoth.

³ Piyopiyo nono, Daniel ne nenore ni nyalo tiyo maber ahinya moloyo jotelo kod jodongo mamoko duto. Kuom mano, ruoth noparo mondo okete jatend pinye duto.

⁴ Mano nomiyo jotelo mamoko kod jodongo otemo mondo ondhog Daniel e tichne mar rito piny. To ne ok ginyal yudo gimoro amora marach e tichne, nikech ne ne jaratiro maonge miganga.

⁵ Kuom mano, ne giwacho e kindgi giwegi niya, “Ok wabi nwang’o gimoro ma dwadonjgo ni Daniel mak mana ka en gimoro modok korka wach Nyasache.”

⁶ Omiyo ne gidhi ir ruoth, mi giwachone niya, “Ruoth Darius, mondo idag aming’a.

⁷ Wan duto ma wan jotend pinyi, wasewinjore ni onego igol chik mager ni, kuom ndalo piero adek ng’ato kik kwa gimoro kuom Nyasaye moro amora kata kuom dhano moro, to mak mana kuomi, in ruoth. To ng’ato ang’ata moketho chikno nyaka wit e bur sibuoche.

⁸ Kuom mano, ruoth wadwaro mondo igol chikno, kendo iketie sei, mondo obed achiel kuom chike mag jo-Media gi jo-Persia ma ok nyal loki.”

⁹ Kamano ruoth Darius noketo sei e chikno.

¹⁰ Kane Daniel owinjo ni oseket sei e chikno, nodhi e ode. To ewi ode ne nitie ot moro mane nigi dirise mochomo yo Jerusalem. Ei odno Daniel ne pod dhi adhiya nyime gi goyo chonge piny e dho dirisego, kolamo Nyasaye nyadidek e odiechieng’ achiel kaka ne ojatimo pile.

¹¹ Jotelogo nobiro moneno Daniel ka lamo Nyasache,

¹² mi giduto ne gidhi ir ruoth mondo gidonjne. Ne gipenje niya, “Ruoth, donge ne igolo chik ni, ng’ato ang’ata mokwayo gimoro kuom Nyasaye moro amora kata kuom dhano moro ma ok kuomi, to nyaka wit e bur sibuoche?” Ruoth nodwokogi niya, “Ee, en chik mogurore mana kaka chike moko duto mag jo-Media gi jo-Persia, ma ok nyal loki.”

¹³ Eka ne giwachone niya, “To Daniel, ma achiel kuom jo-Juda mane odar nokel ka, ok dwar winjo wachni, kendo otamore rito chik mane igolo, nikech olamo Nyasache didek e odiechieng’ achiel.”

¹⁴ Kane ruoth owinjo kamano, chunye nochandore, mi otemo dwaro yo ma doresgo Daniel, kendo nobet koparo wachno nyaka chieng’ opodho.

¹⁵ Bang’e jotelogo noduogo ire monyise niya, “Ruoth, ing’eyo ni kaluwore gi chike mag jo-Media gi jo-Persia, chik moro amora ma ruoth ogolo ok nyal loki.”

¹⁶ Mano omiyo ruoth nogolo chik, mi okaw Daniel owiti e bur sibuoche. To nowacho ni Daniel niya, “Onego Nyasachi ma itiyone gi adiera duto, resi e masirani.”

¹⁷ Bang’ mano, ne okel lwanda, mi olorgo dho burno, kendo ruoth noketoe sei mare gi mag jodonge, mondo kik ng’ato res Daniel.

¹⁸ Bang’e ruoth nodok ode, mi onindo kech, kendo kata mana morne mapile ne ok otimo, bende nindo notamore tere.

¹⁹ Nochiew huyuhuyu piny, moreto piyopiyo kodhi e bur sibuoche,

²⁰ kendo kane ochopo machiegni, ne okok ka chunye parore, kowacho niya, “Daniel, jatich Nyasaye mangima! Donge Nyasaye ma itiyone gi adiera duto oseresi e dho sibuoche?”

²¹ Daniel ne odwoke niya, “Ruoth, mondo idag aming’a!

²² Nyasaye oseoro malaikane, mi omako dho sibuoche mondo kik hinya. Osetimo kamano nikech ong’eyo ni aonge gi ketho, to bende nikech pok atimo gimoro marach e nyimi ruoth.”

²³ Kane ruoth owinjo kamano ne obedo gi mor maduong’, mi ogolo chik mondo oywa Daniel oko. Omiyo ne giywaye oko, mi oyud ni onge ngima osetime kata mana matin nono, nikech ne ogeno kuom Nyasache.

²⁴ Bang’ mano, ruoth ne ogolo chik ni mondo joma ne odonjo ni Daniel owiti e bur sibuoche kaachiel gi mondgi kod nyithindgi. To kane owitgi e bur kamano, sibuoche ne ongamogi moturo chokegi duto matindotindo, mana kapok gichopo kata e pier bur piny.

²⁵ Bang’e ruoth Darius nondiko ni ogendini duto mae piny, bed ni gia e dhoot mane, kata giwacho dhok mane, kowacho niya, “Amosou uduto gi mos mogundho.

²⁶ Asegolo chik e pinje duto manie bwo lochna ni ng’ato ka ng’ato nyaka luor Nyasach Daniel kendo miye duong’. En e Nyasaye Mangima, mosiko nyaka chieng’. Lochne gi tekone ok norum.

²⁷ En ema owaro ji kendo oreso, kendo en ema otimo honni e polo gi piny. Ne oreso Daniel e dho sibuoche.”

²⁸ Kamano Daniel ne odhi nyime maber e ndalo loch Darius, kendo e ndalo loch Kuros ja-Persia.