Daniel 5 - MUMA MALER 2015

Weche mondiki e kor ot

¹ E ndalo loch ruoth Belshazar, ne orwako jodongo alufu achiel e sawo maduong’, mi ometho kodgi.

² To kane gimetho, Belshazar nogolo chik mondo okel kikombe gi tewni mag dhahabu gi mag fedha mane Nebukadnezar kwar mare ogolo e Hekalu man Jerusalem. Nodwaro ni en gi jodonge kaachiel kod monde gi monde mamoko ometh gi gigo.

³ Kamano nokel kikombe gi tewni mag dhahabugo, mi giduto gimetho kodgi.

⁴ Kane gimetho kamano, ne gipako nyiseche molos gi dhahabu gi fedha gi mula gi nyinyo gi yien kod kidi.

⁵ Eka ne gipo ka lwet dhano othinyore, mochako ndiko kor ot, machiegni gi kama ne taya lielie. Kane ruoth oneno lwet dhano ka ndiko kamano,

⁶ ne obedo maluor, mi chunye ochandore, kendo dende ojuol ka chongene tetni.

⁷ Ne ogoyo koko mondo oomne ajuoke, kendo kane gibiro nowachonigi niya, “Ng’ato ang’ata ma nyalo somo ndikoni, mi nyisa tiende, to norwakne law ruoth maralik, kod thiwni mar dhahabu mar duong’ne e ng’ute, kendo nobed jalupna mar adek.”

⁸ Jong’ad ni ruoth rieko duto nosudo machiegni, to onge ng’ato kuomgi mane nyalo somo ndikono, kata mana nyalo nyiso ruoth tiende.

⁹ Kane ruoth Belzashar oneno kamano, luoro nomake ahinya, mi dende omedo juol marach. Jodonge bende nodhier nono.

¹⁰ Chi ruoth nowinjo koko mane ruoth gi jodonge goyo, mi odonjo e ot mitimoe sawo. Nowacho niya, “Ruoth, mondo idag aming’a. Kiyie to chunyi owe chandore, bende dendi owe juol kamano.

¹¹ Nitie ng’at moro e pinyi man gi much nyiseche maler. E ndalo loch ruoth Nebukadnezar kwaru, ng’atno ne nigi paro maber kod rieko mana ka rieko mag nyiseche, omiyo nokete jatend ajuoke duto.

¹² Ng’atno iluongo ni Daniel, mane Nebukadnezar ochako ni Belteshazar. En gi nyalo mar adier kod rieko, bende olony e tiend midhierni. Omiyo or ng’ato oluongnigo, mondo onyisi tiend wachni.”

¹³ Kamano nokel Daniel piyopiyo e nyim ruoth, mi ruoth nopenje niya, “In e Daniel ma achiel kuom jo-Yahudi mane kwara odaro e piny Juda, mokelo e tuech ka koso?

¹⁴ Asewinjo ni much nyiseche ni kuomi, kendo ni in ng’at mariek mong’eyo gik matut.

¹⁵ Aseluongo jong’ad rieko gi ajuoke mondo obi osom ndikono kendo olokna tiende to otamogi.

¹⁶ To asewinjo humbi ni inyalo fwenyo gik mopondo, kendo inyalo elo tiend midhierni. Omiyo, ka inyalo somo ndikono, mi ilokna tiende, to norwakni law ruoth maralik, gi thiwni mar dhahabu mar duong’ e ng’uti, kendo inibed jalupna mar adek.”

¹⁷ Daniel nodwoko niya, “Ruoth, bed abeda gi michnigo, kata inyalo miyogi ng’ato ang’ata mihero. An to abiro somoni asoma gima ondikno, mi anyisi tiende.

¹⁸ “Nyasaye Maduong’ moloyo noketo Nebukadnezar kwaru obedo ruoth maduong’ man gi teko kod duong’.

¹⁹ Omiyo ogendini duto mae piny ngima, bed ni gia e dhoot mane kata giwacho dhok mane, ne oluore kendo ne tetni e nyime. Kapo ni ne odwaro nego ng’ato, to onego anega, kata kane odwaro weyo ng’ato ka ngima, to oweyo aweya. Ne onyalo miyo ng’ato teko, kata mayogo tekono, mana kaka en ema ohero.

²⁰ To nikech ne odoko jasunga ma wiye tek kendo ma jakwinyo, ne omaye lochne kaachiel gi duong’ne.

²¹ Ne oriembe oa kuom ji, mi parone olokore ka paro le. Bende ne odak gi kenje manie thim, mi ochamo lum gi dhoge ka dhiang’, kendo ne onindo oko ka tho omoko kuome. To achien noyie gi Nyasaye Maduong’ Moloyo ema nigi loch e pinje duto ma e piny, kendo en ema oketo ng’ato ang’ata modwaro bedo ruoth.

²² “To in Belshazar, nyakware, ok isebolori e nyime, kata obedo ni ing’eyo gigo kamano.

²³ Kar timo kamano to isepiem gi Ruodh Polo kuom kelo kikombe gi tewni mane osegol e Hekalu mare, mi umethoe. Ee, in gi jodongi kaachiel gi mondi mamoko ne umadho divai gi gigo, kupako nyiseche molos gi dhahabu gi fedha gi mula gi nyinyo gi bao kod kidi. Gin nyiseche ma ok nyal neno, kata winjo wach, kata ng’eyo gimoro. To ne ok iluoro Nyasaye morito ngimani kaachiel gi gik moko duto mitimo.

²⁴ Mano emomiyo Nyasaye nooro lwedo mondo ondik wechego.

²⁵ “Koro magi e weche mane ondiki: KWAN, KWAN, PIM, POGRUOK,

²⁶ kendo magi e tiend weche gogo: KWAN nyiso ni Nyasaye osekwano ndalo mag lochni, mi otieko lochnino.

²⁷ PIM nyiso ni osepimi e ratil, mi oyud ni ok iromo.

²⁸ POGRUOK nyiso ni pinyi osepogi, mi omi jo-Media gi jo-Persia.”

²⁹ Kane Daniel otieko wuoyo, Belshazar nogolo chik, mi orwak ni Daniel law ruoth maralik, gi thiwni mar dhahabu mar duong’ e ng’ute. Eka nokete jalupne mar adek.

³⁰ To otieno nogo ema nonegie Belshazar ruodh Babulon,

³¹ mi Darius ja-Media okawo loch pinyno, ka en jahigni piero auchiel gariyo.