Daniel 4 - MUMA MALER 2015

Neko omako ruoth Nebukadnezar

¹ Ruoth Nebukadnezar nolando wach ni ogendini duto mae piny ngima, bed ni gia e dhoot mane, kata bed ni giwacho dhok mane. Nowachonigi niya, “Amosou gi mos mogundho.

² Koro adwaro nyisou ranyisi gi honni ma Nyasaye maduong’ moloyo osetimona.

³ “Ranyisi mag Nyasaye dongo manade! Honni motimo nigi teko malich miwuoro! Lochne osiko nyaka chieng’.

⁴ “An Nebukadnezar, noyudo adak gi kue e oda ka achamo mwanduna.

⁵ To chieng’ moro kane anindo, ne aleko lek mobwoga, mi aneno gik malich miwuoro.

⁶ Mano omiyo nagolo chik mondo jong’adna rieko duto man Babulon okel ira olokna tiend lekno.

⁷ Eka nokel ajuoke duto, mi ahulonigi lekna, to ne ok ginyal lokona tiende.

⁸ To bang’e Daniel ma bende iluongo ni Belteshazar, nodonjo. (Nyingeno oting’o nying Bel ma nyasacha.) Much nyiseche maler ni kuome. En bende nanyise leknano.

⁹ Ne awachone kama: Belteshazar, jatend ajuoke duto, ang’eyo ni much nyiseche maler ni kuomi, kendo ni ielo midhierni duto. Koro winji gima nende aleko, mondo ilokna tiende.

¹⁰ “Kane oyudo anindo, naneno yath marabora e dier piny tir.

¹¹ Yadhno nodongo adonga motundo e polo, kendo ng’ato ang’ata man kamoro amora e piny ne nyalo nene.

¹² Obokene ne beyo, kendo nonyago olemo mang’eny moromo piny ngima chamo. Le ne yueyo e tipone, winy bende ne gedo e bedene, kendo gik moko duto mangima nochamo olembene.

¹³ To kane pod aparo gima ne anenono, ne apo ka aneno malaika ma jarit ka lor a e polo.

¹⁴ Ne okok gi duol maduong’ niya, ‘Ng’ad yadhno oko, kendo ilwer bedene gi obokene, mi ike olembene, mondo le oring oa e tipone, kendo winy bende oa e bedene.

¹⁵ To iwe osiki mar tiende kochung’ e lowo, kendo itueye alwora gi nyinyo kod mula. Kamano nodong’ ei lum e pap kanyo, nimar ng’atno nyaka dag gi le e thim, kendo tho mok kuome.

¹⁶ Ok nobed gi paro mar dhano, to nobed mana gi paro mar le kuom higni abiriyo,

¹⁷ nikech mano e wach mane malaike ma jorit ong’ado mondo ji modak e piny ong’e ni Nyasaye Maduong’ Moloyo ema nigi loch kuom pinje duto mae piny. Onyalo keto ng’ato ang’ata modwaro obed ruoth, kata dabed ni en dhano adhana.’ ”

¹⁸ Kane ruoth Nebukadnezar osehulo lekne kamano, nowacho niya, “Mano e gima ne aleko. Koro in Belteshazar, nyisa tiende nimar jong’adna rieko ok nyal lokona tiende. In to ang’eyo ni inyalo lokonago, nikech much nyiseche maler ni kuomi.”

¹⁹ Kane Daniel ma nyinge moro en Belteshazar, owinjo wachno, ne obwok mi chunye ochandore ma ok onyal wacho gimoro. Ruoth nowachone niya, “Belteshazar, kik iwe chunyi chandre nikech lekno kata ne gima tiende nyiso.” Belteshazar nodwoke niya, “Ruoth dobedo maber ka lekno kod tiende odok ni wasiki!

²⁰ Nineno yath maratego kendo marabora motundo e polo, ma ng’ato ang’ata e piny ne nyalo neno.

²¹ Obokene ne beyo, kendo nonyago olemo mang’eny moromo piny duto chamo. Le ne yueyo e tipone kendo winy bende ne gedo e bedene.

²² “Ruoth, in e yadhno! Irabora kendo itegno. Tekoni osedongo mochopo e polo, kendo lochni okwako piny ngima.

²³ To bende nineno malaika ma jarit kaa e polo mowacho niya, ‘Ng’ad yadhni oko, mi ikethi, to osikine iwe kochung’ e lowo. Itueye alwora gi nyinyo kod mula, mi iwe kodong’ ei lum e pap kanyo. Kamano ng’atni mondo odag gi le e thim nyaka higni abiriyo, kendo tho omok kuome.’

²⁴ “Ruoth, koro adwaro lokoni tiend leknino. Onyiso bura ma Nyasaye Maduong’ Moloyo oseng’adoni. Ibiro riembi ia kuom ji mondo idag gi le.

²⁵ Ibiro chamo lum gi dhogi ka dhiang’ kendo ininind oko kama tho nomokie kuomi kuom higni abiriyo. Bang’e ining’e ni kara Nyasaye Maduong’ Moloyo ema nigi loch kuom piny duto mae piny, kendo onyalo keto ng’ato ang’ata modwaro obed ruoth.

²⁶ “To bende ineno ka malaika ogolo chik ni mondo osiki kochung’ e lowo. Mano nyiso ni inichak ibed ruoth kendo, ka iseyie ni Nyasaye ema nigi loch e piny ngima.

²⁷ Kuom mano, ruoth, luw gima anyisini. We timo marach, to tim maber, kendo ikech joma odhier mondo ichulgo richo misetimo. Kamano nidhi nyime maber.”

²⁸ Gigo duto notimore ni ruoth Nebukadnezar.

²⁹ Bang’ dueche apar gariyo, noyudo ruoth wuotho e tat ode, Babulon,

³⁰ mowacho niya, “Neye kaka Babulon duong’! Ne agere gi tekona awuon mondo obed dalana maduong’ kendo anyisigo tekona gi duong’na.”

³¹ Kane pok dhoge olwar, dwol nowuoyo gi e polo niya, “Ruoth Nebukadnezar, winj gima awachoni. Osemayi pinyi kawuono.

³² Ibiro riembi ia kuom ji, kendo ibiro dak mana gi le, kichamo lum gi dhogi ka dhiang’ kuom higni abiriyo. Bang’e ining’e ni Nyasaye Maduong’ Moloyo ema nigi loch kuom pinje duto mae piny, kendo ni onyalo keto ng’ato ang’ata modwaro obed ruoth.”

³³ Piyopiyo nono wechego notimore ni Nebukadnezar. Noriembe, mogole kuom ji, mi odhi ochamo lum gi dhoge ka dhiang’. Tho nomoko kuome, mi yie wiye nodongo maboyo ka yie ongo, kendo kokene bende nodongo maboyo ka kok winyo.

³⁴ To kane higni abiriyogo oserumo, an Nebukadnezar ne ang’iyo polo malo, mi parona oduogo. Ne apako Nyasaye Maduong’ Moloyo ma osiko nyaka chieng’, mi amiye duong’ gi luor, ka awacho niya, “Lochne osiko nyaka chieng’.

³⁵ Ji ma odak e piny nenore ka gima tin e nyime, bende otimo gima en ema ohero gi ogendini mag polo kod ji manie piny. Onge ng’ama nyalo mone timo gima odwaro, kata mana penje gima otimo.”

³⁶ Kane parona oduogo, to loch mar piny gi luor kod teko ne oduogna. Jong’adna rieko gi jodonga nobiro ira, mi oduogna loch mogurore moloyo mane an go mokwongo.

³⁷ To koro, an Nebukadnezar apako Ruodh Polo kendo amiye duong’, nimar gimoro amora motimo ni kare. Pile ong’ado bura kare, kendo odwoko joma sungore piny.