Chakruok 7 - MUMA MALER 2015

Pi oimo piny

¹ Ruoth Nyasaye nowacho ni Nowa niya, “Donj e yie kod joodi duto, nikech aseneno ni in kendi e ng’at makare e nyima kuom ji duto manie piny.

² Kaw le michamo machwo abiriyo gi mamon abiriyo, kod ma ok cham ariyo ariyo,

³ kaachiel gi kit winy, machwo abiriyo gi mamon abiriyo, mondo kik kitgi rum e piny.

⁴ Bang’ ndalo abiriyo abiro kelo koth e piny kuom ndalo piero ang’wen, odiechieng’ gotieno, mi anatiek gik moko duto mangima masechweyo.”

⁵ Nowa notimo gik moko duto mane Ruoth Nyasaye ochike.

⁶ Nowa ne jahigni mia auchiel kane pi opong’o piny.

⁷ Nodonjo e yie gi chiege kod yawuote gi mond yawuote mondo gikwo.

⁸ Le ka le ma dichwo gi madhako, michamo kod ma ok cham, kaachiel gi winy kod gik mamol

⁹ ariyo ariyo bende nodonjo kode e yie, kaka Nyasaye nochike.

¹⁰ To bang’ ndalo abiriyo pi nochako pong’o piny.

¹¹ Due apar gabiriyo, due mar ariyo, kane Nowa jahigni mia auchiel, sokni duto moa e nam mang’ongo manie bwo piny nomuoch, kendo dirise duto mag polo noyawore,

¹² mi koth nochue e piny kuom ndalo piero ang’wen, odiechieng’ gotieno.

¹³ Odiechiengno ema Nowa gi chiege kod yawuote adek ma nyinggi Ham gi Seth kod Jafeth, kaachiel gi mondgi, nodonjo e yie,

¹⁴ kod kit gik moko duto, kaka le gi jamni gi gik mamol kod winy.

¹⁵ Kamano Nowa nodonjo e yie gi gik mangima ariyo ariyo, ma dichwo gi madhako

¹⁶ kaka Nyasaye nochike. Eka Ruoth Nyasaye nolorone dhoot.

¹⁷ Piny notimo ataro kuom ndalo piero ang’wen, kendo yie ne lewore e wi pi.

¹⁸ Bang’e pi nomedore, kendo yie nosiko ka kwang’.

¹⁹ Pi nogingore malich, moimo gode maboyo duto.

²⁰ Kane oseimo godego, nomedo gingore maromo mita abiriyo.

²¹ Ji duto notho, kaaachiel gi gik mangima dutoi manie piny, kaka winy gi jamni gi le kod gik mamol.

²² Kamano gik moko duto mangima manie piny notho.

²³ Nyasaye ema notieko gik mangimago duto. Dhano gi jamni gi le kod winy, duto notho e piny ngima. Nowa kende gi joma ne ni kode e yie ema nokwo.

Pi mane oimo piny oduono

²⁴ Kane pi osemedo pong’o piny kuom ndalo mia achiel gi piero abich,