Chakruok 49 - MUMA MALER 2015

Jakobo okoro wach kuom yawuote

¹ Jakobo noluongo yawuote mowachonigi niya, “Biuru machiegni, mondo anyisu gik mabirom timorenu e ndalo mabiro,

² “Un yawuot Jakobo, chokreuru buta, mondo uwinji; winjuru Israel wuonu.

³ “Reuben, wuoda makayo, in e tekona, kendo kacha manyiso wuowina. In jasunga, kendo iratego moloyo yawuota duto.

⁴ Ijamwomri ka pi ohula, to ok nibed gi duong’, nikech isetimo richo gi chi wuoru. Adier, isenindo e kitandana midwanyo.

⁵ “Simeon gi Lawi gin owete. Gisetimo timbe mahundu gi gigi mag lweny.

⁶ Ok nariwra e buchegi maling’ling’ kendo ok nadonj e chokruokgi, nikech ka gikecho, to ginego ji kendo ging’ado odond ruedhi kayiem nono.

⁷ Okuong’ mirimbgi, nimar en mirima mager kendo makwiny! Anakegi e piny Jakobo duto, e kind jo-Israel.

⁸ “Juda, in ema oweteni biro paki. Inimak wasikgi gi ng’utgi, kendo oweteni nokulreni.

⁹ Juda, in nyathi sibuor. Inego le, eka idok kari midakie. Juda, ichalo sibuor moriere kendo onindo piny, maonge ng’ama hedhore chiewo.

¹⁰ Juda nomak ludh loch, kochunge e kind tiendene, kobedo ruoth nyaka wuon loch ma biro rito ogendini duto, chopi.

¹¹ En jamoko, omiyo otweyo kanje e kor mzabibu, mana e kor mzabibu mochiek makwar! Olwoko lepe gi divai makwar.

¹² Wang’e onuria ka divai makwar, kendo lake tar ka chak.

¹³ “Zebulun nodag e dho nam, kama yiedhi gowoe, kendo mbape nogik Sidon.

¹⁴ “Isakar en kanyna maratego, monindo e kind misikene.

¹⁵ Noneno ni bedo gi dala en gima ber, kendo oneno bende kaka pinyno ber, omiyo noyie ting’o misigo, modoko misumba matiyo tich matek.

¹⁶ “Dan nobed jatend joge. Kamano nochal gi dhout Israel mamoko.

¹⁷ Dan nobed ka thuol man e dier yo, thuol man gi kwiri mager, ma kayo ombong’ faras, mi ng’at moidhe podho gi ka ng’eye.

¹⁸ “A Ruoth Nyasaye, arito warruok moa kuomi!

¹⁹ “Gad, to jomecho nomonji, to noriembgi, kolawogi matek.

²⁰ “Asher nobed kachamo chiemo mamit pile. Pinye nonyag gik mabeyo moromo ruoth chamo.

²¹ “Naftali to en mwanda mae thim, manywolo nyithindo mabeyo.

²² “Josef en yath mopidh e bath thidhiya, manyago olemo mogundho kendo ma bedene lawore e kor ohinga.

²³ Jodwar nolawo Josef matek, ka gibaye gi asere,

²⁴ to Jateko ma Nyasach Jakobo noturo atungegi, kendo jakwath ma Lwanda mar Israel, nochodo leche mag ogich bedegi.

²⁵ Nyasach wuoruno, ma Nyasaye Manyalo Gik Moko Duto, mondo okonyi, kendo oguedhi gi koth moa malo, kendo gi nyithindo, kod chak ma gidhodho,

²⁶ gi cham kod maua. Gueth mag gode machon, gi gik mabeyo duto mag gode mosiko duto, mondo obi ni Josef, jal mane opog gi owetene.

²⁷ “Benjamin en ondiek ma kech kayo. Gima osenego, ochamo gokinyi. Godhiambo, to pod ong’ingo gima osemako.”

²⁸ Mago e dhoudi apar gariyo mag jio-Israel, kendo ka ne Jakobo wuon-gi oguedhogi, nomiyo moro ka moro gueth moromo kode.

Tho mar Jakobo gi yikne

²⁹ Eka Jakobo nochiko yawuote niya, “Kaka koro achiegni tho kaluwo kwerena, yikauru but kwerena e rogo man e puoth Efron ja-Hiti

³⁰ man Makpela, yo wuok chieng’ mar Mamre e piny Kanaan. Rogono Ibrahim ema nong’iewo kaachiel gi puodhono ir Efron ja-Hiti, mondo obed kar yiko joge.

³¹ Kanyo ema noyikie Ibrahim gi Sara chiege, kod Isaka gi Rebeka chiege, kendo kanyo ema nayikoe Lea.

³² Puodho kod rogo man e iye nong’iew kuom jo-Hiti.”

³³ Kane Jakobo osetieko chiko nyithinde kamano, nodwoko tiende e kitanda mi chunye nochot koluwo kwerene.