Chakruok 48 - MUMA MALER 2015

Jakobo oguedho Efraim gi Manase

¹ Kinde moro achien, Josef nowinjo ni wuon mare tuo, mi nokawo yawuote ariyo ma Manase gi Efraim, modhi nene.

² Ka ne onyis Jakobo ni Josef wuode osebiro mondo onene, nochukore mobet e kitandane.

³ Nowacho ni Josef niya, “Nyasaye Manyalo Gik Moko Duto nofwenyorena Luz e piny Kanaan, moguedha.

⁴ Nowachona ni, abiro miyi nyithindo mang’eny, mondo nyikwayi chieng’ odok ogendini mathoth, to pinyni namigi kaka mwandugi nyaka chieng’.”

⁵ Eka Jakobo nomedo wacho ni Josef niya, “Yawuoti ariyo mane inywolo Misri kapok abiro iri kaeri, ibiro kwan ka nyithinda. Adier, Efraim gi Manase biro bedo maga, mana kaka Reuben gi Simeon.

⁶ To nyithindo mibiro nywolo bang’gi ema nobed magi. Kata kamano, korka gikeni, to nokwan-gi mana kaka joka owetegi ariyo ma Efraim gi Manase.

⁷ “Kane aduogo aa Mesopotamia, nabwok malich ka ne Rahel meru othona e piny Kanaan ka pok wachopo Efrath. Ne ayike kuno but yo madhi Efrath” (Efrath iluongo bende ni Bethlehem.)

⁸ Ka ne Israel oneno yawuot Josef, nopenje ni, “Magi to ng’a gini?”

⁹ Josef nodwoke ni, “Magi e nyithinda ma Nyasaye osemiya Misri ka.” Mi Israel nowachone niya, “Yie ikelgi mondo aguedhgi.”

¹⁰ Israel koro noseti ahinya, ma wang’e oyuso ma ok onyal neno. Josef nokelo nyithinde ire, mi nokwakogi kendo onyodhogi.

¹¹ Eka Israel nowacho ni Josef niya, “Ne ok apar ni naneni kendo, to koro Nyasaye osemiyo aneno koda ka nyithindi.”

¹² Eka Josef nogolo nyithindogo e chong Israel, kendo nogoyo chonge piny, mokulore nyaka e lowo.

¹³ Josef nomako lwet nyithindo ariyogo. Noketo Efraim e bade korachwich, mondo odhi obed e bad Israel koracham; to Manase noketo e bade ma koracham mondo odhi obed e bad Israel korachwich. Eka noterogi ir Israel.

¹⁴ To Israel norieyo bade ma korachwich, moketo e wi Efraim wuowi matin, kendo bade ma koracham noketo e wi Manase wuowi maduong’.

¹⁵ Eka noguedhogi kowacho niya, “A Nyasaye, yie iguedh nyithindigi. In e Nyasaye mane Ibrahim kwara gi Isaka wuora jolamo, kendo in e Nyasaye mosetelona nyaka koroni.

¹⁶ Malaika ma oseresa e masiche duto, mondo oguedhgi. Noluonggi gi nyinga kod nying Ibrahim kwara gi nying Isaka wuora. Onego gimedre kendo gibed oganda maduong’ e piny.”

¹⁷ Ka ne Josef oneno ni wuon mare oketo lwete ma korachwich e wi Efraim, nokecho. Omiyo nogolo lwet wuon mare e wi Efraim, moketo e wi Manase

¹⁸ kowacho ni wuon niya, “Mano ok ber wuora, nimar jali ema duong’. Kuom mano, en ema onego iket lweti ma korachwich e wiye.”

¹⁹ To wuon mare nodagi, kowacho niya, “Ang’eyo mano nyathina. Manase bende biro bedo oganda maduong’, to owadgi maluwe ema nobed maduong’ moloye, kendo nyikwaye nodok ogendini mang’eny.”

²⁰ Israel noguedho nyithindogo chieng’no, kawacho niya, “Ka jo-Israel dwaro gwedho ng’ato to ginikonyre gi nyingu ka giwacho kama: ‘Nyasaye mondo oguedhi kaka oseguedho Efraim gi Manase.’ ” Kamano Israel nomiyo Efraim obedo maduong’ ni Manase.

²¹ Eka Israel nowacho ni Josef niya, “Ne! An to koro atho, to Nyasaye nobed kodu, kendo nodwoku e piny kwereu.

²² In ema amiyi lowo ma Shekem, mane amiyo jo-Amor e lweny. Kamano inibed gi puodho achiel moloyo oweteni.”