Chakruok 44 - MUMA MALER 2015

Kikombe molal

¹ Josef nochiko jaduong’ ode niya, “Ket cham e ogunde jogi kar ma ginyalo ting’o, kendo idwokni ng’ato ka ng’ato pesane kisoyo e dho ogunde.

² Bende so kikombena mar fedha ewi ogund wuowi machogo, kaachiel gi pesane.” Mi notimo kaka Josef nochike.

³ Kinyne gokinyi nogony jogo, mi ne gikawo kenjegi, kendo gimako yo madhi thurgi.

⁴ To kane pok gidhi mabor ahinya gi dala, Josef nochiko jaduong’ ode niya, “Dhiyo ilaw joka, kendo kisejukogi, to mondo ipenjgi kama: ‘Mar ang’o uchulo richo kar ber?

⁵ Ang’o momiyo usekwalo kikombena mar fedha? En e kikombe ma ruodha methogo, kendo okorogo wach. Awuoro kaka usetimo gima rach moloyo!’ ”

⁶ Omiyo kane jaduong’ od Josef ojukogi, nonyisogi wechego,

⁷ to ne gidwoke niya, “Ruoth, ere gimomiyo iwuoyo kamano? Ok ne wanyal kata mana paro timo kamano!

⁸ Kane waa Kanaan, donge nineno ka wadwokoni pesa mane wayudo e wi ogundewa? Koro ere gimomiyo dwakwal fedha fedha kata dhahabu e od ruodhi?

⁹ Ruoth, ka ng’atwa moro oyud gi kikombeno, to nyaka otho, kendo wan duto wanabed wasumbi.”

¹⁰ Nowachonigi niya, “Ber, awinjo gima uwacho, to ng’atno moyud gi kikombeno ema nyaka bed misumbana, to jomoko duto nyalo a.”

¹¹ Kuom mano ne giyieyo ogundegi piny, mi ng’ato ka ng’ato nogonyo mare.

¹² Jaduong’ od Josefno nodwero, kochako gi wuowi makayo nyaka wuowi machogo, mi noyudo kikombeno e ogund Benjamin.

¹³ Kane gineno kamano, ne giyiecho lepgi, kendo ne giyieyo kenjegi, mi gidok e dalano.

¹⁴ Juda gi owetene notundo e od Josef, mi giyudo kapod entie. Ne gigoyo chonggi piny e nyime, mi gikulore nyaka e lowo.

¹⁵ Josef nopenjogi niya, “Ang’o musetimoni? Donge nung’eyo ni ng’atno maduong’ ka an nyalo koro wach, mong’e gima usetimo?”

¹⁶ Juda nowachone niya, “Ruoth, ang’o ma dwawachi? Onge gima wanyalo timo mondo onyis ni wan joma kare, nimar Nyasaye osefwenyo kethowa. Wan duto koro wan wasumbi, ma ok mana jal moyud kikombeni kuome kende.”

¹⁷ To Josef nowachonigi niya, “Ooyo, ok anyal timo kamano. Mana jal moyud gi kikombe ema biro bedo misumbana. Jomoko kuomu modong’, to nyalo dok dala ir wuonu gi kue.”

Juda okwayo Josef mondo ogony Benjamin

¹⁸ Eka Juda nodhi ir Josef, mowachone niya, “Ruoth, yie mondo awuo kodi, kendo kik ikech koda, nikech in bende iduong’ mana kaka Farao.

¹⁹ Ruoth, nene ipenjowa ka bende wan gi wuonwa kata owadwa moro,

²⁰ mi ne wadwoki ni wan gi wuonwa ma tinde oti, kod owadwa matin monywolo koseti. To owadgi rawerano notho, kendo en kende e nyathi min mare modong’; omiyo wuon mare ohere ahinya.

²¹ Bende ne iwachonwa ni mondo wakele inene.

²² To ne wadwoki ni rawerano ok nyal pogore gi wuon, nikech kotimo kamano, to wuon mare ditho.

²³ To ruoth, niwachonwa ni ok noyienwa biro e nyimi kendo, ka ok wabiro gi owadwa machogono.

²⁴ Omiyo kane wadok dala ir wuonwa, ne wanyise kaka nisewachonwa.

²⁵ Bang’e wuonwa nowacho ni mondo waduog warund cham moko.

²⁶ To ne wadwoke ni, ‘Ok wanyal dhi, nikech kwaonge gi owadwa machogo, to ok noyienwa dhiyo e nyim ng’at cha. Omiyo wanyalo mana dhi ka wan gi owadwa machogo.’

²⁷ Wuonwa nodwokowa niya, ‘Donge ung’eyo ni chiega nonywolona mana yawuowi ariyo kende?

²⁸ Achiel kuomgi noselalna nono, kendo aparo ni adier ondiek osekidhe okidhe, nimar pok achako anene nyaka chil kawuono.

²⁹ To ka ukawo wuodani bende, mi gimoro odhi ochame, to dumi chunya chandre, mi datho, nikech aseti.’

³⁰ Emomiyo ruoth,, ka adok ir wuora nono ka aonge gi rawerani,

³¹ to gikanyono monenoe ni oonge, to enotho, nikech ngimane otuere kuom ngima rawerani. Kuom mano, ruoth, dibed ni wan ema wamiyo wuonwa otho malit, nikech oseti ahinya.

³² To bende ruoth, an ema nasingo ngimana kuom rawerani, ka anyiso wuora ni ka ok adwokonego, to nabed jaketho e nyime kuom ngimana duto.

³³ Omiyo koro ruoth, yie adong’ ka mondo abed misumbani kar rawerani. En to yie iweye, mondo odog kod owetene.

³⁴ Ere kaka dadog ir wuora nono, ka aonge kode? Ok danyal neno masira ma doyudno.”