Chakruok 40 - MUMA MALER 2015

Josef oloko lek joma otue

¹ Bang’ ndalo moko, jaduong’ jogam divai mar Farao ruodh Misri, kod jated makati mare ne joketho ni ruodhgi.

² Farao nokecho gi jotelo ariyogo,

³ mi notweyogi e od jaduong’ askeche, kama bende noyudo otueye Josef.

⁴ Jaduong askeche noketo Josef mondo oti ni ji ariyogo.

⁵ Bang’ bedo e od tuech kuom kinde moromo, jaduong’ jagam divai gi jaduong’ jated makati ne joleko lek. Nga’to ka ng’ato noleko lekne owuon, kendo lek ka lek ne nigi tiende.

⁶ Kane Josef obiro irgi gokinyi, noneno ka gikuyo,

⁷ omiyo nopenjogi niya, “Ang’o momiyo ukuyo kamano?”

⁸ Ne gidwoke ni, “Waduto nende waleko lek mopogore opogore, to onge ng’ama nyalo lokonwa tiendgi.” Josef nowachonigi niya, “Donge teko mar loko lek a mana kuom Nyasaye? Emomiyo yieuru unyisa lekugo.”

⁹ Jagam divai nonyiso Josef lekne, kowacho niya, “Nende aleko ni yadh mzabibu

¹⁰ man gi bede adek ni e nyima. To nochako loth, mogolo thiepe, kendo onyago mzabibu mochiek mana gi kanyono.

¹¹ Noyudo ka ating’o kikombe Farao e lweta, omiyo nakawo mzabibugo, mi abiyo e kikombeno, amiyo Farao.”

¹² Josef nowachone niya, “Ma e tiend leknino: Bede adek mag mizabibu nyiso ndalo adek,

¹³ to ka pok ndalo adekgo orumo, Farao biro gonyi, kendo dwoki e tiji, mi ibiro miye kikombene, kaka yande imiye kaka jagam divai mare.

¹⁴ To ka isebedo maber kamano, yie ipara, kendo imul nyinga ni Farao mondo ogola e od tuech ka.

¹⁵ Ne omaka gi thuon e piny jo-Hibrania, to bende onge gima rach ma asetimo ka, mowinjore gitueyane.”

¹⁶ Kane jaduong’ jated makati oneno tiend lek ma Josef olokono ber, nowachone niya, “An bende nende aleko kama: Atonge adek moting’o makati marachere noluwore e wiya.

¹⁷ Atonga mamalo noting’o kit chiemo duto ma jatedo loso ni Farao. To winy ne chamo chiemogo e atonga mamalono.”

¹⁸ Josef nodwoke niya, “Ma e tiend leknino: Atonge adekgo nyiso ndalo adek.

¹⁹ To kapok ndalo adekgo orumo Farao biro gonyi, to obiro ng’ado wiyi oko, kendo liero ringri e yath, mi winy biro chamo.”

²⁰ Chieng’ mar adek nobedo chieng’ nywol Farao, mi noloso nyasi ni jotichne duto. Nogonyo jaduong jogam divai gi jaduong’ joted makati, moketogi e nyim jodonge.

²¹ Nodwoko jaduong’ jogam divai e tije mar keto kikombe e lwet ruoth,

²² to nonego jaduong’ joted makati. Gigo duto notimore mana kaka Josef noselokonigi tiend lekgi.

²³ Kata kamano jaduong’ jogam divai ne ok oparo Josef, to wiye nowil kode.