Chakruok 4 - MUMA MALER 2015

Kain kod Habil

¹ Adam noriwore gi Hawa chiege, mi Hawa nomako ich, monywolo Kain. Eka nowacho niya, “Aseyudo wuowi kuom ng’wono mar Ruoth Nyasaye.”

² Bang’e nonywolo Habil omin Kain. Habil nodoko jakwath, to Kain nodoko japur.

³ Chieng’ moro Kain nokelo cham moko ma nosekayo e puothe, mochiwo ni Ruoth Nyasaye.

⁴ Habil bende nokelo jambe ma nokwong nywol. Noyang’o mochiwo bochegi ni Ruoth Nyasaye. Ruoth Nyasaye nobedo mamor gi Habil kod chiwone,

⁵ to nodagi Kain kod chiwone. Omiyo mirima nomako Kain, mokecho ahinya.

⁶ Ruoth Nyasaye nopenje niya, “Ang’o momiyo ikecho, kendo wang’i ojuol?

⁷ Kitimo maber, donge diyieni? To kitimo marach, to richo okichore e dhoodi, mondo oloyi. To in nyaka item matek mondo iloye.”

⁸ Kain nowacho ni Habil omin mare ni mondo gidhi giba, to ka ne gisedhi e thim kuma bor gi dala, nogoyo Habil monego.

⁹ Bang’e Ruoth Nyasaye nopenje niya, “Ere Habil owadu?” Kain nodwoke niya, “Ok ang’eyo. An jakwadhe ma dang’e kuma entie?”

¹⁰ Ruoth Nyasaye nopenje kendo niya, “Ang’o misetimoni? Winji! Remb owadu misechuero ywakna e lowo.

¹¹ Omiyo koro in ng’ama okuong’, kendo oriemb e lowo ma nong’amo dhoge, momadho remb owadu misechwerono.

¹² Chakre tinende, kipuro lowo, to ok nonyagni cham, kendo inibed jabayo ma onge gi kar dakne e piny ka.”

¹³ Kain nodwoko Ruoth Nyasaye niya, “Isemiya kum mohinga.

¹⁴ Iseriemba e nyimi, kendo e lowoni. Anabed jabayo ma onge kama odakie e pinyni, kendo ng’ato ang’ata moyuda nyalo nega.”

¹⁵ To Ruoth Nysaye nodwoke niya, “Ooyo, ng’at monego Kain nochulne kuor nyadibiriyo.” Omiyo Ruoth Nyasaye noketo kido moro kuom Kain ni mondo ng’at ang’ata moromo kode kik nege.

¹⁶ Eka Kain noa e nyim Ruoth Nyasaye, modhi odak e piny miluongo ni Nod, yo wuokchieng’ mar Eden.

Nyikwa Kain

¹⁷ Kain noriwore gi chiege, mi chiege nomako ich, monywolo Enoka. Eka Kain nogero dala maduong’ mochako Enoka wuode.

¹⁸ Enoka nonywolo Irad, to Irad nonywolo Mehujael. Mehujael nonywolo Methushael, to Methushael nonywolo Lamek.

¹⁹ Lamek nokendo mon ariyo, ma nyinggi Ada gi Zila.

²⁰ Ada nonywolo Jabal mane kwar jokwath modak e hema.

²¹ Ne en gi owadgi ma nyinge Jubal, mane kwar joma goyo thum gi asili.

²² To Zila chi Lameck machielo nonywolo Tubal-Kain, mane kwar jotheth mula gi nyinyo. Ne en gi nyamin mare ma nyinge Naama.

²³ Lameck nowacho ni monde niya, “Ada gi Zila, winjuru dwonda. Monda, winjuru gima adwaro wacho. Asenego ng’ato nikech nohinya. Asenego wuowi nikech nogoya.

²⁴ Ng’at ma nohiny Kain, nochulne kuor nyadibiriyo, to ng’at ma chieng’ nohinya, nochulne kuor nyadi piero abiriyo gabiriyo!”

Nyikwa Seth

²⁵ Adam nochako oriwore gi chiege, mi chiege nonywolo wuowi moro, mochako ni Seth, (tiende ni, mich,) nikech Nyasaye nosemiye wuowino kar Habil mane Kain onego.

²⁶ Seth bende nonywolo wuowi mochako ni Enos. E kindeno ema ne ji ochako luongoe Nyasaye ni Jehova ka gilame.