Chakruok 38 - MUMA MALER 2015

Juda gi Tamar

¹ E kindeno Juda noweyo owetene, modhi odak gi Hira ma ja-Adulam.

² Noyudo nyar Shua ma ja-Kanaan kuno, mokendo.

³ Nyakono nomako ich kendo nonywolo wuowi ni Er.

⁴ Nochako omako ich monywolo wuowi moro mochako ni Onan.

⁵ Eka nomako ich kendo, monywolo wuowi mar adek, mochako ni Shela. Bang’e nochung’ moweyo nywol.

⁶ Juda nonywomo ni Er wuode maduong’ nyako ma nyinge Tamar.

⁷ To timbe Er ne richo e nyim Ruoth Nyasaye, omiyo Ruoth Nyasaye nonege.

⁸ Juda nowacho ni Onan niya, “Kaw chi owadu ibedgo, kendo itimne yore duto kaka yuore, mondo ichung wi owadu.”

⁹ To Onan nong’eyo ni nyithindogo ok dibed mage, omiyo e kinde duto mane oriwore gi chi owadgino, ne oolo kothe piny, mondo kik onywol ni owadgi.

¹⁰ Gima notimono ne rach ni Ruoth Nyasaye, omiyo en bende Ruoth Nyasaye nonege.

¹¹ Bang’ mano Juda nowacho ni Tamar chi wuode niya, “Dog dalau mondo ibed kuno ka chi liel nyaka Shela wuoda bed maduong’.” Nowachone kamano nikech noluor ni dipo ka Shela wuode bende otho ka owetene. Kamano Tamar nodok dalagi.

¹² Bang’ kinde moko, nyar Shua ma chi Juda notho. Kane Juda oseloso liende, ne giwuok gi Hira ja-Adulam mosiepne, mi gidhi Timna kuma ne ing’adoe yie rombe.

¹³ To kane Tamar owinjo ni kwar mare dhi Timna, ng’ado yie rombe,

¹⁴ nolonyo lepe mag chola mi oloso dende, kendo oumo wang’e gi nanga. Eka nodhi mobet e akek yo madhi Timna. Notimo kamano nimar nong’eyo ni Shela nosebedo maduong’ to ne pok omiyego mondo okende.

¹⁵ Kane Juda onene, noparo ni en dhako ma jachode, nikech noumo wang’e.

¹⁶ Nodhi ire e dir yo kama nobetie, mowachone ni, “Bi, adwari.” To ne ok ong’eyo ni en chi wuode. Tamar nopenje niya, “Ibiro miya ang’o, kiriwori koda?”

¹⁷ Juda nodwoke ni, “Abiro oroni nyadienda moro.” To nomedo wacho niya, “Ayie gi mano, to ere gima ibiro singona kapok ioro nyadiendno?”

¹⁸ Juda nopenje gima odwaro mondo osingne, mi nodwoke niya, “Miya bonynino gi tonde kod ludhino.” Kamano nomiye gigo, moriwore kode, mi Tamar nomako ich.

¹⁹ Tamar nodok dala mi nolonyo nanga ma noumogo wang’e kendo nochako orwako lepe mag chola.

²⁰ Juda nooro osiepne ma ja-Adulam gi nyadiel, mondo oduok gik mane osingo ni dhako cha, to ne ok onyal yude.

²¹ Nopenjo joma noyudo kuno niya, “Ere dhako ma jachode ma nobet e akek yo ka?” To ne gidwoke ni, “Onge dhako ma jachode ka.”

²² Nodok ir Juda mokwere ni, “Ok ayudo dhakono, to bende joma odak kuno onyisa ni onge dhako ma jachode modak kanyo.”

²³ Juda nowachone niya, “We obed gi gik ma nasingonego, nono to nyingwa biro kethore. Asetemo orone nyadiedni, to ne ok anyal yude.”

²⁴ Bang’ dweche maromo adek, Juda nowinjo ni Tamar chi wuode osemako ich, omiyo nowacho ni, “Goleuru oko mondo owang’e.”

²⁵ To kane gigole oko, nooro ni kwar mare wach niya, “Wuon bonyni gi tolni kod ludhni ema nomiya ich. Ranggi ane ka ing’eyo wuon-gi.”

²⁶ Juda nong’eyo gigo, mowacho ni, “En ema en kare, to an ema asetimo marach, nikech nonego amiye Shela wuoda mondo okende.” Bang’ mano Juda ne ok ochako oriwore kode kendo.

²⁷ Kane sa ma Tamar onego onywolie ochopo, nofwenyo ni oting’o rude.

²⁸ To kane ochako nywol, lwet nyathi achiel nowuok, mi jacholo nomako lwedono motweyoe usi makwar, “Ma ema okwongo wuok.”

²⁹ To nyathino nodwoko lwete iye, mi owadgi machielo ema nonywol mokwongo. Jacholo nowacho niya, “Ee, kamano e kaka imwomori!” Omiyo nochake ni Perez (tiende ni, mwomruok).

³⁰ Bang’e machiegni, owadgi bende nonywol ka usi makwar otwe e lwete, mi nochak nyinge ni Zera, (tiende ni, makwar).