Chakruok 36 - MUMA MALER 2015

Nyikwa Esau

¹ Magi e joka Esau ma bende iluongo ni Edom.

² Esau nokendo nyi Kanaan ma nyinggi Ada nyar Elon ma ja-Hiti, gi Oholibama nyar Ana wuod Zibeon ma ja-Hivi,

³ kaachiel gi Basemath nyar Ishamael, ma nyamin Nebayoth.

⁴ Ada nonywolo Elifaz ni Esau, to Basemath nonywolo Reuel,

⁵ Oholibama to nonywolo Jeush gi Jalam kod Kora. Mago e yawuot Esau ma nonywolo Kanaan.

⁶ Esau nokawo monde gi yawuote gi nyige kod joode duto ma noseyudo Kanaan, mi nodhi e piny moro mabor gi Jakobo owadgi.

⁷ Nodar nimar kama ne gidakie gi Jakobo ne tin mane ok nyal romogi nikech giduto ne gin gi jamni mathoth ahinya.

⁸ Kamano Esau ma bende iluongo ni Edom nodak e piny gode mag Seir.

⁹ Magi e joka Esau ma kwar jo-Edom modak e piny gode ma Seir:

¹⁰ Chiege ma Ada nonywolo Elifaz, to chiege ma Basemath nonywolo Reuel.

¹¹ Yawuot Elifaz ne gin Teman gi Omar gi Zefo gi Gatam kod Kenaz.

¹² Elifaz wuod Esau ne nigi dhako moro ma nyinge Timna, to nonywolone Amalek. Mago e nyikwa Ada chi Esau.

¹³ Reuel to nonywolo Nahath gi Zera gi Shama kod Miza. Mago e nyikwa Basemath chi Esau.

¹⁴ To chi Esau ma Oholibama nyar Ana ma wuod Zebeon nonywolo Jeush gi Jalam kod Kora.

¹⁵ Koro magi e jodong joka Esau: Elifaz wuod Esau makayo nonywolo Teman gi Omar gi Zefo gi Kenaz

¹⁶ gi Kora gi Getam kod Amalek. Mago e nyikwa Elifaz ma nobedo jodong piny Edom. Giduto ne gin nyikwa Ada.

¹⁷ Reuel wuod Esau nonywolo Nahath, gi Zera gi Shama kod Miza. Mago e nyikwa Reuel, ma nobedo jodong Edom. Giduto ne gin nyikwa chi Esau ma Basemath.

¹⁸ Chi Esau ma Oholibama nonywolo Jeush gi Jalam kod Kora. Mago e jodongo ma chi Esau ma Oholibama nyar Ana nonywolo.

¹⁹ Jogo duto e joka Esau, ma bende iluongo ni Edom, kaachiel gi jodonggi.

Joka Seir

²⁰ Nyikwa Seir ja-Hori mane okwongo bet weg pinyno ne gin Lotan gi Shobal gi Zibeon gi Ana gi Dishon gi Ezer kod Dishan.

²¹ Mago e jodong jo-Hori ma nyikwa Seir ma norito Edom.

²² Lotan nonywolo Hori kod Heman, to bende ne en gi nyamin mare ma nyinge Timna,

²³ Shobal to nonywolo Alvan gi Manahath gi Ebal gi Shefa kod Onam.

²⁴ To Zibeon nonywolo Aya kod Ana, Ana ema noyudo sokni machuer pi maliet ka nokwayo kenje Zibeon wuon mare e thim.

²⁵ Ana nonywolo Dishon kaachiel gi Oholibama ma nyare.

²⁶ Dishon to nonywolo Hemdan gi Eshban gi Ithran kod Keran.

²⁷ Ezer to nonywolo Bilhan gi Zavan kod Akan.

²⁸ Dishan to nonywolo Uz gi Aran.

²⁹ Jodong jo-Hori ne gin Lotan gi Shobal gi Zibeon gi Ana

³⁰ gi Dishon gi Ezer kod Dishan. Mago e jodong jo-Hori, kaluwore gi dhoutgi, ma nodak e piny Seir.

Ruodhi mag Edom

³¹ Magi e ruodhi ma norito piny Edom kane jo-Israel pod onge gi ruoth.

³² Ruoth mokwongo ne en Bela wuod Beor, ma dalane niluongo ni Dinhaba.

³³ Kane Bela otho, Jobab wuod Zera ma ja-Bozra nodoko ruoth kare.

³⁴ To kane Jobab otho, Husham ja-Teman nodoko ruoth kare.

³⁵ Bang’ tho Husham, Hadad wuod Bedad nodoko ruoth kare. Hadadno ema noloyo jo-Midian e piny Moab. Dalane niluongo ni Avith.

³⁶ Kane Hadad otho, Samla ja-Masreka nodoko ruoth kare.

³⁷ Kane Samla otho, Shaul ja-Rehoboth man but aora Yufrate nodoko ruoth kare.

³⁸ To kane Shaul otho, Baal-hanan wuod Akbor nodoko ruoth kare.

³⁹ To bang’ tho Baal-hanan, Hadar nodoko ruoth kare. Dalane niluongo ni Pau, to nying chiege ne Mehetabel nyar Matred ma nyar Mezahab.

⁴⁰ Koro magi e jodong joka Esau kaluwore gi dhoutgi kod gwengegi: Ne gin Timna gi Alva gi Jetheth

⁴¹ gi Oholibama gi Ela gi Pinon

⁴² gi Kenaz gi Teman gi Mibzar

⁴³ gi Migdiel kod Iram. Jogo duto e jodong Edom, kaluwore gi gwenge mane gidakie. (Esau e kwar jo-Edom.)