Chakruok 35 - MUMA MALER 2015

Nyasaye oguedho Jakobo Bethel

¹ Nyasaye nowacho ni Jakobo niya, “Ikri idhi Bethel, mondo idag kuno, kendo igerie kendo-mar-misango ni Nyasaye mane ofwenyoreni e kinde mane iringo Esau owadu.”

² Omiyo Jakobo nowacho ni joode kod joma nodak kode niya, “Goluru nyiseche mag pinje mamoko ma un go. Pwodhreuru, kendo rwakuru lewni maler.

³ Wawuoguru wadhi Bethel kuma abiro geroe kendo-mar-misango ni Nyasaye mane okonya ka anie chandruok, kendo mosebedo koda kamoro amora madhiye.”

⁴ Omiyo ne gimiyo Jakobo nyiseche duto mag pinje moko mane gin go, kod stadi mane giketo e itgi, mi noikogi e tiend yath moro machiegni gi Shekem.

⁵ Kane Jakobo gi yawuote owuok, luoro maduong’ moa kuom Nyasaye nomako ji modak e miech pinyno, mi ne ok gilawo Jakobo gi yawuote.

⁶ Jakobo nodhi gi joge nyaka Luz, ma tinde iluongo ni Bethel, e piny Kanaan.

⁷ Nogero kendo-mar-misango kuno, kendo nochako kanyo ni Bethel, (tiende ni od Nyasaye,) nikech Nyasaye nofwenyorene kanyo ka ne oringo owadgi.

⁸ Debora mane opiro Rebeka notho, mi noyike e tiend yath manie tik got Bethel. Omiyo Jakobo nochako yedhno ni Alon-bakuth (tiende ni yath miywakie).

⁹ Nyasaye nochako ofwenyore ni Jakobo kendo, kane oseduogo oa Mesopotamia. Noguedhe,

¹⁰ kowachone niya, “Nyingi en Jakobo, to chakre kawuono ok noluongi ni Jakobo, to nyingi koro en Israel.” Kamano nochake ni Israel.

¹¹ Nyasaye nowachone kendo niya, “An Nyasaye Manyalo Gik Moko Duto. Nywol nyithindo mang’eny ibed oganda maduong’. Inibed gi nyikwayo mathoth, mi ginidok ogendini mang’eny, kendo moko kuomgi nobed ruodhi.

¹² Piny mane amiyo Ibrahim gi Isaka ema namiyi gi nyikwayi.”

¹³ Eka Nyasaye noweye kama ne osewuoyoe kodeno, modok e polo.

¹⁴ Jakobo nochungo siro kanyo, mochiwoe misango miolo piny, eka bang’e nooloe mo.

¹⁵ Nochako kanyono ni Bethel.

Tho mar Rahel

¹⁶ Ne giwuok Bethel, to kane pod gin mochwalore gi Efrath, muoch nochako kayo Rahel malit.

¹⁷ Kane muoch kaye kamano, jacholo nojiwe niya, “Kik iluor, nikech eri inywolo wuowi machielo.”

¹⁸ To kata kamano Rahel ne tho, kendo kane chunye dwaro chot, nochako nyathino ni Benoni (tiende ni wuowi ma ayudo gi chandruok.)

¹⁹ Kamano Rahel notho, moyike but yo madhi Efrath, ma tinde iluongo ni Bethlehem.

²⁰ Jakobo nochungo siro e liende ka rapar. Sirono iluongo ni Rapar Liend Rahel, kendo pod entie nyaka chil kawuono.

²¹ Eka Jakobo nodhi nyime gi wuodhe nyaka nochopo Migdal-eder, moguro hembe kuno.

Yawuot Jakobo

²² E kinde mane Israel odak e pinyno, Reuben noterore gi Bilha, ma achiel kuom mond wuon nare. Israel nowinjo wachno, mi iye owang’. Jakobo ne nigi yawuowi apar gariyo.

²³ Yawuot Lea ne gin Reuben, wuod Jakobo makayo, eka Simeon gi Lawi gi Juda gi Isakar kod Zebulun.

²⁴ Yawuot Rahel to ne gin Josef gi Benjamin.

²⁵ Yawuot Bilha jatich Rahel ne gin Dan gi Naftali.

²⁶ To yawuot Zilpa jatich Lea ne gin Gad gi Asher. Mago e yawuot Jakobo ma nonywolo Mesopotamia.

Tho mar Isaka

²⁷ Jakobo nobiro ir Isaka wuon mare mane oyudo odak Mamre machiegni gi Kiriath-arba, (ma tinde iluongo ni Hebron), kuma Ibrahim gi Isaka nodakie.

²⁸ Isaka notho ka en jahigni mia achiel gi piero aboro.

²⁹ Kamano notho moluwo kwerene ka hike oniang’. Yawuote ma Esau gi Jakobo noyike.