Chakruok 30 - MUMA MALER 2015

¹ Kane Rahel oneno ni ok onywol ni Jakobo nyithindo, nyiego nomake gi nyamin mare, mowacho ni Jakobo niya, “Miya nyithindo, nono to abiro tho!”

² Jakobo nokecho gi Rahel, mowachone niya, “Iparo ni an e Nyasaye, mosetami e nywol?”

³ Nodwoko Jakobo niya, “Kaw Bilha jatichna manyako, ibedgo, mondo onywolna nyithindo e chonga. Mano e yo ma dimi abed gi nyithindo.”

⁴ Mi nochiwo Bilha jatichne ni chwore.

⁵ Bang’e Bilha nomako ich, monywolone Jakobo wuowi.

⁶ Eka Rahel nowacho niya, “Nyasaye oseng’ado bucha maber, nikech osewinjo kwayona, momiya nyathi ma wuowi.” Omiyo nochake ni Dan (tiende ni ng’ado bura).

⁷ Bilha nomako ich kendo mi nonywolone Jakobo wuowi machielo.

⁸ Rahel nowacho niya, “Ne apiem matek gi nyamera, mi aloyo.” Omiyo nochako wuodeno ni Naftali (tiende ni piem).

⁹ Kane Lea ofwenyo ni ochung’ ok onywol, nokawo Zilpa jatichne, momiyo Jakobo.

¹⁰ Zilpa bende nonywolo ni Jakobo wuowi.

¹¹ Omiyo Lea nowacho niya, “An jahawi!” Mi nochake ni Gad (tiende ni, Hawi).

¹² Zilpa nonywolo ni Jakobo wuowi machielo,

¹³ mi Lea nowacho niya, “Mano mor manade! Koro mon biro luonga ni Omore.” Omiyo nochake ni Asha, (tiende ni, Mor).

¹⁴ E ndalo mag kayo ngano, Reuben nodhi e puodho, moyudo olemo miluongo ni mandrek, mokelo ni Lea min mare. Rahel nokwayo Lea mondo omiye mandrek mane wuode okelo.

¹⁵ To Lea nopenje niya, “Iparo ni kawo chwora en gima tin koso, mapod kendo idwaroe mana mandrek mag wuoda bende?” To Rahel nodwoke niya, “Kimiya mandrekgo, to ang’ Jakobo nonind e odi kawuono.”

¹⁶ Omiyo kane Jakobo duogo dala koa e puodho godhiambo, Lea nowuok kadhi romone, mowachone niya, “Nyaka inind e oda kawuono, nikech aseng’iewi gi mandrek mag wuoda.” Kuom mano otienono nonindo e ode.

¹⁷ Nyasaye nowinjo kwayo Lea, modwoke. Nomako ich, kendo nonywolo ni Jakobo wuowi mar abich.

¹⁸ Eka Lea nowacho niya, “Nyasaye osemiya pokna, nikech namiyo chwora jatichna.” Omiyo nochako wuode ni Isakar, (tiende ni, pok).

¹⁹ Bang’e Lea nomako ich kendo, monywolo ni Jakobo wuowi mar auchiel.

²⁰ Nowacho niya, “Nyasaye osemiya chiwo maber. Koro chwora biro gena, nikech asenywolone yawuowi auchiel.” Omiyo nochako wuodeno ni Zebulun, (tiende ni, geno).

²¹ Achien nonywolo nyako, mochako ni Dina.

²² Bang’e Nyasaye noparo Rahel nodwoko kwayone, moguedhe gi nyathi.

²³ Nomako ich, monywolo nyathi ma wuowi. Eka nowacho niya, “Nyasaye osegolona wichkuot ma nyocha an go.” Omiyo nochako wuodeno ni Josef, (tiende ni golo kata medo). Nowacho niya,

²⁴ “Mad Ruoth Nyasaye medna wuowi machielo.”

Winjruok mar pok ma Jakobo otimo gi Laban

²⁵ Kane Rahel osenywolo Josef, Jakobo nowacho ni Laban niya, “We mondo adog thurwa.

²⁶ Miya monda gi nyithinda ma omiyo asebedo ka atiyoni.”

²⁷ Laban nodwoke niya, “Yie awachie. Aneno ni asemew, kendo Ruoth Nyasaye oseguedha nikech in.

²⁸ Omiyo nyisa pok monego achuli.”

²⁹ Jakobo nodwoke niya, “Ing’eyo kaka asetiyoni, kendo kaka jambi osenywolore ka aritogi.

³⁰ Kane abiro, jambi ne nok, to koro gisemedore ahinya, kendo Ruoth Nyasaye oseguedhi e yoreni duto nikech an. Donge koro en kinde ma an bende onego apidhie jooda?”

³¹ Laban nopenje ni, “Onego achuli ang’o?” To Jakobo nodwoke ni, “Ok adwar mondo imiya gimoro, to mak mana kiyie timo gima adwaro, eka pod abiro medo bedo jakwadhi.

³² Kawuono abiro wuotho ei jambi duto, mondo awal rombe maratenge, gi diek marang’eye, kod maraboge, obed yorgi. Ma e pok ma adwaro.

³³ To bang’e inyalo neno ane kaka asebedo jaadiera. Ka ibiro nono jamba, mineno ka an gi diel moro ma ok rabok kata rang’ech, kata rombo ma ok rateng’ to kara mano nobed gima okwal.”

³⁴ Laban nodwoke ni, “Ber! Wabiro timo kamano.”

³⁵ To chieng’no Laban nogolo nywogi maraboge kod marang’eye, gi nyibuche ma aboge kod ma ang’eye kata man gi kido motono marachar rachar, kaachiel gi rombe maratenge. Jamnigo duto nomiyo yawuote,

³⁶ modhi kodgi mabor moromo wuodh ndalo adek, koa kuma ne Jakobo nitie. To Jakobo nodong’ ka kwayo jamb Laban mamoko.

³⁷ Eka Jakobo nokawo kete moko mag yien mopogore opogore, mi nopoko kuonde moko e korgi, mondo igi marachar onen.

³⁸ Nochungo ketego but mberni ma jamni modhoe, mondo jamni ochomgi tir ka modho, nikech kanyo ema ne thuondi luwogie.

³⁹ Omiyo kane oluwgi e nyim ketego kamano, to ne ginywolo nyithindo maraponde gi marang’eye kod maraboge.

⁴⁰ To bang’e Jakobo nopogo imbe, mi oweyo mana mago maraponde gi maratenge mondo oluw romb Laban. Mano e yo mane omedogo jambe owuon, mi ne ok oriwogi gi mek Laban.

⁴¹ Kane iluwo swinni motegno, Jakobo ne keto ketego e nyimgi, but mberni ma gimodhoe, ni mondo igi opong’ e nyim ketego.

⁴² To ne ok oketo ketego e nyim swinni moyomno. Omiyo diek moyomno nodong’ ni Laban, to motegno nobedo mag Jakobo.

⁴³ Piyopiyo nono Jakobo nodoko jamoko miwuoro. Ne en gi jamni mang’eny gi ngamia kod kenje, kaachiel gi wasumbini ma chuo gi mamon.