Chakruok 3 - MUMA MALER 2015

Dhano odonjo e richo

¹ Thuol ne riek moloyo le duto mane Ruoth Nyasaye osechueyo. Nopenjo dhako niya, “Bende en adieri ni Nyasaye nowacho ni kik ucham olemb yath moro amora manie puodhoni?”

² Dhako nodwoke niya, “Wanyalo chamo olemb yien duto manie puodho,

³ to mak mana olemb yath manie dier puodho ema ok wanyal chamo. Nyasaye nokwerowa ni kik wacham olemb yadhno, kendo kik wamule, nimar kwatimo kamano, to wanatho.”

⁴ Thuol nodwoke niya, “Ngang’! Ok unutho.

⁵ Nyasaye nowacho kamano nikech ong’eyo ni ka uchame to wang’u noyepi, mi unubed machal kode, kendo unung’e ber gi rach.”

⁶ Dhako noneno ni olemb yadhno ber chamo, kendo lombo wang’, mi noparo kaka onyalo miyo ng’ato doko mariek. Kuom mano, nopono olembe moko mochamo. Chwore bende nomiyo moko, mochamo.

⁷ Kane gisechamo olembego wengegi noyepo mi ne gifwenyo ni gin duge. Omiyo ne gitwang’o oboke, mi gigeng’orego.

⁸ Adam gi chiege nowinjo Ruoth Nyasaye kawuotho e puodho kar ang’ich welo, mi ne gipondone e yien manie puodho.

⁹ To Ruoth Nyasaye noluongo Adam, mopenje niya, “In kanye?”

¹⁰ Adam nodwoke niya, “Aye awinjo kiwuotho e puodho, to luoro nomaka, mi apondo, nikech an duk.”

¹¹ Nyasaye nopenje niya, “Ng’a monyisi ni in duk? Koso isechamo olemo mane akweri ni kik icham?”

¹² To Adam nodwoke niya, “Dhako mane imiya mondo okonya, ema nomiya olemo mondo acham, mi nachamo.”

¹³ Eka Ruoth Nyasaye nopenjo dhako ni, “Ang’o momiyo nitimo kamano?” Nodwoke niya, “Thuol ema nowuonda, machamo olemono.”

¹⁴ Eka Ruoth Nyasaye nowacho ni thuol niya, “Gima isetimoni, omiyo okuong’i moloyo jamni duto, kendo moloyo le duto. Inilag gi bund iyi, kendo inicham lowo, ndalo duto mag ngimani.

¹⁵ Anaket sigu e kindi gi dhako, kendo e kind kothi gi kothe. Nyikwaye noto wiyi, to in nika ofunj tiendgi.”

¹⁶ Eka nowacho ni dhako niya, “Anamedni chandruok ka in gi ich, kendo muoch nokayi kinyuol. Kata kamano inigomb mondo ibed gi chwori, to enobed ng’ama chiki.”

¹⁷ Eka Nyasaye nowacho ni Adam niya, “Okuong’ lowo nikech in, nimar niwinjo gima chiegi nowachoni, michamo olemo mane akweri ni kik icham. Koro inibed kitiyo matek, kuom ngimani duto, mondo lowo onyagni chiemo.

¹⁸ Enonyagni kuthe gi riegni kod buya, kendo inicham mana alote mae thim.

¹⁹ Inicham kuon gi luya, nyaka idog e lowo, nikech kanyo ema ne ogolie. In lowo, kendo lowo ema nidogie.”

²⁰ Adam nochako chiege ni Hawa, nikech ne en min ji duto.

²¹ Ruoth Nyasaye noloso ni Adam gi chiege lewni mag pien, morwakogigo.

²² Eka Ruoth Nyasaye nowacho niya, “Koro dhano osedoko machal kodwa, nikech oseng’eyo ber gi rach. Kik yiene mondo ocham olemb yadh ngima, nimar dipo kobet mangima nyaka chieng’.”

²³ Kuom mano, Ruoth Nyasaye noriembe e puoth Eden, motere mondo odhi opur lowo mane osechweyego.

²⁴ Kamano noriembo dhano, mi noketo gik moko machalo gi malaika miluongo ni kerubi kaachiel gi ligangla mamil kendo rundore koni gi koni, yo wuokchieng’ mar puoth Eden, mondo ogeng’ ni ji madwaro dhi but yath mar ngima.