Chakruok 29 - MUMA MALER 2015

Jakobo tiyo ni Laban mondo okend Rahel

¹ Jakobo nodhi nyime gi wuodhe nyaka nochopo e piny man yo wuokchieng’.

² Nopo koneno soko e pap ka kweth adek mag rombe onindo e dire. Sokono ema ne jamni modhoe, to ne nitie kidi maduong’ ahinya e dhoge,

³ ma jokwath ne ng’ielo oko mondo gimi jambgi pi. To kane jamni osemodho, eka jokwath ne dwoko kidino ewi soko.

⁴ Jakobo nopenjogi niya, “Osiepena, ua kanye?” Ne gidwoke ni, “Waa Harran”

⁵ Eka nopenjogi ka ging’eyo Laban ma nyakwar Nahor, mi ne gidwoke ni ging’eye.

⁶ Nomedo penjogi niya, “Ongima?” Ne gidwoke ni, “Ongima, kendo Rahel ma nyare ero biro gi jambe.”

⁷ Jakobo nowacho nigi niya, “Piny pod chon, kendo sa mirwakoe jamni podi. Dak umodhgi, mondo utergi e lek?”

⁸ Ne gidwoke niya, “Ok wanyal timo kamano kapok jokwath duto ochokore mi wang’ielo kidi man e dho soko oko mondo jamni omodhi.”

⁹ To kane pod Jakobo wuoyo kodgi, Rahel nochopo gi jamb wuon mare, nimar en ema ne en jakwadhgi.

¹⁰ Kane Jakobo oneno Rahel ka ni gi jamb Laban ner mare, nodhi mong’ielo kidi mani dho soko, mi nomiyo jamb Laban pi.

¹¹ Eka nonyodho Rahel, kendo oywak.

¹² Nowachone niya, “An wuod Rebeka, ma nyamin wuoru!” Gikanyono Rahel noringo monyiso wuon mare.

¹³ To kane Laban owinjo ni Jakobo wuod nyamin obiro, nodhi piyopiyo mondo oromne. Nokwake monyodhe, eka nokele dala, bang’e Jakobo nonyiso Laban gik moko duto mane osetimore,

¹⁴ mi Laban nowachone niya, “Adier in remba.” Kamano Jakobo nobet kode kuom due mangima.

¹⁵ Bang’e Laban nowacho ni Jakobo niya, “Ok owinjore itina nono mana nikech in watna, omiyo nyisa gima onego achuli.”

¹⁶ To Laban ne nigi nyiri ariyo. Nyako maduong’ ne nyinge Lea, to matin ne Rahel.

¹⁷ Lea ne ok jaber gi ka wang’e, to Rahel ne nigi chia, kendo nojaber.

¹⁸ Jakobo nohero Rahel, omiyo nowacho ni Laban niya, “Abiro tiyoni kuom higni abiriyo mondo imiya Rahel nyari.”

¹⁹ Laban nodwoke niya, “Ber ka amiyigo, moloyo miye ng’at machielo, omiyo bed koda.”

²⁰ Jakobo notiyo ni Laban kuom higni abiriyo mondo okend Rahel, to hignigo duto nochalone mana ka ndalo moko manok, nikech nohero Rahel ahinya.

²¹ Jakobo nowacho ni Laban niya, “Asetieko ndalo mane iketona, omiyo koro miya nyari obed chiega.”

²² Kuom mano Laban notimo nyasi, moluongo jogweng’no duto.

²³ To gotienono nomiyo Jakobo mana Lea kar Rahel mi Jakobo nokende.

²⁴ Bende Laban nokawo Zilpa jatichne manyako, momiyo Lea mondo obed jatichne.

²⁵ Kinyne gokinyi, Jakobo nofwenyo ni kara Laban nomiye mana Lea, omiyo nopenjo Laban niya, “Ang’o momiyo isetimona kama? Natiyoni mondo imiya Rahel. Koro ang’o momiyo isewuonda?”

²⁶ To Laban nodwoke niya, “Thurwa ka nyako matin ok kwongni maduong’ dhi tedo.

²⁷ Rit arita nyaka watiek juma mar nyasini eka abiro miyi Rahel, kiyie tiyona kuom higni abiriyo mamoko.”

²⁸ Jakobo noyie gi wachne, motieko jumb nyasi mar kend Lea.

²⁹ Eka Laban nomiye Rahel nyare, kendo nokawo Bilha jatichne manyako, momiyo Rahel mondo obed jatichne.

³⁰ Kamano Jakobo nokendo Rahel bende, mi nohere moloyo Lea. Bang’ mano notiyo ni Laban kuom higni abiriyo moko.

Nyithind Jakobo

³¹ Kane Ruoth Nyasaye oneno ni Lea ok oher, noguedhe gi nyathi, to Rahel ne ok nywol.

³² Lea nomako ich, monywolo nyathi ma wuowi. Nowacho niya, “Ruoth Nyasaye oseneno chandruokna, kendo koro chwora biro hera.” Omiyo nochako wuodeno ni Reuben, (tiende ni Nyasaye oseneno chandruokna.)

³³ Nochako omako ich monywolo wuowi moro. Nowacho niya, “Ruoth Nyasaye osemiya wuowi machielo, nimar nowinjo ka chwora ok ohera.” Kuom mano nochake ni Simeon, (tiende ni, winjo.)

³⁴ Nomako ich kendo, monywolo wuowi mar adek. Nowacho niya, “Koro chwora biro padore kuoma, nimar asenywolone yawuowi adek.” Mi nochake ni Lawi, (tiende ni padruok.)

³⁵ Bang’e nochako omako ich, monywolo wuowi moro kendo. Nowacho niya, “Koro apako Ruoth Nyasaye.” Omiyo nochake ni Juda, (tiende ni, pak). Bang’ mano nochung’ moweyo nywol.