Chakruok 28 - MUMA MALER 2015

¹ Isaka noluongo Jakobo, moguedhe kendo osieme niya, “Kik ikend nyar jo-Kanaan,

² to dhiyo Mesopotamia piyopiyo e dala Bethuel kwaru mondo ikend nyar Laban neru.

³ Nyasaye Manyalo Gik Moko Duto oguedhi, kendo omiyi nyithindo mang’eny, mondo chieng’ moro idok wuon ogendini mathoth.

⁴ Onego oguedhi kendo oguedh nyikwayi kaka noguedho Ibrahim, mondo ikaw piny ma koro idakie. En e piny mane Nyasaye omiyo Ibrahim.”

⁵ Kamano Isaka nooro Jakobo Mesopotamia ir Laban wuod Bethuel ja-Aram. Labanno ne owadgi Rebeka ma min Jakobo gi Esau.

Esau okendo dhako machielo

⁶ Esau koro nong’eyo ni Isaka oseguedho Jakobo kendo oseore Mesopotamia mondo odhi okend kuno. Nowinjo bende ni kane Isaka guedho Jakobo, nosieme ni kik okend nyar Kanaan.

⁷ Bende nong’eyo ni Jakobo nowinjo wach wuon mare gi min mare, mi nosedhi Mesopotamia.

⁸ Kamano Esau nofwenyo ni kara Isaka wuon mare ne ok ohero nyi Kanaan.

⁹ Omiyo nodhi ir Ishmael wuod Ibrahim, mokendo Mahalath, nyar Ishmael ma nyamin Nebayoth.

Lek ma Jakobo oleko Bethel

¹⁰ Jakobo nowuok Beersheba kochomo Harran.

¹¹ Nochopo kamoro mobworoe nikech chieng’ nosepodho, nonindo kanyo koteno wiye gi kidi moro ma nokwanyo kanyo.

¹² To konindo, noleko ni oneno raidhi mochung’ koa e piny, mochopo e polo. To malaika mag Nyasaye ne luwo raidhino, kaidho malo, kendo kalor piny.

¹³ Bende noneno Ruoth Nyasaye kochung’ bute, ka wachone niya, “An e Ruoth Nyasaye, ma Nyasach Ibrahim kwaru, kendo Nyasach Isaka, piny minindoeni abiro miyi gi nyikwayi.

¹⁴ Nyikwayi nobed mang’eny ka lowo. Gininya malach kendo ginilandre koni gi koni, mi dhoudi duto mae piny nokwa mondo oguedhgi kaka aseguedhi gi nyikwayi.

¹⁵ Anabed kodi, kendo anariti kamoro amora midhiye, nyaka adwoki e pinyni. Ok naweyi ka pok atimoni gima asewachoni.”

¹⁶ Eka Jakobo nochiew mowacho niya, “Adier, kara Ruoth Nyasaye nika, to ok ang’eyo!”

¹⁷ Luoro nomake, mowacho niya, “Ma kama lich manade! Nyaka bed ni en od Nyasaye, kendo ranga polo.”

¹⁸ Jakobo nochiew gokinyi mang’ich. Nokawo kidi ma notenogo wiyeno, mi ochunge ka siro moolo kuome mo, kochiwe ni Nyasaye.

¹⁹ Nochako nying kanyo ni Bethel (tiende ni od Nyasaye.) To e kinde mokwongo dalano niluongo ni Huz.

²⁰ Eka Jakobo nokuong’ore ka wacho ni Ruoth Nyasaye niya, “A Ruoth Nyasaye, ka inibed koda, kendo ka initelna e wuodha, kimiya chiemo gi lewni,

²¹ mi aduog maber e dalawa, eka nibed Nyasacha,

²² kendo kidi ma asechungo ka sironi nobed odi. Bende anamiyi achiel kuom apar mag gik moko duto mimiya.”