Chakruok 25 - MUMA MALER 2015

Nyikwa Ibrahim ma joka Ketura

¹ Ibrahim nokendo dhako machielo ma nyinge Ketura.

² Dhakono nonywolone Zimran gi Jokshan gi Medan gi Midian gi Ishbak kod Shua.

³ To Jokshan nonywolo Sheba gi Dedan. Nyikwa Dedan ne gin jo-Ashur gi jo-Letush kod jo-Leum.

⁴ To Midian nonywolo Efa gi Efer gi Hanok gi Abida kod Eldaa. Jogo duto ne joka Ketura.

⁵ Ibrahim nosemiyo Isaka mwandune duto,

⁶ to kane pok otho, nopogo ni yawuot monde mamoko chiwo. Eka nodarogi, mondo gidag mabor gi Isaka wuode, mi gidhi e piny man yo wuokchieng’.

Tho mar Ibrahim gi yikne

⁷ Ibrahim notieko higni mia achiel gi piero abiriyo gabich,

⁸ mi notho moluwo kwerene, koseti ahinya, kendo ka hike oniang’.

⁹ Yawuote ma Isaka kod Ishmael noyike but Sara chiege e rogo man Makpela e puoth Efron wuod Zohar ja-Hiti mane ni yo wuokchieng’ mar Mamre.

¹⁰ Mano e puodho mane Ibrahim ong’iewo kuom jo-Hiti.

¹¹ Bang’ tho Ibrahim, Nyasaye noguedho Isaka wuode, mane oyudo odak but soko miluongo ni Beer-lahai-roi.

Joka Ishmael

¹² Ishmael ne wuod Ibrahim mane Hagar nyar Misri jatich Sara onywolone.

¹³ Yawuot Ishmael, kaluwore ne gin: Nebayoth, wuode makayo, eka Kedar gi Abdeel gi Mibsaim

¹⁴ gi Mishma gi Duma gi Musa

¹⁵ gi Hadad gi Tema gi Jetur gi Nafish kod Kedema.

¹⁶ Mago e yawuot Ishmael, ma nyinggi nochak miechgi kod kuonde mane gibworoe. Ne gin ruodhi apar gariyo, ng’ato ka ng’ato gi ogandane.

¹⁷ Ishmael notho moluwo kwerene ka ne en jahigni mia achiel gi piero adek gabiriyo.

¹⁸ Nyikwaye nodak e piny manie kind Havila gi Shur, yo wuokchieng’ mar Misri e yo madhi Asuria. Kamano ne gidak mochwalore gi owetegi ma joka Isaka.

Nywol Esau gi Jakobo

¹⁹ Ma e sigand Isaka wuod Ibrahim.

²⁰ Ne en jahigni piero ang’wen kane okendo Rebeka nyamin Laban wuod Bethuel ja-Aram ma nodak e piny Mesopotamia.

²¹ Rebeka nodak aming’a kapok onywol, omiyo Isaka nolamone Ruoth Nyasaye mondo oyud nyathi. Ruoth Nyasaye nowinjo kwayone, mi Rebeka nomako ich.

²² Kane Rebeka owinjo ka nyithindo tugo e iye, nowacho niya, “Gima timorenani, tiende ang’o?” Omiyo nodhi penjo Nyasaye tiend wachno.

²³ Ruoth Nyasaye nodwoke niya, “Ogendini ariyo nie iyi, to ogendinigo biro pogore. Achiel nobed ratego moloyo wadgi, kendo maduong’ noti ni matin.”

²⁴ Kane Rebeka onywol, noyud ni kara noting’o rude adier.

²⁵ Wuowi mane okwong nywol ne kwar, kendo dende ne chalo gi nanga marayier, omiyo ne gichake ni Esau (tiende ni, rayier).

²⁶ Gikanyono owadgi Esau nowuok ka lwete omako ofunj tiend Esau, mi nochake ni Jakobo (tiende ni ofunj tielo). Isaka nonywolo yawuotego ka en jahigni piero auchiel.

Esau owilo duong’ne mar nywol gi Jakobo

²⁷ Kane gidoko joma dongo, Esau nobet jadwar ma jaganga, kendo ng’at ma jathim. Jakobo to ne japur, kendo ne dong’ dala.

²⁸ Isaka nohero Esau nikech ring le mane Esau kelone ochamo. Rebeka to ne ohero Jakobo.

²⁹ Chieng’ moro, kane Jakobo tedo ogira, Esau nobiro ire koa dwar e thim.

³⁰ Nodenyo ahinya, omiyo nowacho ni Jakobo niya, “Kech nega! Miya gima kwarno acham.” (Mano emomiyo nochak Esau ni Edom, tiende ni gima kwar.)

³¹ To Jakobo nodwoke niya, “Abiro miyigo mana kimiya duong’ni mar nywol.”

³² Esau nowachone niya “Duong’ mar nywol to biro konya gang’o, ka kech nega kama?”

³³ To Jakobo nodwoke niya, “Kuong’rina mondi, ni ibiro miya duong’ni mar nywol.” Mi Esau nokwong’orene, momiye duong’ne mar nywol.

³⁴ Eka Jakobo nomiye kuon kod ogich ng’or. Kane Esau osechiemo, nowuok, modhi. Kamano e kaka nojwang’o duong’ne mar nywol.