Chakruok 23 - MUMA MALER 2015

Tho mar Sara: Ibrahim ong’iewo kar yiko

¹ Sara nodak higni mia achiel gi piero ariyo gabiriyo.

² Bang’e notho Kiriath-arba, ma tinde iluongo ni Hebron, manie piny Kanaan. Ibrahim nodonjo e hembe moywage.

³ Bang’e nowuok moweyo ringre Sara kanyo. Nodhi mowacho ni jo-Hiti ma weg pinyno niya,

⁴ “An mana wendo, kendo jadak e kindu. Yieuru umiya lowo moromo kar yiko, mondo ayikie ng’ata e yo mowinjore.”

⁵ Ne gidwoke niya,

⁶ “Jaduong’, winji. In ng’at maduong’ e dierwa. Yik ayika ng’ati e burwa moro maber miyiero. Onge ng’ato kuomwa ma dituoni kare mar yiko, kata madimoni yiko ng’ati.”

⁷ To Ibrahim nochung’ mokulore e nyimgi,

⁸ mowachonigi niya, “Ka uyie ni mondo ayik ng’ata kaka owinjore, to yieuru ukwana Efron wuod Zohar

⁹ mondo oyie omiya rogo man Makpela e giko lope. Ayie chule nengo mowinjore e nyimu ka, mondo obed kara mar yiko.”

¹⁰ Noyudo ka Efron owuon obet piny gi jo-Hiti wetenego. Nodwoko Ibrahim e nyim ji duto mane ni kode e dhorangach niya,

¹¹ “Ooyo ruoth, amiyi lowono duto, kaachiel gi rogo man kanyo. Amiyigo e nyim jowagi duto, mondo iyike ng’ati motho.”

¹² To Ibrahim nokulore kendo e nyimgi,

¹³ mowacho ni Efron ka ji duto winjo, niya, “Erokamano, to winj gima akwayo. Adwaro ng’iewo lowono gi nengo mowinjore kode. Omiyo yie ikaw pesana, mondo ayik ng’ata kanyo.”

¹⁴ To Efron nodwoko Ibrahim niya,

¹⁵ “Jaduong’ nengo lowono oromo nus kilo mar fedha, to mano ok owinjore thagwa.”

¹⁶ Ibrahim noyie gi nengo mane Efron osegoyo e nyim jo-Hiti, mi nomiye nus kilo mar fedha. Nopimogi gi rapim mane jolok ohala tiyogo.

¹⁷ Mano e kaka puoth Efron mane ni Makpela yo wuokchieng’ mar Mamre, kaachiel gi rogo kod yien duto mane ni e puodhono, nodoko mag Ibrahim.

¹⁸ Jo-Hiti duto mane nie dhorangach nobedo joneno kuom wachno.

¹⁹ Bang’ mano, Ibrahim noyiko Sara chiege e rogono.

²⁰ Kamano puodho kod rogo mane ni kanyo nodoko kar Ibrahim mar yiko.