Chakruok 21 - MUMA MALER 2015

Nywol mar Isaka

¹ Ruoth Nyasaye noguedho Sara kaka nosesingore,

² mi Sara nomako ich, monywolo ni Ibrahim wuowi, ka Ibrahim osedoko moti. Nonywole mana e ndalo mane Ruoth Nyasaye osechiko.

³ Ibrahim nochako nyinge ni Isaka (tiende ni nyiero).

⁴ Kane osetieko ndalo aboro, Ibrahim notere nyangu, kaka Ruoth Nyasaye nosechike.

⁵ Ne en jahigni mia achiel kane onywol Isaka wuode.

⁶ Sara nowacho niya, “Nyasaye osemiya gimomiyo anyiero, kendo ng’ato ang’ata mowinjo nokonya nyiero!”

⁷ Eka nowacho kendo niya, “Ng’ama dine nyis Ibrahim ni Sara didhodh nyathi? To koro eri osenywolo ne wuowi ka en ng’ama oti.”

Ibrahim oriembo Hagar gi Ishmael

⁸ Nyathino nodongo, kendo chieng’ ma noweyoe dhoth, Ibrahim notimo nyasi maduong’.

⁹ Chieng’ moro Sara noneno Ishmael mane Hagar nyar Misri onywolo gi Ibrahim ka jotugo gi Isaka wuode.

¹⁰ Omiyo nowacho ni Ibrahim niya, “Riemb dhako ma jatichnani gi wuode, nikech ok ayie mondo wuode ocham mwanduni kaachiel gi Isaka wuoda.”

¹¹ Wachni nochando chuny Ibrahim ahinya, nimar Ishmael bende ne rembe.

¹² To Nyasaye nowachone niya, “Kik chunyi chandre nikech nyathino, kata nikech Hagar jatichni, tim mana kaka Sara osewachoni, nimar joka Isaka kende ema noluong ni nyikwayi.

¹³ To wuod jatichni bende nami nyikwayo mang’eny, mi ginibed oganda maduong’ nikech en wuodi minywolo.”

¹⁴ Ibrahim nochiew gokinyi, momiyo Hagar chiemo kod puga mar pi. Eka noketo nyathi e gok Hagar, mogole odhi. Hagar nowuok modhi, kendo notho wuotho awuotha e thim Beer-sheba.

¹⁵ Kane pi moting’o oserumo, nobolo nyathi e tiend bungu. Eka nochwalore nyime ma dirom mita mia achiel,

¹⁶ mobet piny kowacho niya, “Ok darang nyathina katho.” To kane pod obet kanyo, nyathi nochako ywak.

¹⁷ Nyasaye nowinjo ka nyathi ywak, mi malaika mar Nyasaye nowuoyo gi Hagar gi e polo, kapenje niya, “Ang’o machandi Hagar? Kik iluor, nimar Nyasaye osewinjo ywak nyathi.

¹⁸ Chung’ ikaw nyathi, kendo irite maber, nikech nami nyikwaye bedo oganda maduong’.”

¹⁹ Eka Nyasaye noyawo wang’ Hagar, mi Hagar noneno soko moro. Nodhi motuomo pi e puke, momiyo nyathi omodho.

²⁰ Nyasaye norito nyathino. Nodak e thim Paran, kendo nodoko jadwar molony.

²¹ Bang’e min mare nonyombone e piny Misri.

Ibrahim gi Abimelek jotimo singruok

²² E ndalono Abimelek kod Fikol ma jatend jolweny nodhi ir Ibrahim mowachone niya, “Nyasaye ni kodi kuom gik moko duto mitimo.

²³ Omiyo koro kuong’rina gi nying Nyasaye ni ok nitimna gimoro marach kata ni nyithinda kata ni nyikwaya. Kaka asetimoni maber, e kaka in bende onego itimna maber, kendo ni piny ma koro idakie.”

²⁴ Ibrahim nodwoke niya, “Ayie.”

²⁵ To bang’e nonyiso Abimelek wach soko moro mane jatich Abimelek osemaye.

²⁶ Abimelek nodwoke niya, “Ok ang’eyo wachno, nikech pok inyisago, to kawuono ema akwongo winjee.”

²⁷ Eka Ibrahim nomiyo Abimelek nyirombe gi dhok, mi ne gitimo winjruok.

²⁸ Ibrahim nopogo nyirombe abiriyo kuom jambego, moketo yorgi.

²⁹ Abimelek nopenje gimomiyo nopogo nyirombego,

³⁰ mi Ibrahim nodwoke niya, “Kawgi mondo gibed ranyisi ni an ema nakunyo sokoni.”

³¹ Kuom mano ne ochak kanyo ni Beer-sheba, nikech en e kama ji ariyogo nokuong’oree. (Beer-sheba, to tiende ni, soko abiriyo, kata soko kuong’ruok, nikech rombe abiriyo mane gitimogo singruokno.)

³² Kane gisetimo winjruokno Beer-sheba, Abimelek kod Fikol jatend jolwenje ne jodok e piny jo-Filistia.

³³ Ibrahim to nopidho yath moro Beer-sheba, kendo nolamo Ruoth Nyasaye ma Nyasaye mochwere, kanyono.

³⁴ Bang’e nomedo dak aming’a e piny jo-Filistiano.