Chakruok 13 - MUMA MALER 2015

Abram gi Lut jopogore

¹ Abram noa Misri mochiko yo nyandwat nyaka piny Kanaan ma milambo, kodhi gi chiege kod gik moko duto mane en go, Lut bende nodhi kodgi.

² To Abram koro ne jamoko ahinya, ne en gi rombe gi diek gi dhok, kaachiel gi fedha kod dhahabu.

³ Kane oa kuno, nowuotho matintin, kobworo kochomo Bethel, nyaka nochopo kuma nokwongo bworoe e kind Bethel gi Ai.

⁴ Kendo ogeroe kendo-mar-misango. Eka nolamo Ruoth Nyasaye kanyo.

⁵ Lut mane wuotho gi Abram bende ne nigi rombe gi diek kod dhok, kaachiel gi ji bende mane bworo kode e hembene.

⁶ To lek ne tin, ma ok nyal romo gi, nikech giduto ne gin gi jamni mang’eny.

⁷ Kuom mano dhaw nowuok e kind jokwadh Abram gi jokwadh Lut. E kindeno jo-Kanaan gi jo-Perizi ne pod odak e pinyno.

⁸ Eka Abram nowacho ni Lut niya, “Wan wede; dhaw ok onego bed e kindwa kodi, kata e kind jokwadhi gi jokwadha.

⁹ Ber mondo wapogre. Yier bath piny koma ihero. Kikawo koracham to abiro kawo korachwich. Kata kikawo korachwich to abiro kawo koracham.”

¹⁰ Lut norango koni gi koni, moneno ka holo mar aora Jordan nyaka Zoar nigi pi mang’eny, machal gi puoth Ruoth Nyasaye kata ka piny Misri. (Mano notimore kane pok Ruoth Nyasaye oketho Sodom gi Gomora.)

¹¹ Omiyo Lut noyiero holo mar Jordan duto, mi nochomo yo wuok chieng’. Kamano e kaka ji ariyogo nopogore.

¹² Abram nodong’ e piny Kanaan, to Lut nodak but Sodom e mier mae paw Jordan, kuma noguroe hembe.

¹³ To jo-Sodom ne joma okethore kendo ma joricho motamore gi nono e nyim Nyasaye.

¹⁴ Kane Lut gi Abram osepogore, Ruoth Nyasaye nowacho ni Abram niya, “Ting’ wang’i gi kuma intieno, mondo ing’i yo nyandwat gi yo milambo gi yo wuok chieng’ kod yo podho chieng’

¹⁵ nimar piny duto minenono abiro miyi gi nyikwayi nyaka chieng’.

¹⁶ Anami nyikwayi bed mang’eny mana ka lowo mae piny. Kapo ni ng’ato nyalo kwano lowo mae piny, to kara nyikwayi bende nokwan.

¹⁷ Koro ikri mondo iwuoth kuonde duto e pinyni, nikech amiyigo duto.”

¹⁸ Kuom mano, Abram nodar, modhi Hebron, kuma noguroe hembe but yien milemoe mag Mamre. Eka nodak kanyo mogeroe kendo-mar-misango ni Ruoth Nyasaye.