Ayub 9 - MUMA MALER 2015

Ayub oywagore ni ok onyal dwoko Nyasaye

¹ Eka Ayub nodwoko niya,

² “Ee, ayie gi wecheni, to ere kaka dhano dilo Nyasaye gi bura?

³ Ka da inyalo yudo kinde mar piemie kode gi wach, to onyalo penji penjo gana gi gana ma ng’ato ok nyal dwoko.

⁴ Nyasaye riek malich, kendo en gi teko, ma onge ng’ama nyalo piem kode, mi loye.

⁵ Oyiengo gode apoya, kendo omukogi gi mirimbe mager.

⁶ En ema omiyo piny yiengni, koda ka mise mage.

⁷ Nyasaye nyalo mono chieng’ wuok, kata mono sulue rieny gotieno.

⁸ Onge ng’ama ne okonyo Nyasaye yaro polo, kata nyono Ondieg Nam mager.

⁹ Nyasaye ema oketo sulue e kor polo, kaka Rudhni gi Oluoro-Budho gi Ratego, kod sulue mamoko man yo milambo.

¹⁰ Otimo gik madongo modhiero dhano ng’eyo kendo honni mage okadho akwana.

¹¹ Nyasaye kadho machiegni to ok anyal nene.

¹² Gima odwaro ema okawo, kendo onge ng’ama nyalo tame, bende ong’e ng’ama nyalo penje gima otimo.

¹³ Mirimb Nyasaye osiko. Ne otieko wasike mane okonyo Rahab ondieg nam, kapiem kode.

¹⁴ Koro ere kaka dayud weche ma dadwokgo Nyasaye malichni?

¹⁵ Kata obedo ni aonge gi ketho, to onge gima anyalo timo, mak mana kwayo ng’wono kuom Nyasaye ma jang’adna bura.

¹⁶ To kata ka aluonge e bura, mi obiro, kendo oyiena aloso, to ok apar ni obiro winjo wachna.

¹⁷ Okuma malit kuom gima onge ndhathe, kendo omedo goya kayiem.

¹⁸ Ok onyal weyo ayue, to otimona mana gik ma miyo chunya lit.

¹⁹ Bende datem konyora githwon? To neye kaka oratego! Koso dadonjne? To ng’ama dichune mondo obi e bura?

²⁰ Kata obedo ni an kare, to dhoga awuon dindhoga, kendo gimoro amora ma dawachi dinere marach.

²¹ Aonge gi ketho, to koro ok adew! Asin gi ngima mar pinyni, nikech pogruok onge,

²² nimar Nyasaye tiekowa, kata ka wan gi ketho, kata ka waongego.

²³ Ka ng’at ma onge gi ketho otho apoya, to Nyasaye nyiero anyiera!

²⁴ Nyasaye oseketo piny e lwet joma timbegi richo, bende omiyo jong’ad bura duto bedo muofni. To ka ok en ema ne otimo kamano, to kara, ng’ano mane otime?

²⁵ Ndalona ringo kadho, to onge achiel maber kuomgi.

²⁶ Ngimana kadho ka yie ma jang’wech, kendo ringo matek mana ka ongo ma yudho gweno.

²⁷ Ka atemo bwonjo mondo rem olalna,

²⁸ to rem dwaro mana nega. Ang’eyo ni Nyasaye kwana ka jaketho.

²⁹ To kaka okwana kamano, koro ere gima omiyo onego achandra?

³⁰ Kata da alwokra gi sabun maber,

³¹ to Nyasaye diwita e bur yugi, mi athing’ kata mana lepa!

³² Nyasaye ok en dhano ma dahedhra dwoko, kata ma dadhi ayalgo e bura.

³³ Mad ng’ato bedie ma dithegwa gi Nyasaye, kata ma ding’adnwa bura e kindwa kode,

³⁴ mondo owe kuma, kendo owe bwoga gi masichene.

³⁵ Eka dalosi ka ok aluor, nikech an awuon ang’eyo kaka chunya chalo.