Ayub 8 - MUMA MALER 2015

Bildad onyiso ni Nyasaye en jaadiera

¹ Eka Bildad ja-Shua nodwoko Ayub kapenje niya,

² “Ibiro thoro weche manono kamano nyaka karang’o?

³ Nyasaye ok ng’ad buch amwor, to otimo mana gima kare.

⁴ Nyaka bed ni nyithindi ne oketho e nyime, mi okumogi e yo mowinjore gi kethogi.

⁵ To in koro duogi ir Nyasaye Manyalo Gik Moko Duto.

⁶ Kapo ni iler, kendo ionge gi richo, to obiro konyi, mi odwokni mwanduni duto,

⁷ kendo mwandu ma obiro miyi nobed mang’eny, ma ok nyal pim gi mago mane olalni.

⁸ Parie ane, rieko mag ndalo machon, kendo neye mane kwerewa ofwenyo.

⁹ Wan to, ndalowa nok ahinya, omiyo ok wanyal ng’eyo gimoro, kendo wan ngimawa e pinyni rumo piyo mana ka tipo makadho.

¹⁰ Kuom mano, we ipuonjri kuom rieko joma chon, mondo iyud rieko mang’eny mane gin-go.

¹¹ Bende odundu nyalo dongo ka pi onge? Koso togo nyalo bet kama chuodho onge?

¹² Ka pi odwono, to giwang’ ka pod gitindo, kendo ka pok giromo tiyogo.

¹³ Ji ma ok dew Nyasaye bende chalo gi gigo, kendo ka giseweyo Nyasaye, to gik ma gigeno kuomgi lal nono.

¹⁴ Gik ma gigeno kuomgi chalo gi usi, kata mana gi mbuwi.

¹⁵ Koro ka giyiengore kuom mbuwi, to mbuwi, dikonygi adier, mak oyiech? Koso ka gimako usi, to usi diresgi mak ochot?

¹⁶ Ji ma timbegi richo chalo gi buya, matwi kendo dongo e ndalo chwiri, kendo landore e puodho duto.

¹⁷ Tiendegi olawore e lwendni, kendo omako matek.

¹⁸ To ka opudhgi oko, to onge ng’ama nyalo ng’eyo ni gisebet kanyo.

¹⁹ Mano e kaka ngimagi lal nono, kendo moko manyien wuok kuonde mane gintie.

²⁰ Nyasaye to ok jwang’ joma ogeno kuome, to bende ok okony joma timbegi richo.

²¹ Enochak omi inyier kendo ikog gi mor,

²² to enokel wichkuot ni joma mon kodi, kendo miech joma timbegi richo nolal nono.”