Ayub 40 - MUMA MALER 2015

¹ In Ayub, ne ipiem koda, an Nyasaye Manyalo Gik Moko Duto.

² Koro iyie weyo piem, koso in gi gima idwaro dwoko?

³ Ayub nodwoko niya,

⁴ “A Ruoth Nyasaye, ere kaka dadwoki an aanani? Ok abi temo wacho gimoro machielo kendo,

⁵ nimar asewacho mathoth moloyo kaka owinjore.”

Gik moko malich manyiso teko Nyasaye

⁶ Bang’e Ruoth Nyasaye nochako oloso gi Ayub gie boche polo niya,

⁷ “Koro a malo ka dichwo, mondo idwok weche ma adwaro penjigi.

⁸ In itemo nyiso ni bura ma aseng’ado ok ni kare? Koso idwaro nyiso ni an ema aseketho, mondo in ineri ka ng’ama ni kare?

⁹ Bende iratego ka an adier? Koso dwondi bende chal gi mara ma mor ka polo?

¹⁰ Ka kamano, to kara bidhri maber ka irwakori gi luor kod duong’.

¹¹ Eka irang jogo masungore, mondo iol kuomgi mirimbi mager, omi gibolre.

¹² Ee, ng’igi, mondo igolgi e duong’ ma gin go, kendo irwad joma timbegi richo mana kuonde ma gichung’ie!

¹³ Yikgi e lowo, mi ituegi e Piny Joma Otho.

¹⁴ Kinyalo timo kamano, to an ema nakwong paki, mi ayie ni tekri iwuon ema omiyi iloyo.

¹⁵ Parie rawo mane achueyo, kaka in bende ne achueyi. Ochamo mana lum ka dhiang’,

¹⁶ to neye kaka oratego, kendo kaka dende ojing’!

¹⁷ Iwe ochikore tir ka yiend sida, kendo embene ong’wel malich!

¹⁸ Chokene otegno ka mula, kendo ogwendene chalo sirni mag chuma.

¹⁹ En ema olichie moloyo gik moko mane achueyo, omiyo onge ng’ama dihedhre monje, mak mana an jachuechne.

²⁰ Ochamo lum manie wi gode, kuonde ma le ema odakie.

²¹ Onindo piny e tiend kudho, kendo opondo ei odundu manie siany.

²² Ee, oyueyo e tipo mar kudho, kendo opondo ei osawo manie geng aora.

²³ Kata ka aora opong’ mabubni manadi, to ok oluor, kendo chunye ngich ang’icha, kata ka pi tagore e wang’e.

²⁴ Ere ng’ama didin wang’e, mi make? Koso en ng’a ma dituch ume gi olowu?