Ayub 4 - MUMA MALER 2015

Elifaz okwero Ayub

¹ Eka Elifaz ja-Teman nopenjo Ayub niya,

² “Mit ka chunyi nyalo doko malit ka ng’ato owuoyo kodi, nimar ok anyal ling’ mak awuoyo?

³ Par ine kaka isepuonjo ji mang’eny, kendo isejiwo joma yomyom.

⁴ Wecheni ne siro joma ochwanyore ma dwaro podho, kendo ne irieyo chongegi monyosore.

⁵ To koro thagruok ma kamano osebironi in iwuon, kendo chunyi chandore ma ok inyal bedo gi kue.

⁶ Donge yie ma in go kuom Nyasaye kueyo chunyi? Koso donge igeno kuom timni makare?

⁷ Ara koro par ane, ka bende nitie kata ng’at achiel makare ma oseyudo thagruok malich, kata ng’ama ber ma masira osetieko?

⁸ Aseneno ni joma puro richo, kendo chwoyo timbe maricho kayo mana gik ma kamago.

⁹ Nyasaye tiekogi gi mirimbe mager, mana ka gima yamb ahiti ema ogoyo, molalgo nono.

¹⁰ Joma timbegi richo twaro, kendo ruto ka sibuor, to Nyasaye miyo giling’, kendo turo lekegi.

¹¹ Githo mana ka sibuor ma onge gima cham, kendo nyithindgi oke kuonde duto.

¹² Ne okuodhna wach moro mos, mane ok anyal winjo maber.

¹³ Ne ochalo gi lek ma mono ng’ato nindo.

¹⁴ Ne abwok, kendo kibaji ne ogoya, mi denda duto otetni

¹⁵ Eka muya maliw nokudho pat wang’a, mi denda ojuol.

¹⁶ Ne aneno ka gimoro ochung’ buta kanyo, to kata obedo ni ne arange, ne ok anyal ng’eyo ni en ang’o. Piny noling’ thi, eka ne awinjo dwol machil kawacho niya,

¹⁷ ‘Bende dhano nyalo bedo makare e nyim Nyasaye? Koso nitie ng’ato manyalo bedo maler e nyim Jachuechne?’

¹⁸ Ka Nyasaye ok ogeno jotichne owuon, kendo oyudo ni malaikane gin joketho,

¹⁹ koro ere kaka dogen dhano ma ochwe mana gi lowo, kendo molos mana gi buru, ma inyalo ng’inyo ka oguyo?

²⁰ Dhano nyalo bedo kangima gokinyi, to otho apoya ka pok ochopo odhiambo.

²¹ Gik moko duto ma en go omaye, kendo otho mana ka pod oonge gi rieko.